އިންޑިއާގެ ވެރިރަށް ނިއުދިއްލީގެ ލަލިތު ހޮޓަލުން ނެގި ނެސްލޭ ކުންފުނީގެ "ލޯ ފެޓް ޑެއިރީ ވައިޓްނާ" ގެ ސާމްޕަލެއް ތަހުލީލުކުރުމަށް ފަހު، އެއީ ސިއްހަތަށް ނުރައްކާތެރި އަދި ފެންވަރު ދަށް އެއްޗެއް ކަމަށް އެ ގައުމުގެ ކާބޯތަކެތީގެ ރައްކާތެރިކަމާ ބެހޭ އިދާރާއިން ހޮނިހިރު ދުވަހު ބުނެފި އެވެ.
އިންޑިއާގެ ފުޑް ސޭފްޓީ އެންޑް ސްޓޭންޑަޑްސް އޮތޯރިޓީ (އެފް.އެސް.އެސް.އޭ.އައި) އިން އެކްސްގައި ކުރި ޕޯސްޓެއްގައި ބުނީ، ލެބޯޓްރީ ތަހުލީލުތަކުން އެ ސާމްޕަލް މިންގަނޑުތަކަށް ނުފެތޭކަން ހާމަވެފައިވާ ކަމަށެވެ. އަދި އެ އުފެއްދުން ވިއްކުން ވަގުތުން ހުއްޓާލުމަށް ލަލިތު ހޮޓަލަށް މިހާރު ވަނީ އަންގާފަ އެވެ.
ކާބޯތަކެތީގެ ރައްކާތެރިކަން ބަލަހައްޓާ އިދާރާއިން މި މައްސަލައިގެ ފުރިހަމަ ރިޕޯޓު އަދި އާންމެއް ނުކުރެ އެވެ.
ނެސްލޭ އިންޑިއާއިން ބުނި ގޮތުގައި އެ ކުންފުނީގެ އުފެއްދުމަކީ ބޭނުންކުރަން ރައްކާތެރި، އަދި ކަނޑައެޅިފައިވާ ގަވާއިދުތަކަށް ފެތޭ އުފެއްދުމެކެވެ. އެ ކުންފުނިން އިތުރަށް ބުނީ، އެފް.އެސް.އެސް.އޭ.އައިގެ ރިޕޯޓުގައި ފޮސްފަރަސް ހުރި މިންވަރު ބަލާފައިވަނީ ކިރުގެ ބާވަތްތަކުގައި ގުދުރަތީ ގޮތުން ހުންނަ ފޮސްފަރަސްއަށް ރިއާޔަތްނުކޮށް، ހަމައެކަނި އިތުރުކުރާ ފޮސްފަރަސްގެ މިންގަނޑުން ކަމަށެވެ.
ނެސްލޭގެ ތަރުޖަމާނު ވިދާޅުވީ، މި މައްސަލައިގައި ކަމާބެހޭ އިދާރާތަކާ މަޝްވަރާ ކުރަމުންދާ ކަމަށާއި، ކިރުގެ ބާވަތްތަކުގައި ގުދުރަތީ ގޮތުން ފޮސްފަރަސް ހުންނަކަން ސާބިތުކޮށްދިނުމަށް އެފަދަ އެހެން އުފެއްދުންތަކުގެ މައުލޫމާތު ވެސް ހިއްސާކޮށްފައިވާ ކަމަށެވެ.
މި މައްސަލައިގައި ލަލިތު ހޮޓަލުން ވަކި އެއްޗެއް ނުބުނެ އެވެ.
ނެސްލޭގެ އުފެއްދުންތަކަށް އެންމެ ބޮޑު ތަރުހީބެއް އޮންނަ އެއް ގައުމު ކަމަށްވާ އިންޑިއާގެ ރެގިއުލޭޓަރީ އިދާރާއިން މިދިޔަ ސެޕްޓެމްބަރު މަހު ވެސް ވަނީ ނެސްލޭގެ ތުއްތު ކުދިންގެ ކާނާގެ ސާމްޕަލެއް ފެންވަރު ދަށް ކަމަށް ނިންމައި، ސްވިޒަލޭންޑުގެ މި ކުންފުންޏާ ދެކޮޅަށް ގާނޫނީ ފިޔަވަޅު އަޅަން ނިންމާފަ އެވެ.
އެ ފަހަރު ވެސް ނެސްލޭއިން ބުނެފައިވަނީ އެ ކުންފުނީގެ އުފެއްދުންތަކަކީ ކަނޑައެޅިފައިވާ ހުރިހާ ގަވާއިދުތަކަކަށް ފުރިހަމައަށް ފެތޭ ތަކެތި ކަމަށެވެ.
