ބުދަ ދުވަހު ފްލައިދުބާއީގެ ބޯޓެއް ވައްޓާލަން އުޅުނު ކަމަށް ބުނާ ކޯ-ޕައިލެޓްގެ ހަމަލާތަކުން ފަސިންޖަރުން ސަލާމަތްކޮށްދިން އިންޑިއާގެ ޕައިލެޓް ސްމިތު މަޗާރަކީ ބަތަލެއްގެ ގޮތުގައި އިސްރާއީލާއި އިންޑިއާގެ ވެރިން ސިފަކުރައްވައި، އޭނާއަށް ވަރަށް ބޮޑަށް ތައުރީފު ކުރައްވައިފި އެވެ.
އިސްރާއީލުގެ އޮފިޝަލުން ބުނި ގޮތުގައި، ކޯ-ޕައިލެޓް ބޯޓު ވައްޓާލަން ކުރި މަސައްކަތް ފަސިންޖަރުންނާއި ފްލައިޓް ކްރޫއިން ހުއްޓުވުމާ ގުޅިގެން، އެ ފްލައިޓުން ދަތުރުކުރި އެންމެން ބުދަ ދުވަހު ވަނީ ރައްކާތެރިކަމާއެކު އިސްރާއީލަށް ގޮސްފަ އެވެ. މި ހާދިސާ ހިނގަން ފެށީ ކޯ-ޕައިލެޓް، ޕައިލެޓް މަޗާރަށް ވަޅިން ހަމަލާދީ، 30 ސިކުންތަށް ވުރެ ކުރު މުއްދަތެއްގެ ތެރޭގައި ބޯޓު 14،000 ފޫޓު ތިރިއަށް ވެއްޓެން ފެށުމުންނެވެ.
އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ ތަރުޖަމާނު ރޮއިޓާސްއަށް މައުލޫމާތު ދެމުން ބުނީ، ޒަޚަމްވެ ލެއިން ތަތްތެޅިފައި ބޯޓުގެ ތަޅުންގަނޑު މަތީގައި އޮވެމެ، މަޗާރު ވަނީ ކޮކްޕިޓްގެ ދޮރު ހުޅުވުމަށް ބޭނުންވާ ރިލީޒް ބަޓަނަށް ފިއްތާލުމުގައި ކާމިޔާބު ހޯދާފަ އެވެ. އެއާއެކު، ބޯޓުގެ ފަސިންޖަރުންނާއި ކްރޫއިން ކޮކްޕިޓަށް ވަދެ ކޯ-ޕައިލެޓް މައިތިރިކުރި އެވެ. އަދި އެ ފްލައިޓުގައި ދަތުރުކުރި ފްލައިދުބާއީގެ އިތުރު ދެ ޕައިލެޓުންގެ އެހީތެރިކަމާއެކު ބޯޓު ވަނީ ސައުދީ އަރަބިއްޔާގެ ތަބޫކަށް ރައްކާތެރިކަމާއެކު ޖައްސާފަ އެވެ.
އެކްސްގައި ކުރި ޕޯސްޓެއްގައި ނަތަންޔާހޫ ބުނީ، މަޗާރު ވަނީ އިސްރާއީލުގެ ރައްޔިތުންނާއި އެހެނިހެން ގައުމުތަކުގެ މީހުން ހިމެނޭހެން ޖުމްލަ 174 މީހެއްގެ ފުރާނަ ސަލާމަތްކޮށްދީފައި ކަމަށެވެ.
ބުރާސްފަތި ދުވަހުގެ ކުރީކޮޅު އިންޑިއާގެ ބޮޑުވަޒީރު ނަރެންދުރަ މޯދީ އެކްސްގައި ކުރެއްވި ޕޯސްޓެއްގައި މަޗާރަށް ތައުރީފު ކުރައްވަމުން އޭނާއަކީ "ބަތަލެއް" ކަމަށް ވަނީ ވިދާޅުވެފަ އެވެ.
މޯދީ ވިދާޅުވީ، ކުރިމަތިވި ނުރައްކާތެރި ދަނޑިވަޅުގައި ސީރިއަސް އަނިޔާތަކެއް ލިބިފައިވީ ނަމަވެސް، އެހެން މީހުންގެ ފުރާނަ ސަލާމަތްކުރުމަށް މަޗާރު ދެއްކީ ނުގުޑާފަދަ އަޒުމަކާއި ހިތްވަރެއް ކަމަށެވެ. އޭނާގެ ކެރުމާއި ހިތްވަރުގެ ސަބަބުން އެތައް ސަތޭކަ ބައެއްގެ ފުރާނަ ސަލާމަތްވެ، ބޮޑު ކާރިސާއަކުން ސަލާމަތްވި ކަމަށް މޯދީ ވިދާޅުވި އެވެ.
ސައުދީ އަރަބިއްޔާގައި ތިބި އިންޑިއާގެ އޮފިޝަލުން ވިދާޅުވީ، މަޗާރަށް މިހާރު ސައުދީގެ ހުޅަނގު އުތުރު ސިޓީއެއް ކަމަށްވާ ތަބޫކުގެ ހޮސްޕިޓަލެއްގައި ފަރުވާ ދެމުންދާ ކަމަށެވެ. އަދި އޭނާގެ އާއިލާ އާއި ސައުދީގެ ކަމާބެހޭ ފަރާތްތަކާ ގުޅިގެން ދެވެން އޮތް ހުރިހާ އެހީތެރިކަމެއް ފޯރުކޮށްދެމުންދާ ކަމަށްވެސް ވިދާޅުވި އެވެ.
ސައުދީގައި ހުންނަ އިންޑިއާ އެމްބަސީން އެކްސްގައި ކުރި ޕޯސްޓެއްގައި ބުނެފައިވަނީ މަޗާރުގެ ހާލަތު މިހާރު ސްޓޭބަލް ކަމަށެވެ.
އިންޑިއާގެ މުމްބާއީއަށް ނިސްބަތްވާ މަޗާރު، މި ހާދިސާއަށްފަހު ސާޖަރީއެއް ހަދާފައިވާ ކަމަށް އިންޑިއާގެ ނޫހެއް ކަމަށްވާ "ހިންދުސްތާން ޓައިމްސް" އިން ރިޕޯޓުކޮށްފައިވެ އެވެ.
ލިންކްޑްއިން ޕްރޮފައިލްގައިވާ މައުލޫމާތަށް ބަލާއިރު، މަޗާރު ފްލައިދުބާއީއާ ގުޅުމުގެ ކުރިން އިންޑިއާގެ ސްޕައިސްޖެޓް އެއާލައިންގައި 11 އަހަރަށް ވުރެ ގިނަ ދުވަހު މަސައްކަތް ކޮށްފައިވެ އެވެ.
ދެ ޕައިލެޓުންގެ ދެމެދުގައި ހިނގި މި ހަމަނުޖެހުމުގެ އަސްލު ސަބަބެއް އަދި ސާފެއް ނުވެ އެވެ. ފްލައިދުބާއީން ނެރުނު ބަޔާނެއްގައި ބުނީ މި ހާދިސާ ހިނގަން މެދުވެރިވި ސަބަބު އަދި ނޭނގޭ ކަމަށާއި، ތަހުގީގު ނިމުމުގެ ކުރިން އެކި ގޮތްގޮތަށް ވާހަކަ ނުފެތުރުމަށް އިލްތިމާސްކުރާ ކަމަށެވެ. އަދި މި ހާދިސާގެ ތަހުގީގު ކުރިއަށްދާތީ، އިސްރާއީލަށް ކުރާ ދަތުރުތައް ވަގުތީ ގޮތުން އެ އެއާލައިނުން ވަނީ މެދުކަނޑާލާފަ އެވެ.
