ކަސްޓަމަރެއްގެ އެކައުންޓުން ދޮޅުލައްކަ ޑޮލަރު ވަގަށް ނެގި މައްސަލައެއްގައި ބޭންކް އޮފް ސިލޯނުގެ ކުރީގެ ޑެޕިއުޓި ކަންޓްރީ މެނޭޖަރު ހަސަން ވަހީދު ތިން އަހަރަށް ޖަލަށްލާން ކްރިމިނަލް ކޯޓުން ހުކުމްކޮށްފި އެވެ.
ހަސަން ވަހީދުގެ މައްޗަށް ދައުލަތުން ދެ ދައުވާއެއް އުފުލި އެވެ. އެއީ ފޭކު ޓްރާންސްފާ ރިކުއެސްޓެއް އުފެއްދި މައްސަލައިގައި އުފުލި ސައްހަ ނޫން ލިޔުމެއް އުފެއްދުމުގެ ދައުވާ އާއި ވައްކަން ކުރި މައްސަލައިގައި އެހެން މީހެއްގެ މުދަލަށް ވެރިވެގަތުމުގެ ކުށުގެ ދައުވާ އެވެ.
ހަސަން ވަހީދު ވަނީ ބޭންކް އފް ސިލޯނުގެ ކަސްޓަމަރެއްގެ އަތުން 150،000 ޑޮލަރު 2019 ވަނަ އަހަރު ވަގަށް ނަގައިފި އެވެ. އަދި ޝައްކު އުފެދުނު އެހެން ހާދިސާއެއްގައި ހަމަ އެ ކަސްޓަމަރުގެ އެކައުންޓުން 110،000 ޑޮލަރު ވަނީ ކުރިން ގެއްލިފަ އެވެ.
ވަގަށް ނެގި ފައިސާ އަނބުރާ ދައްކަން ހެޔޮ ނިޔަތުގައި މަސައްކަތްތަކެއް ކޮށްފައިވާ ކަމަށް ކޯޓަށް ނުފެންނާތީ އާއި ހެކި ގަރީނާގެ މައްޗަށް ބަލައި ކުށުގެ ދަރަޖަ މަތި ކުރަން ވެސް ކޯޓުން ކަނޑައެޅި އެވެ.
ހަސަން ވަހީދުގެ މައްސަލަ 2019 ވަނަ އަހަރު ކޯޓަށް ވެއްދި ނަމަވެސް އެ މައްސަލަ ފުރަތަމަ ވެސް ތާވަލުކޮށްފައި ވަނީ 2024 ވަނަ އަހަރެވެ. އެހެންވެ، އަވަސް ޝަރީއަތެއް ލިބުމުގެ ހައްގު ހަސަން ވަހީދަށް ގެއްލިފައިވާ ކަމަށް ފެންނާތީ ފަނޑިޔާރު ވަނީ އޭނާގެ އަދަބުން ދެ ދަރަޖައެއް ލުއިކޮށްދީފަ އެވެ.
އޭނާގެ ޖަލު އަދަބުން ދެ އަހަރު ލުއިކޮށް ޖޫރިމަނާއަކަށް ވަނީ ބަދަލުކޮށްފަ އެވެ. އެގޮތަށް ބަދަލު ކުރުމަށް ދައުލަތުން ވެސް އިއުތިރާޒު ނުކުރާ ކަމަށް ބުނެފައިވެ އެވެ.
އެ މައްސަލައިގައި ކޯޓުން ބުރާސްފަތި ދުވަހު ކަނޑައެޅީ އެ ދެ ދައުވާ ވެސް އޭނާގެ މައްޗަށް ސާބިތުވާ ކަމަށެވެ. ސައްހަ ނޫން ލިޔުމެއް އުފެއްދި މައްސަލައިގައި އޭނާ ވަނީ ހަ މަސްދުވަށް ޖަލަށްލައިފަ އެވެ. އަދި ވައްކަން ކުރި މައްސަލައިގައި އޭނާ ވަނީ ދެ އަހަރާއި ނުވަ މަހާއި 11 ދުވަހަށް ޖަލަށްލައިފަ އެވެ. މިއީ ޖަލު އަދަބުން އޭނާ ތަންފީޒު ކުރަންޖެހޭ މުއްދަތެވެ.
