ބޭރުގެ ހިއްސާ އޮންނަ ހޯލްސޭލް، ރީޓެއިލް އަދި ލޮޖިސްޓިކްސް ކުންފުނިތަކުން ރާއްޖޭގައި ވިޔަފާރި ކުރުން މަނާވެއްޖެ އެވެ.
ރީޓެއިލް، ހޯލްސޭލް އަދި ލޮޖިސްޓިކްސްގެ ވިޔަފާރި ބިދޭސީ ކުންފުނިތަކަށް ނުކުރެވޭ ގޮތަށް ގާނޫނު އިސްލާހު ކުރީ ސެޕްޓެމްބަރު، 2024، ގަ އެވެ. ގާނޫނުގައި ބިދޭސީ ވިޔަފާރިތަކަށް ދިން އިންތިގާލީ މުއްދަތު ހަމަވީ މިދިޔަ ބުރާސްފަތި ދުވަހެވެ.
އެއާއެކު، ހޯލްސޭލް، ރީޓެއިލް އަދި ލޮޖިސްޓިކްސްގެ ދާއިރާގައި މަސައްކަތްކުރާ ބޭރުގެ ކުންފުނިތަކުން ކަނޑައެޅިފައިވާ ޝަރުތުތައް ފުރިހަމަނުކޮށް ވިޔަފާރި ކުރިއަށް ނުގެންދެވޭނެ އެވެ.
މިނިސްޓްރީން ބުނި ގޮތުގައި، މި ބަދަލުގެ އަސަރުކުރާ ދާއިރާތަކުގައި ހަރަކާތްތެރިވާ ގިނަ އަދަދެއްގެ ކުންފުނިތަކުން ވަނީ ލޯކަލައިޒްކުރުމާއި، ކުންފުނި އަލުން ބައްޓަންކުރުން ފަދަ ފިޔަވަޅުތަކުގެ އެހީގައި އުސޫލުތަކަށް ފެއްތުމަށް އެދި ހުށަހަޅާފަ އެވެ. މިހާރު އެ ހުށަހެޅުންތައް ދިރާސާކުރަމުންދާ ކަމަށް މިނިސްޓްރީން ބުނެ އެވެ.
ރަސްމީކޮށް މިނިސްޓްރީއާ ގުޅިގެން އުސޫލުތަކަށް ފެއްތުމުގެ މަސައްކަތް ފަށާފައިވާ ކުންފުނިތަކުން، މިނިސްޓްރީން ކަނޑައަޅާ މުއްދަތެއްގެ ތެރޭގައި ފުރިހަމަނުވެ ހުރި ކަންކަން ނިންމަން ޖެހޭނެ އެވެ. އަދި އެ މަސައްކަތްތައް ތަރުތީބުން ނިންމުމަށްޓަކައި އެ ކުންފުނިތަކާ އެކު ސީދާ މަސައްކަތް ކުރަމުންދާނެ ކަމަށް ވެސް މިނިސްޓްރީން ބުނެފައިވެ އެވެ.
ބުރާސްފަތި ދުވަހުގެ ނިޔަލަށް އިންތިގާލީ މަރުހަލާގެ އެޕްލިކޭޝަން ހުށަހަޅާފައި ނުވާ ނުވަތަ މިނިސްޓްރީއާ އެއްވެސް މުއާމަލާތެއް ކޮށްފައި ނުވާ ކުންފުނިތަކަށް، ބޭރުގެ އިންވެސްޓްމަންޓާ ބެހޭ ގާނޫނުގެ ދަށުން ރަސްމީ ނޯޓިސް ފޮނުވާނެ އެވެ. އެ ނޯޓިސްގައި ދީފައިވާ މުއްދަތުގެ ތެރޭގައި، ހުއްދަ ނޫން ވިޔަފާރި ހަރަކާތްތައް ހުއްޓާލުން ހިމެނޭހެން އަޅަންޖެހޭ ފިޔަވަޅުތައް އެ ކުންފުނިތަކުން އަޅަން ޖެހޭނެ އެވެ.
ކަނޑައެޅިފައިވާ ޝަރުތުތަކަށް ނުވަތަ މިނިސްޓްރީގެ އިރުޝާދުތަކަށް އަމަލުނުކޮށްފި ނަމަ، އެއީ ގާނޫނުގެ 23 ވަނަ މާއްދާގެ ދަށުން ކުށެކެވެ. އެފަދަ ހާލަތްތަކުގައި ގާނޫނުގެ 24 ވަނަ މާއްދާ އާއި 25 ވަނަ މާއްދާގެ ދަށުން ފިޔަވަޅު އެޅުމުގެ އިޚްތިޔާރު މިނިސްޓްރީއަށް ލިބިގެންވެއެވެ.
މީގެ އިތުރުން، ކުރިން މިނިސްޓްރީއާ ގުޅިފައިވީ ނަމަވެސް ނުވަތަ ނޫން ނަމަވެސް، އުސޫލުތަކަށް އަމަލުނުކުރާ ކުންފުނިތަކާ މެދު ގާނޫނުގެ 23 ވަނަ މާއްދާގެ ދަށުން ފިޔަވަޅު އަޅާނެ ކަމަށް މިނިސްޓްރީން ވަނީ އިންޒާރު ދީފައެވެ.
ލޯކަލައިޒްކޮށްގެން (ދިވެހި ހިއްސާ ހިމަނައިގެން) މި ދާއިރާތަކުގައި ދެމިތިބެން ބޭނުންވާ ކުންފުނިތަކުން، އެ ކުންފުނިތަކުގެ މިލްކުވެރިކަން ބަދަލުކުރާ ގޮތަކީ އުސޫލުތަކާ އެއްގޮތްވާ ގޮތެއްކަން ސާބިތުކޮށްދޭން ޖެހޭނެ އެވެ. މިނިސްޓްރީން ބުނި ގޮތުގައި، ހިއްސާ ބަދަލުކުރުމުގެ ނަތީޖާއަކަށް ވާންޖެހޭނީ ވިޔަފާރީގެ މިލްކުވެރިކަމާއި ހިންގުމުގައި ދިވެހިންގެ ހަގީގީ އަދި މާނަހުރި ބައިވެރިވުމެއް އޮތުމެވެ.
ހިއްސާ ބަދަލުކުރުމުގެ އާންމު ޝަރުތުތަކުގެ އިތުރުން، މިފަދަ ކުންފުނިތަކުން އިތުރު މައުލޫމާތާއި ލިޔެކިޔުންތައް ހުށަހަޅަން ޖެހޭނެ އެވެ. އެގޮތުން މިނިސްޓްރީން ބަލާނެ ކަންކަމުގެ ތެރޭގައި ހިމެނެނީ:
- މިލްކުވެރިކަން ބަދަލުކުރި ގޮތާއި އޭގެ މިންވަރު
- ހިއްސާގެ އަގު އަދާކުރުމަށް ނިންމާފައިވާ އިންތިޒާމުތައް
- ފައިސާ ހޯދި ގޮތާއި ފައިނޭންސް ކުރި ގޮތް
- މަންފާލިބޭ ހަގީގީ މިލްކުވެރިޔާ (ބެނެފިޝަލް އޯނަރޝިޕް) އަދި ކުންފުނި ކޮންޓްރޯލްކުރާ ފަރާތް
- ހިއްސާ ބަދަލުކުރި ބޭރުގެ ފަރާތުގެ ނުވަތަ ގުޅުންހުރި ފަރާތެއްގެ އެއްވެސް މަސްލަހަތެއް ނުވަތަ ހައްގެއް އޮތްތޯ ބެލުން
- އަލަށް ގުޅުނު ދިވެހި ހިއްސާދާރުންގެ ދައުރާއި ބައިވެރިވުން
މިނިސްޓްރީން ބުނީ މިކަމުގެ މަގްސަދަކީ ލޯކަލައިޒްކުރުމަކީ ހަމައެކަނި ނަމެއްގައި ނުވަތަ ލިޔެކިޔުމެއްގައި ހިއްސާ ބަދަލުކުރުމުގެ ބަދަލުގައި، އަމަލީ ގޮތުން މިލްކުވެރިކަމާއި ބައިވެރިވުން ބަދަލުވުން ކަން ކަށަވަރުކުރުން ކަމަށެވެ. މިފަދަ ހިއްސާ ބަދަލުކުރުމުގެ އިތުރު ތަފްސީލީ އުސޫލުތައް ވަކިން އާންމުކުރާނެ ކަމަށް ވެސް ބުނެފައިވެ އެވެ.
