ޔަމަނުގައި ހަރަކާތްތެރިވާ ހޫތީ ހަނގުރާމަވެރިންނާ ދެކޮޅަށް ވަރުގަދަ އަސްކަރީ އޮޕަރޭޝަނެއް ފެށުމަށް ސައުދީ އަރަބިއްޔާއިން ތައްޔާރުވަމުންދާ ކަމަށް ސަރަހައްދީ އަދި ހުޅަނގުގެ އޮފިޝަލުން ރޮއިޓާސްއަށް މައުލޫމާތު ދީފި އެވެ.
މި އޮޕަރޭޝަނުގެ ދަށުން ރަތްކަނޑުގެ ކަނޑުދަތުރުފަތުރުގެ މަގުތައް ރައްކާތެރިކުރުމަށްޓަކައި އައްސޭރިފަށުގެ ސަރަހައްދުތައް ހިފުމަށް ނުވަތަ އެކި ދިމަދިމާލުން އެއްފަހަރާ ހަމަލާދިނުމަށް ސައުދީން ދަނީ ވިސްނަމުންނެވެ.
މި ތައްޔާރީތަކުގެ މައުލޫމާތު އެނގޭ ހަ މަސްދަރަކުން ބުނި ގޮތުގައި، ކުރިއަށް އޮތް ހަފުތާތަކުގެ ތެރޭގައި ފެށުމަށް ހަމަޖެހިފައިވާ މި އޮޕަރޭޝަން އެއްގަމު މަގުން ކުރިއަށް ގެންދާނީ ރިޔާދްގެ ބެލުމުގެ ދަށުން ހަރަކާތްތެރިވާ ޔަމަނުގެ ސިފައިންނެވެ. އަދި މި ހަމަލާތަކަށް ސައުދީ އަރަބިއްޔާގެ ވައިގެ ސިފައިން އެހީތެރިކަން ފޯރުކޮށްދޭނެއެވެ.
ސަލާމަތީ ސަބަބުތަކަށްޓަކައި ނަން ހާމަނުކުރުމަށް އެދި މައުލޫމާތު ދިން ފަރާތްތަކުން ބުނި ގޮތުގައި، ޔަމަނުގައި ސައުދީން ހިންގާ އޮޕަރޭޝަންތަކަށް އެމެރިކާއިން ޖާސޫސީ މައުލޫމާތު ފޯރުކޮށްދެމުންދާއިރު، ސަރަހައްދީ ބައެއް ގައުމުތަކާއި ޔޫރަޕްގެ ގައުމުތަކުން ދަނީ ސައުދީގެ ދިފާއަށް ބޭނުންވާ އަސްކަރީ އެހީތެރިކަން ފޯރުކޮށްދެމުންނެވެ. ނަމަވެސް، ސައުދީގެ ބައިވެރިން މި ހަނގުރާމައިގެ އަމަލީ މައިދާނުގައި ސީދާ ގޮތެއްގައި ބައިވެރިވާނެ ކަމަކަށް ނުބެލެވެ އެވެ.
ސައުދީ އަރަބިއްޔާއިން އަވަށްޓެރި ޔަމަނުގެ ދާޚިލީ ހަނގުރާމައިގެ ތެރެއަށް ވަނީ 2015 ވަނަ އަހަރު، ބައިނަލްއަގުވާމީ ގޮތުން ބަލައިގަނެފައިވާ ޔަމަނުގެ ސަރުކާރުގެ ދިފާއުގަ އެވެ. އެ ސަރުކާރުގެ ބާރުތައް ވެރިރަށް ސަނާއިން ބޭރުކޮށްލީ ހޫތީންނެވެ.
ހަނގުރާމަވެރި ފަރާތްތަކުގެ މެދުގައި 2022 ވަނަ އަހަރު އެއްބަސްވި ހަމަލާބަދަލުކުރުން ހުއްޓާލުމުގެ އެއްބަސްވުމަށް މިއަހަރާ ހަމައަށް އަމަލުކުރަމުން ދިޔަ ނަމަވެސް، އީރާނާ ގުޅުންހުރި ހަނގުރާމައިގެ ތެރެއިން ހޫތީން ސައުދީގެ އާގުބޯޓުތަކަށާއި ތެލުގެ ވަސީލަތްތަކަށް މިސައިލާއި ޑްރޯން ހަމަލާތައް ދޭން ފެށުމުން މަސްރަހު ވަނީ ގޯސްވެފަ އެވެ.
