ކެންޔާގައި އެބޯލާ ވައިރަސް ޖެހިގެން މީހަކު މަރުވުމާ ގުޅިގެން، އެ މީހާއާ ބައްދަލުވި 10 މީހަކު ކަރަންޓީނުކޮށްފައިވާ ކަމަށް އެ ގައުމުގެ ސިއްހީ އިދާރާތަކުން ބުނެފި އެވެ.
އިރުމަތީ އެފްރިކާގެ ގައުމެއް ކަމަށްވާ ކެންޔާގެ ވެރިރަށް ނައިރޯބީގެ ހޮސްޕިޓަލެއްގައި މިދިޔަ ހޯމަ ދުވަހު މަރުވި މި ބަލިމީހާއަކީ ޑިމޮކްރެޓިކް ރިޕަބްލިކް އޮފް ކޮންގޯ (ޑީއާރު ކޮންގޯ) އިން ދަތުރުކުރި މީހެކެވެ. އޭނާއާ ބައްދަލުވި އިތުރު 57 މީހަކު ހޯދުމުގެ މަސައްކަތް ކަމާބެހޭ ފަރާތްތަކުން މިހާރު ދަނީ ކުރަމުންނެވެ.
މިއީ ކެންޔާއިން އެބޯލާގެ ކޭސްއެއް ފެނުނު ފުރަތަމަ ފަހަރެވެ. މި ހާދިސާއާ ގުޅިގެން އެ ގައުމުގެ ބޯޑަރުތަކުގައި ބަލިތަކަށް ސްކްރީން ކުރުމަށް ގާއިމުކޮށްފައިވާ ނިޒާމުގެ ފެންވަރާ މެދު މިހާރު ވަނީ ބޮޑެތި ކަންބޮޑުވުންތަކެއް އުފެދިފަ އެވެ.
އެފްރިކާ ސެންޓާސް ފޯ ޑިޒީޒް ކޮންޓްރޯލް އެންޑް ޕްރިވެންޝަން (އެފްރިކާ ސީޑީސީ) ގެ އިސްވެރިޔާ ވިދާޅުވީ، އެ މީހާ ބަލިވެ އުޅޭތާ މަހެއްހާ ދުވަސް ވެފައިވީ ނަމަވެސް، ޑީއާރު ކޮންގޯގެ އެކި ސިޓީތަކުން ދަތުރުކޮށް، ކާރުގައި ޔުގެންޑާއަށް ގޮސް، އެތަނުން ފްލައިޓެއްގައި ކެންޔާއަށް ދިޔައިރުވެސް ބަލި ދެނެގަނެވިފައި ނުވާ ކަމަށެވެ.
އޭނާ ވިދާޅުވީ، އެ މީހާ ޑީއާރު ކޮންގޯގެ އުތުރުގައި އޮންނަ ބޫޓާ ސިޓީން ފުރައިގެން ކާރުގައި ކިސަންގާނީއަށް ދިޔަ ކަމަށެވެ. އަދި ކިސަންގާނީން ފްލައިޓެއްގައި ބެނީއަށް ދިއުމަށްފަހު، އެތަނުން ކާރުގައި ޔުގެންޑާއަށް ދަތުރުކޮށް، އެންމެ ފަހުން ޔުގެންޑާއިން ފްލައިޓެއްގައި ނައިރޯބީއަށް ދިޔަކަން އެނގިފައިވާ ކަމަށް އޭނާ ވިދާޅުވި އެވެ.
އެބޯލާ ވައިރަސް އާންމުކޮށް ފެތުރެނީ ބަލިޖެހިފައިވާ މީހެއްގެ ލޭ ނުވަތަ ހޮޑު ފަދަ ހަށިގަނޑުން ބޭރުވާ ދިޔާ އެއްޗެއްގައި ޖެހުމުގެ ސަބަބުންނެވެ.
މިދިޔަ މޭ މަހުން ފެށިގެން ޑީއާރު ކޮންގޯގައި ފެތުރެމުންދަނީ އެބޯލާގެ ބާވަތެއް ކަމަށްވާ "ބަންޑިބުގްޔޯ" އެވެ. މިއީ ވަރަށް މަދުން ނޫނީ ނުފެންނަ ބާވަތެއް ކަމަށްވާއިރު، މިއަށް ޚާއްސަ ވެކްސިނެއް ނުވަތަ ފަރުވާއެއް އަދި ރަސްމީކޮށް ފާސްކޮށްފައެއް ނުވެ އެވެ. ނަމަވެސް މި ބައްޔަށް ފަރުވާ ހޯދުމުގެ ކްލިނިކަލް ޓްރަޔަލްތައް މިހާރު ދަނީ ކުރިއަށް ގެންދަމުންނެވެ.
