ޑިމޮކްރެޓިކް ރިޕަބްލިކް އޮފް ކޮންގޯގެ އިރުއުތުރުގައި ހަލުވިކަމާއެކު ފެތުރެމުންދާ އެބޯލާ ބަލީގައި މަރުވި މީހުންގެ އަދަދު 3،000 އަށްވުރެ މައްޗަށް އަރާފައިވާކަން އެ ގައުމުގެ ސަރުކާރުން ބުދަ ދުވަހު އާންމުކުރި ތަފާސްހިސާބުތަކުން ދައްކައިފި އެވެ.
އެބޯލާގެ "ބަންޑިބުގްޔޯ" ވައިރަހުގެ ސަބަބުން ފެތުރެމުންދާ މި ބަލިމަޑުކަމަކީ ކޮންގޯގެ ތާރީހުގައި ވެސް މިހާތަނަށް ފެތުރުނު އެންމެ ބޮޑު އަދި އެންމެ ގިނަ މީހުން މަރުވި ބަލިމަޑުކަމެވެ.
މި ބަލިމަޑުކަމަކީ މުޅި ދުނިޔޭގެ ތާރީހަށް ބަލާއިރު ވެސް ދެވަނައަށް އެންމެ ނުރައްކާތެރި އެބޯލާ އައުޓްބްރޭކެވެ. އެންމެ ނުރައްކާތެރި ބަލިމަޑުކަމެއްގެ ގޮތުގައި ރެކޯޑު ކުރެވިފައިވަނީ 2014 އިން 2016 އަށް ހުޅަނގު އެފްރިކާގެ ގިނީ، ލައިބީރިއާ އަދި ސިއެރަ ލިއޯންގައި ފެތުރުނު ބަލިމަޑުކަމެވެ. އެ ފަހަރު 28،600 އަށްވުރެ ގިނަ މީހުންނަށް ބަލިޖެހި، 11،000 އަށްވުރެ ގިނަ މީހުން މަރުވި އެވެ.
ސަރުކާރުގެ ތަފާސްހިސާބުތަކުން ދައްކާ ގޮތުގައި، މިހާތަނަށް މި ބަލީގައި މަރުވި މީހުންގެ އަދަދު ވަނީ 3،007 އަށް އަރާފަ އެވެ. އަދި ބަލިޖެހިފައިވާކަން ކަށަވަރުވި މީހުންގެ އަދަދު ވަނީ 6،186 އަށް އަރާފަ އެވެ.
ކޮންގޯގެ އިޓޫރީ ޕްރޮވިންސްގައި މި ބަލިމަޑުކަން އުޅޭކަން ރަސްމީކޮށް އިއުލާންކުރީ މިއަހަރުގެ މޭ މަހުގެ 15 ވަނަ ދުވަހު އެވެ. ނަމަވެސް، ސިއްހީ މާހިރުންނާއި އޮފިޝަލުން ލަފާކުރާ ގޮތުގައި މި ބަލިމަޑުކަން ފެށިފައިވަނީ މިއަހަރުގެ ޖެނުއަރީ މަހުގެ ކުރީކޮޅުގަ އެވެ.
ކޮންގޯގެ ކަމާބެހޭ އިދާރާތަކާއި، ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އަދި އެހީދޭ ޖަމާއަތްތަކުން ބަލި ކޮންޓްރޯލް ކުރުމަށް ގިނަ މަސައްކަތްތަކެއް ކުރަމުންދިޔަ ނަމަވެސް، މިހާރު މި ބަލި ވަނީ އެ ގައުމުގެ ހަ ޕްރޮވިންސަކަށް ފެތުރިފަ އެވެ.
ސިއްހީ މާހިރުން ފާހަގަކުރާ ގޮތުގައި، ބަލި މީހުން ދެނެގަތުމާއި އަވަސް ފަރުވާ ދިނުމަށް ހުރި އެންމެ ބޮޑު ހުރަހަކީ ބަލި މޮނިޓާ ކުރާނެ ހަރުދަނާ ނިޒާމެއް ނެތުމާއި، ސަލާމަތީ ނުރައްކާތަކުގެ އިތުރުން އާންމުންގެ މެދުގައި އޮތް ނުތަނަވަސްކަމާއި ދެކޮޅުވެރިކަމެވެ.
ދުނިޔޭގެ ސިއްހަތު ޖަމިއްޔާއިން އަންދާޒާކުރާ ގޮތުގައި، މި ބަލީގައި މަރުވާ މީހުންގެ 60 އިންސައްތަ މަރުވަނީ ފަރުވާދޭ މަރުކަޒުތަކުން ބޭރުގަ އެވެ. މިއީ ބަލި މީހާ މަރުވުމުގެ ކުރިން ބަލި ދެނެގަތުމުގައި ކުރިމަތިވާ ގޮންޖެހުންތައް ހާމަކޮށްދޭ ކަމެކެވެ.
އެބޯލާގެ "ބަންޑިބުގްޔޯ" ވައްތަރަށް މިހާތަނަށް އެއްވެސް ވެކްސިނެއް ނުވަތަ ފަރުވާއެއް ރަސްމީކޮށް ފާސްކޮށްފައި ނުވި ނަމަވެސް، އޮކްސްފޯޑް ޔުނިވާސިޓީ އާއި އިންޓަނޭޝަނަލް އެއިޑްސް ވެކްސިން އިނީޝިއޭޓިވް (އައިއޭވީއައި) އިން ދަނީ ބައެއް ވެކްސިންތައް ތަރައްގީ ކުރަމުންނެވެ.
ކޮންގޯގެ ކަމާބެހޭ ފަރާތްތަކުން މިހާރު ވަނީ ބަލީގެ ކުރީ ސަފުގައި މަސައްކަތްކުރާ ސިއްހީ އެހީތެރިންނަށް މާކް ކުންފުނީގެ "އާވީބޯ" ވެކްސިން ދޭން ފަށާފަ އެވެ. މިއީ އެބޯލާގެ "ޒައިރޭ" ވައްތަރަށް އުފައްދާފައިވާ ވެކްސިނެއް ނަމަވެސް، މީގެ ސަބަބުން "ބަންޑިބުގްޔޯ" ވައްތަރާ ދެކޮޅަށް ވެސް ކޮންމެވެސް ވަރެއްގެ ރައްކާތެރިކަމެއް ލިބޭނެ ކަމަށް ބެލެވެ އެވެ.
