ޑިމޮކްރެޓިކް ރިޕަބްލިކް އޮފް ކޮންގޯގައި ހަލުވިކަމާއެކު ފެތުރެމުންދާ އެބޯލާ ބަލި ޖެހިފައިވާ މީހުންގެ އަދަދު 5،000 އަށް ވުރެ މައްޗަށް އަރާފައިވާކަން އެ ގައުމުގެ ސަރުކާރުގެ ތަފާސްހިސާބުތަކުން ދައްކައިފި އެވެ.
ސިއްހީ މާހިރުން އިންޒާރު ދޭ ގޮތުގައި، ފުރާނައަށް ނުރައްކާތެރި މި ބަލި ކޮންޓްރޯލް ކުރުމަށް ކުރަމުންދާ މަސައްކަތްތަކުން އެދެވޭ ނަތީޖާއެއް ނުފެނެ އެވެ.
ކޮންގޯގައި މިހާތަނަށް ފެތުރުނު އެބޯލާގެ 17 ވަނަ ރޯގާއަކީ، ބަލިޖެހުނު މީހުންގެ އަދަދަށް ބަލާއިރު އެ ގައުމުގެ ތާރީޚުގައި ވެސް މިހާތަނަށް ކުރިމަތިވި އެންމެ ބޮޑު ރޯގާ އެވެ.
އެ ގައުމުގެ ޕަބްލިކް ހެލްތު އިންސްޓިޓިއުޓުން ހާމަކުރި ގޮތުގައި، މިދިޔަ ހަފުތާ ބަންދުގައި މި ބަލީގައި މަރުވި މީހުންގެ އަދަދު ވަނީ 2،378 އަށް އަރާފަ އެވެ.
ޕަބްލިކް ހެލްތު އިންސްޓިޓިއުޓްގެ އެންމެ ފަހުގެ ރިޕޯޓްތައް ދައްކާ ގޮތުން، މިހާތަނަށް އެބޯލާ ޖެހިފައިވާ 5،021 ކޭސް ވަނީ ރެކޯޑު ކުރެވިފަ އެވެ.
މިއީ މުޅި ދުނިޔޭގެ ތާރީޚަށް ބަލާއިރު ވެސް، ބަލިޖެހުނު މީހުންނާއި މަރުވި މީހުންގެ އަދަދަށް ބަލާއިރު ދެވަނައަށް އެންމެ ނުރައްކާތެރި އައުޓްބްރޭކެވެ. މީގެ ކުރިން އެންމެ ގޯސް ހާލަތެއް ކުރިމަތިވީ 2014 އާއި 2016 އާ ދެމެދު ހުޅަނގު އެފްރިކާގައި ފެތުރުނު އެބޯލާ ރޯގާގަ އެވެ.
މިހާރު ފެތުރެމުންދާ ރޯގާއަކީ އެބޯލާގެ "ބަންޑިބުގްޔޯ" ވައްތަރުގެ ސަބަބުން ފެތުރޭ ރޯގާއެކެވެ. މި ވައްތަރުގެ އެބޯލާއަށް މިހާތަނަށް އެއްވެސް ވެކްސިނެއް ނުވަތަ ފަރުވާއެއް ރަސްމީކޮށް ހުއްދަކުރެވިފައެއް ނުވެ އެވެ.
މިދިޔަ މެއި މަހުގެ 15 ވަނަ ދުވަހު މި ރޯގާ ފެތުރެން ފެށި ފަހުން، ބަލިޖެހޭ މީހުންގެ އަދަދު ދަނީ އިތުރުވަމުންނެވެ. ބަލި ކޮންޓްރޯލް ކުރުމަށް ހުރަސްއެޅޭ މައިގަނޑު ސަބަބުތަކުގެ ތެރޭގައި، އެ ގައުމުގެ ސިއްހީ ނިޒާމު ބަލިކަށިވުމާއި، އާންމުންގެ ފަރާތުން އެއްބާރުލުން ނުލިބުމާއި، ގައުމުގެ ހަމަނުޖެހުންތަކުގެ އިތުރުން، ބަލި ކޮންޓްރޯލް ކުރުމުގައި މަސައްކަތްކުރާ މުވައްޒަފުން ކުރަމުންދާ އިހުތިޖާޖުތައް ހިމެނެ އެވެ.
