އިންޑިއާގެ ކެމިކަލް އުފައްދާ އެންމެ ބޮޑު އެއް ކުންފުނި ކަމަށްވާ ޓާޓާ ކެމިކަލްސް އިން ކެންޔާގެ އިގްތިސާދަށް އެކަށީގެންވާ ކުރިއެރުމެއް ނުގުނެސްދޭ ކަމަށް ބުނެ، އެ ގައުމުން އެ ކުންފުނި ބޭރުކުރުމަށް ކެންޔާ ސަރުކާރުން ނިންމައިފި އެވެ.
ކެންޔާގެ ރައީސް ވިލިއަމް ރޫޓޯ ވަނީ އެ ކުންފުނީގެ މަސައްކަތްތައް ހުއްޓާލައި ގައުމުން ފޭބުމަށް އަންގަވާފަ އެވެ. ރައީސް ވިދާޅުވީ، ޓާޓާ ކެމިކަލްސް އިން ކެންޔާގައި ބިއްލޫރި އާއި ކެމިކަލް އުފެއްދުމުގެ ބަދަލުގައި، އެ ގައުމުން ނަގާ ސޯޑާ އޭޝް (ސޯޑިއަމް ކާބޮނޭޓް) އެ ގޮތުގައި ބޭރު ގައުމުތަކަށް އެކްސްޕޯޓް ކުރަމުންދާ ކަމަށެވެ.
ރައީސް ރޫޓޯ އިތުރަށް ވިދާޅުވީ، ކެންޔާގެ ރައްޔިތުންނަށް އިތުރު ވަޒީފާގެ ފުރުސަތުތަކާއި އިންވެސްޓްމަންޓްތައް ހޯދައިދިނުމުގެ މަގްސަދުގައި، އެ ކުންފުނީގެ މަސައްކަތްތަކާ ހަވާލުވާނެ އާ އިންވެސްޓަރުން ސަރުކާރުން މިހާރު ހޯދާފައިވާ ކަމަށެވެ.
މި ނިންމުމާ ގުޅިގެން ޓާޓާ ކެމިކަލްސް އިން ބުނީ ސަރުކާރުގެ ނިންމުމަށް އިހުތިރާމް ކުރާ ކަމަށާއި، މި މައްސަލައިގައި ހުރި ކަންބޮޑުވުންތައް ހައްލުކުރުމަށް ގާނޫނީ އަދި ރެގިއުލޭޓަރީ އުސޫލުތަކުގެ ތެރެއިން ސަރުކާރާއެކު މަޝްވަރާ ކުރުމަށް ތައްޔާރަށް އޮތް ކަމަށެވެ.
ރައީސް ރޫޓޯ މި މޭރުމުން ވާހަކަދެއްކެވީ ޓާޓާ ކެމިކަލްސް މަގާޑީގެ ޕްލާންޓް ހުންނަ ކަޖިއާޑޯ ކައުންޓީއަށް ކުރެއްވި ޒިޔާރަތެއްގަ އެވެ.
އިންޑިއާގެ މަޝްހޫރު ޓާޓާ ގްރޫޕްގެ ދަށުން ހިންގާ މި ކުންފުނިން މަސައްކަތް ކުރަނީ ކެންޔާގެ ވެރިރަށް ނައިރޯބީގެ ހުޅަނގު ދެކުނުން ގާތްގަނޑަކަށް 120 ކިލޯމީޓަރު ދުރުގައި އޮންނަ ލޭކް މަގާޑީގަ އެވެ. އެ ކުންފުނިން އަހަރަކު 350,000 އަށް ވުރެ ގިނަ ޓަނުގެ ސޯޑާ އޭޝް އިންޑިއާ، ދެކުނު އިރުމަތީ އޭޝިއާ، މެދުއިރުމަތި އަދި އެފްރިކާގެ އެކި ގައުމުތަކަށް އެކްސްޕޯޓް ކުރެ އެވެ.
ޔޫއެސް ޖިއޮލޮޖިކަލް ސާވޭގެ ތަފާސްހިސާބުތައް ދައްކާ ގޮތުން، ކެންޔާއަކީ ދުނިޔޭގައި ހަތަރުވަނައަށް އެންމެ ގިނައިން ގުދުރަތީ ސޯޑާ އޭޝް އުފައްދާ ގައުމެވެ.
ސޯޑާ އޭޝް އަކީ ބިއްލޫރި، ކެމިކަލް، ބެޓެރި އަދި ސިނާއީ އެކި އުފެއްދުންތަކުގައި ބޭނުންކުރާ މުހިންމު މާއްދާއެކެވެ.
ޓާޓާ ކެމިކަލްސް އަކީ ކެންޔާއިން އެންމެ ގިނައިން މިނަރަލް އެކްސްޕޯޓް ކުރާ އެއް ކުންފުނީގެ އިތުރުން، މުޅި އެފްރިކާގައި ވެސް ސޯޑާ އޭޝް އުފައްދާ އެންމެ ބޮޑު ކުންފުންޏެވެ.
އެ ކުންފުނީގެ ވެބްސައިޓުގައިވާ ގޮތުން، ލޭކް މަގާޑީން ޓްރޯނާ ނަގައިގެން އެ ކުންފުނިން ސޯޑާ އޭޝް އުފައްދަ އެވެ. މިއީ ބިއްލޫރި އުފެއްދުމުގެ އިތުރުން، ދޮންނަ ކުނޑި، ކެމިކަލް، ފެން ސާފުކުރުން، ފޭރާން އަދި ކަރުދާސް އުފެއްދުމުގައި ބޭނުންކުރާ މުހިންމު ބާވަތެކެވެ.
2024 ވަނަ އަހަރުގެ ހިސާބުތައް ދައްކާ ގޮތުން، އެ ކުންފުނިން 245,000 ޓަނުގެ ސޯޑާ އޭޝް ވިއްކައިގެން 78.7 މިލިއަން ޑޮލަރުގެ އާމްދަނީއެއް ހޯދާފައިވެ އެވެ.
މި ކުންފުނީގައި ގާތްގަނޑަކަށް 500 މުވައްޒަފުން މަސައްކަތް ކުރާއިރު، މަގާޑީ ސަރަހައްދުގެ 30,000 އެއްހާ މީހުންނަށް ފެނާއި، ސިއްހީ ހިދުމަތާއި، ތައުލީމާއި، އުމްރާނީ ތަރައްގީގެ ދާއިރާއިން އެހީތެރިކަން ފޯރުކޮށްދޭ ކަމަށް ކުންފުނިން ބުނެ އެވެ.
