ދުނިޔޭގެ އެންމެ ހަގު ރަސްގެފާނުގެ ގޮތުގައި މަޝްހޫރުވެފައިވާ ޔުގެންޑާގެ ރަސްކަލަކު އުމުރުފުޅުން 34 އަހަރުގައި އަވަހާރަވެއްޖެ ކަމަށް އެ ގައުމުގެ ބޮޑުވަޒީރު އިއުލާން ކުރައްވައިފި އެވެ.
ޔުގެންޑާގެ ހުޅަނގުގައި އޮންނަ ޓޫރޯ ސަރަހައްދުގެ ރަސްކަމުގެ ތަހުތަށް އޮޔޯ ނިއިމްބާ ކަބަމްބާ އިގުރު ރުކިޑީ ހަތަރު ވަނަ އިސްވެވަޑައިގަތީ 1995 ވަނަ އަހަރު އޭނާގެ ބައްޕާފުޅު އަވަހާރަވުމާ ގުޅިގެން، އުމުރުފުޅުން އެންމެ ތިން އަހަރުގަ އެވެ.
ރަސްގެފާނު އޮޔޯ އަވަހާރަވި ސަބަބެއް ޓޫރޯ ރަސްކަމުގެ ފަރާތުން ހާމަކޮށްފައެއް ނުވެ އެވެ. ނަމަވެސް، އެމަނިކުފާނު ވަރަށް ބޮޑަށް އާލާސްކަންފުޅާ އުޅުއްވުމަށްފަހު އެމެރިކާއިން ފަރުވާ ހޯއްދަވަމުން ގެންދެވި ކަމަށް ޔުގެންޑާ ސަރުކާރުގެ ވަޒީރަކާ ހަވާލާދީ އެ ގައުމުގެ މީޑިއާތަކުން ރިޕޯޓުކޮށްފައިވެ އެވެ.
ޔުގެންޑާއަކީ އިންތިހާބުކޮށްފައިވާ ރައީސަކާއި ޕާލަމެންޓަކުން ހިންގާ ގައުމަކަށް ވީނަމަވެސް، ސިޔާސީ ބާރުތަކެއް ނެތް، އެކަމަކު ސަގާފީ ގޮތުން ބޮޑު ނުފޫޒެއް އޮންނަ ބައެއް ރަސްކަންތައް އެ ގައުމުގައި ދެމިއޮވެ އެވެ.
ގިނިސް ވޯލްޑް ރެކޯޑްސްއިން ދުނިޔޭގެ އެންމެ ހަގު ރަސްގެފާނުގެ ގޮތުގައި ކަނޑައަޅާފައިވާ އޮޔޯ ވަނީ ދެ މިލިއަނަށް ވުރެ ގިނަ މީހުންގެ މައްޗަށް ރަސްކަން ކުރައްވާފަ އެވެ. އެއީ 19 ވަނަ ގަރުނުގެ ކުރީކޮޅު އުފެދުނު އެ ރަސްކަމުގެ 13 ވަނަ ރަސްކަލެވެ.
އޮޔޯ އަވަހާރަވިކަން އިއުލާން ކުރައްވަމުން ޓޫރޯގެ ބޮޑުވަޒީރު ކެލްވިން އާމްސްޓްރޯންގް ރްވޮމީރޭ އަކީކީ ވިދާޅުވީ، މިދިޔަ ބުރާސްފަތި ދުވަހު އެމަނިކުފާނު އަވަހާރަވުމަކީ ރަސްކަމުގެ އާއިލާއަށާއި ޓޫރޯގެ ރައްޔިތުންނަށް ލިބުނު "އަގުނުކުރެވޭ ފަދަ ބޮޑު ގެއްލުމެއް" ކަމަށެވެ.
ޓޫރޯގެ ރަސްކަމަކީ އާއިލީ ތަރުތީބުން ވާރުތަވާ އުސޫލުން ރަސްކަލަކު ކަނޑައަޅާ ނިޒާމެކެވެ.
އޮޔޯ ރަސްމީކޮށް ކައިވެންޏެއް ބައްލަވައިގެންފައި ނުވި ނަމަވެސް، ރަސްކަމުގެ ސިލްސިލާ މެދުނުކެނޑި ކުރިއަށްދާނެ ކަމުގެ ޔަގީންކަން ބޮޑުވަޒީރު އަކީކީ ވަނީ ދެއްވާފަ އެވެ.
އޮޔޯ 1995 ވަނަ އަހަރު ރަސްކަމަށް އިސްވެވަޑައިގަތްއިރު، އުމުރުން 18 އަހަރު ފުރި ރަސްމީކޮށް ތަހުތަށް އިސްކުރުމުގެ ރަސްމިއްޔާތު ބޭއްވުމާ ހަމައަށް ރަސްކަން ހިންގުމަށްޓަކައި ރާނީ (މަންމާފުޅު) ހިމެނޭ ގޮތަށް ވަގުތީ ކައުންސިލެއް އެކުލަވާލާފައިވެ އެވެ.
ޒުވާން ރަސްގެފާނަކީ ރައްޔިތުންގެ އިހުތިރާމް ލިބިވަޑައިގެންފައިވާ ބޭފުޅެކެވެ. "ޑެއިލީ މޮނިޓާ" ނޫހުން ރިޕޯޓުކޮށްފައިވާ ގޮތުގައި އެމަނިކުފާނު ވަނީ ޒުވާނުން ބާރުވެރިކުރުވުމާއި، ތައުލީމާއި، މޫސުމަށް އަންނަ ބަދަލުތަކުން ތިމާވެށި ހިމާޔަތްކުރުމުގެ އިތުރުން އެޗްއައިވީ/އެއިޑްސްއަށް ހޭލުންތެރިކަން އިތުރުކުރުން ފަދަ ކަންކަމަށް ވަރަށް ބޮޑަށް ބާރުއަޅުއްވާފަ އެވެ.
