ޑިމޮކްރެޓިކް ރިޕަބްލިކް އޮފް ކޮންގޯގައި އެބޯލާ ވައިރަސް ޖެހިފައިވާ މީހުންގެ އަދަދު 7،000 އަށްވުރެ މައްޗަށް އަރައި، އެ ގައުމުގެ އާ ޕްރޮވިންސަކަށް ބަލި ފެތުރިފައިވާކަން ސަރުކާރުގެ ތަފާސްހިސާބުތަކުން ހުކުރު ދުވަހު ހާމަވެއްޖެ އެވެ.
އެބޯލާގެ "ބަންޑިބުގްޔޯ" ވައްތަރުގެ ސަބަބުން ފެތުރެމުންދާ މި ބަލިމަޑުކަމަކީ، 2018 އިން 2020 އަށް އެ ގައުމުގައި ފެތުރުނު ބަލިމަޑުކަމަށްވުރެ ބޮޑު އަދި ނުރައްކާތެރި ބަލިމަޑުކަމެކެވެ. މިއީ ކޮންގޯގެ ތާރީޚުގައި ވެސް މިހާތަނަށް ކުރިމަތިވި އެންމެ ނުރައްކާތެރި އައުޓްބްރޭކެވެ.
މިހާރު މިއީ ދުނިޔޭގެ ތާރީޚުގައި ވެސް ދެވަނައަށް އެންމެ ބޮޑު އެބޯލާ އައުޓްބްރޭކެވެ. މީގެ ކުރިން 2014 އިން 2016 އަށް ހުޅަނގު އެފްރިކާގެ ގިނީ، ލައިބީރިއާ އަދި ސިއެރާ ލިއޯންގައި ފެތުރުނު ބަލިމަޑުކަމުގައި 28،600 އަށްވުރެ ގިނަ މީހުންނަށް ބަލިޖެހި، 11،000 އަށްވުރެ ގިނަ މީހުން މަރުވި އެވެ.
ސަރުކާރުގެ ތަފާސްހިސާބުތަކުން ހުކުރު ދުވަހުގެ ރޭ ދެއްކި ގޮތުގައި، ކޮންގޯގެ ހަތް ޕްރޮވިންސަކުން ބަލި ޖެހުނު މީހުންގެ އަދަދު ވަނީ 7،022 އަށް އަރާފަ އެވެ. އަދި މި ބަލީގައި މަރުވި މީހުންގެ އަދަދު ވަނީ 3،398 އަށް އުފުލިފަ އެވެ.
އެބޯލާ އެންމެ ބޮޑަށް ފެތުރެމުންދާ ސަރަހައްދާ ދުރުގައި އޮންނަ، ކޮންގޯގެ ހުޅަނގު އުތުރުގެ ސައުތު އުބަންގީ ޕްރޮވިންސުން ވެސް މިހާރު އެބޯލާގެ ކޭހެއް ފެނިފައިވާ ކަމަށް އޮފިޝަލުން ވިދާޅުވި އެވެ.
އޮފިޝަލުން ވިދާޅުވި ގޮތުގައި، މިދިޔަ އަންގާރަ ދުވަހު މަރުވި އުމުރުން 23 އަހަރުގެ ފިރިހެނަކު ޓެސްޓު ކުރިއިރު، އޭނާ ވަނީ "ބަންޑިބުގްޔޯ" ވައްތަރުގެ އެބޯލާ އަށް ޕޮޒިޓިވް ވެފައެވެ.
އޭނާ ކޮންގޯގެ އިރުމަތީގައި އޮންނަ ސައުތު ކީވޫ ޕްރޮވިންސުން ފުރައިގެން ދިޔައީ ޖުލައި 10 ވަނަ ދުވަހު އެވެ. އަދި ގައުމުން ބޭރުގައި ދުވަސްތަކެއް ހޭދަކުރުމަށްފަހު، އަނބުރާ ކޮންގޯއަށް އައިސް އޭނާ ދިޔައީ ކޮންގޯ ރިޕަބްލިކް އަދި ސެންޓްރަލް އެފްރިކަން ރިޕަބްލިކާ ބޯޑަރު ހިއްސާކުރާ ސައުތު އުބަންގީ ޕްރޮވިންސަށެވެ.
ކޮންގޯގެ ޕަބްލިކް ހެލްތު އިންސްޓިޓިއުޓުން ނެރުނު އެންމެ ފަހުގެ ރިޕޯޓުގައި ބުނެފައިވަނީ، ސައުތު އުބަންގީ ޕްރޮވިންސުން ފެނުނު ފުރަތަމަ ކޭހާ ގުޅިގެން، އެ މީހާއާ ބައްދަލުވި މީހުން ދެނެގަތުމުގެ މަސައްކަތް (ކޮންޓެކްޓް ޓްރޭސިން) މިހާރު ކުރިއަށްދާ ކަމަށެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނި ގޮތުގައި، އެބޯލާ ފެތުރޭ ސަރަހައްދުތައް އިތުރުވަމުންދާއިރު، ތަމްރީނު ލިބިފައިވާ މުވައްޒަފުންނާއި، އެހީތެރިވާނެ ބައިވެރިން އަދި ބޭނުންވާ ފައިސާ ނެތުމުގެ ސަބަބުން ބަލި ކޮންޓްރޯލް ކުރުމުގެ މަސައްކަތްތަކަށް ވަނީ ބޮޑެތި ހުރަސްތަކެއް ކުރިމަތިވެފަ އެވެ.
