ޔުގެންޑާގެ ތޫރޯ ރަސްކަމުގެ ތަޚުތަށް ވަޑައިގަތުމަށް ތައްޔާރުވަމުންދާ ޕްރިންސް އެޑްވަޑް ރުކީޑީ ކިޖަނަންގޯމާ ނިއަބޮންގޯ ދެވަނައަކީ އެ ގައުމުގެ ރައްޔިތުންނަށް ވަރަށް ބޮޑަށް ފަރިތަ މޫނެކެވެ.
ޔުގެންޑާގެ ގިނަ ބަޔަކަށް އޭނާ ކުރިން އެނގިފައިވަނީ ތަޚުތުގެ ވާރިސެއްގެ ގޮތުގައެއް ނޫނެވެ. އޭގެ ބަދަލުގައި އޭނާ މަޝްހޫރުވެފައިވަނީ އެ ގައުމުގެ ދައުލަތުގެ މީޑިއާގައި ގިނަ ދުވަސްތަކެއް ވަންދެން މަސައްކަތް ކުރެއްވި ނިއުސް އެންކަރެއް އަދި އެޑިޓަރެއްގެ ގޮތުގަ އެވެ.
ނަމަވެސް، އުމުރުން 56 އަހަރުގެ ކިޖަނަންގޯމާ މިހާރު ވެފައިވަނީ މީޑިއާގެ ސަމާލުކަން އެންމެ ބޮޑަށް ހުއްޓިފައިވާ ފަރާތަށެވެ. އޭނާ ތޫރޯގެ ރަސްކަމަށް ވަޑައިގަތުމަށް ނިންމި ނިންމުމާއެކު ބޮޑެތި ބަހުސްތަކެއް އުފެދި، ޔުގެންޑާގެ ބޭރުގައި ވެސް މިކަމަށް ބޮޑު ސަމާލުކަމެއް ވަނީ ލިބިފަ އެވެ.
ތޫރޯއަކީ ޔުގެންޑާގައި ރަސްމީކޮށް ބަލައިގަންނަ ތާރީޚީ ހަތަރު ރަސްކަމުގެ ތެރެއިން އެއް ރަސްކަމެވެ. ވޭތުވެދިޔަ 31 އަހަރު އެ ރަސްކަމުގެ އިސްވެރިއަކަށް ހުންނެވީ ކިންގް އޯޔޯ ނިއިމްބާ ކަބަމްބާ އިގުރު ރުކީޑީ އެވެ. އޭނާ ތަޚުތަށް އިސްވެވަޑައިގަތީ ތުއްޕުޅުއިރު ކަމަށްވާތީ، އޭނާ މަޝްހޫރުވެފައިވަނީ "ކުޑަކުދިންގެ ރަސްގެފާނު" ގެ ނަމުންނެވެ.
ބައްޕާފުޅު އަވަހާރަވުމާ ގުޅިގެން، 1995 ވަނަ އަހަރު އޯޔޯ ރަސްކަމަށް އިސްވެވަޑައިގަތީ އުމުރުން އެންމެ ތިން އަހަރުގަ އެވެ. އެ ދުވަސްވަރު ދުނިޔޭގައި ހުންނެވި އެންމެ ހަގު ރަސްގެފާނުގެ ގޮތުގައި ފާހަގަކުރެވުނު އޯޔޯ، މިދިޔަ މަހު ކެންސަރު ބަލީގައި އަވަހާރަވިއިރު އުމުރަކީ 34 އަހަރެވެ.
ރަސްކަމަށް އިސްކުރުމުގެ ރަސްމިއްޔާތަކީ މެންދަމުން ފެށިގެން ސަގާފީ ހަރަކާތްތަކާއެކު ކުރިއަށްދާ ވަރަށް ކުލަގަދަ އުފާފާޅުކުރުމެކެވެ. އާ ރަސްގެފާނު ރަސްމީކޮށް ތަޚުތަށް އިސްވުމަށްޓަކައި، ގާތްގަނޑަކަށް ހަތަރު ކިލޯމީޓަރު (2.5 މޭލު) އަށް ހިނގާފައި ރަސްމީ ކަރޫޒީކާ ގަނޑުވަރަށް ވަޑައިގަންނަވަން ޖެހެ އެވެ.
ނަމަވެސް، ކިޖަނަންގޯމާ ރަސްކަމަށް ހޮވުމުގެ މަރުހަލާ ދިޔައީ އެހާ އޮމާންކޮށެއް ނޫނެވެ.
ސަގާފީ އުސޫލުތައް ބުނާގޮތުން، އަވަހާރަވި ރަސްގެފާނުގެ މަގާމަށް ވަޑައިގަންނަވަން ޖެހޭނީ އެ ރަސްގެފާނުގެ ފިރިހެން ދަރިކަލެކެވެ. ޝާހީ އާއިލާގެ ގާތް ބޭފުޅުން ވިދާޅުވާ ގޮތުގައި، އަވަހާރަވި ރަސްގެފާނު އޯޔޯ ވަނީ އޭނާގެ ތުއްޕުޅު ފިރިހެން ދަރިކަލަކު ތަޚުތަށް އިސްކުރުމަށް ވަސިއްޔަތް ކުރައްވާފަ އެވެ.
އެހެންނަމަވެސް، އެމެރިކާގެ ޓެކްސަސްގައި އުޅުއްވާ އެ ދަރިކަލަކީ ކޮބައިކަން މިހާތަނަށް އާންމުކޮށް ހާމަކޮށްފައެއް ނުވެ އެވެ. އަދި ރަސްގެފާނު ހޮވުމުގެ ޒިންމާ އޮންނަ ބަބީޓޯ ދަރިކޮޅުގެ 21 މެންބަރުންގެ ކޮމިޓީން ވެސް އެ ދަރިކަލަކު ބަލައިގެންފައެއް ނުވެ އެވެ. އެ ކޮމިޓީން އެންމެ ފަހުން ނިންމީ ކިޖަނަންގޯމާ ރަސްކަމަށް އިސްކުރުމަށެވެ.
އެހެންނަމަވެސް، އޯޔޯގެ މަންމާފުޅު ކުއީން ބެސްޓް ކެމިގީސާ ވަކާލާތު ކުރައްވަނީ އަވަހާރަވި ރަސްގެފާނުގެ ވަސިއްޔަތަށް އިހުތިރާމް ކުރަންޖެހޭނެ ކަމަށެވެ.
ރަސްކަމުގެ ވާރިސުން ކަނޑައަޅާ ކޮމިޓީން ވަނީ އޭނާގެ އެދުމަށް ފުރަގަސްދީފަ އެވެ. އެ ކޮމިޓީން ބުނާ ގޮތުގައި ރަސްގެފާނު ހޮވުމުގެ މަރުހަލާ ކުރިއަށް ގެންގޮސްފައިވަނީ ތޫރޯގެ އާދަކާދަތަކާއި ސަގާފަތާ އެއްގޮތްވާ ގޮތުގެ މަތިންނެވެ.
