ޓޫރިޒަމް ވިޔަފާރިތަކުން ޓެކްސް ނަގާ ގޮތް ބަދަލުކޮށް، ރާއްޖޭގެ ޓޫރިޒަމް ޕްރޮޑަކްޓުތައް ވިއްކާ ބޭރުގެ ވިިޔަފާރިތަކުން ވެސް ޓީޖީއެސްޓީ ދައްކަން ޖެހޭ ގޮތަށް ގެނައި ބަދަލުތަކުން ރަޝިއާގެ ޓުއާ އޮޕަރޭޓަރުންނާއި ޓްރެވަލް އެޖެންސީތައް އިސްތިސްނާކޮށްދޭން ރަޝިއާ ޓްރެވަލް ޔޫނިއަން (އާރުއެސްޓީ) އިން ދިވެހި ސަރުކާރުގައި އެދިއްޖެ އެވެ.
ރާއްޖެއަށް އެންމެ ގިނައިން ޓޫރިސްޓުން އަންނަ އެއް ގައުމު ކަމުގައިވާ ރަޝިއާގެ ހޮޓެލް ޗެއިންތައް ހިމެނޭހެން ޓޫރިޒަމް ސިނާއަތުގެ 3000 އަށް ވުރެ ގިނަ ވިޔަފާރި ތަމްސީލުކުރާ އާރުއެސްޓީން މި ކަމަށް އެދުނީ ޓޫރިޒަމް މިނިސްޓަރު މުހައްމަދު އަމީންއަށް އެޑްރެސްކޮށް، ފޮނުވި ސިޓީއެއްގައި އެވެ.
އާރުއެސްޓީގެ ސިޓީގައި އެ މީހުން ބުނީ، އެންމެ ބޮޑު ކަންބޮޑުވުމަކީ ރާއްޖޭގެ ޕްރޮޑަކްޓުތައް ވިއްކާއިރު އެ މީހުން ނަގާ އަގުން ޓެކްސް ދައްކަން ޖެހުން ކަމަށެވެ. އެ ޖަމިއްޔާއިން ގަބޫލުކުރާ ގޮތުގައި މީގެ މާނައަކީ ރަޝިއާގައި ހިނގާ ވިޔަފާރި ހަރަކާތަކުން ރާއްޖެއަށް ޓެކްސް ދައްކަން ޖެހުމެވެ. އަދި، މިއީ ކުރެވޭނެ ކަމެއް ނޫން ކަމަށް އެ ޖަމިއްޔާއިން ދެކޭ ކަމަށް ބުންޏެވެ.
"އާރުއެސްޓީން ދެކެނީ ރަޝިއާގެ ކުންފުނިތަކަށް މިފަދަ ނިޒާމެއް ތަންފީޒުކުރުމަކީ ގާނޫނީ ގޮތުންނާއި އަމަލީ ގޮތުން ކުރެވޭނެ ކަމެއް ނޫން ކަމަށް،" އެ ޖަމިއްޔާގެ ސިޓީގައިވެ އެވެ.
އާރުއެސްޓީން ބުނީ ރާއްޖޭގެ ޕްރޮޑަކްޓުތައް ގަންނަނީ ރާއްޖޭގައި ނަގާ އެންމެހައި ޓެކްސްތަކާއި ފީތައް ހިމަނައިގެން ކަމަށެވެ. މިހެންކަމުން، އޭގެ ފަހުން އެ މީހުން ރަޝިއާގައި އެ ޕްރޮޑަކްޓު އުފައްދައި، ވިއްކާ، ރީޑިސްޓްރިބިއުޓް ކުރާއިރު، އޭގެން ލިބޭ ފައިދާ (މާޖިން) އަކީ އެ މީހުންގެ ވިޔަފާރި އެވެ. އަދި، މި މުއާމަލާތްތައް ބަލަހައްޓަނީ ރަޝިއާގެ ގާނޫނީ ޝަހުސުތަކުން ތަބާވާން ޖެހޭ ރަޝިއާގެ ޓެކުހާއި އެކައުންޓިން ގާނޫނުތަކުގެ ދަށުންނެވެ.
އެ ގޮތުން، "ޔުނިފައިޑް އިންފޮމޭޝަން ސިސްޓަމް އޮފް އިލެކްޓްރޯނިކް ވައުޗާސް" އާއި ވިއްކުނު ޓޫރިޒަމް ޕްރޮޑަކްޓްތަކުގެ ޖުމްލަ އަގާ ގުޅޭ ރިޕޯޓިން އެ ވިޔަފާރިތަކުން ރަޝިއާގެ އިދާރާތަކަށް ހުށަހަޅަން ޖެހޭ ކަމަށް އެ ޖަމިއްޔާއިން ބުންޏެވެ.
އާރުއެސްޓީން ވަނީ މިހާރު ހުށަހަޅާފައިވާ ގޮތަސް ޓެކްސް ފުރިހަމައަށް ތަންފީޒުކުރަން ރަޝިއާގެ އެތެރޭގައި ހިންގާ ވިޔަފާރި މުއާމަލާތްތަކުގެ މައްޗަށް ބޭރުގެ ޓެކްސް ކޮންޓްރޯލް ނިޒާމެއް އަމަލީ ގޮތުން ހިންގޭނެ އެއްވެސް މަގެއް ނެތް ކަމަށް ވެސް ސިޓީގައި ފާހަގަކޮށްފަ އެވެ.
"މިފަދަ ޓެކްސެއް ފުރިހަމައަށް ތަންފީޒުކުރުމަށްޓަކައި، ރަޝިއާގެ ތެރޭގައި ހިންގާ މުއާމަލާތްތަކާ ގުޅިގެން ރަޝިއާގެ ކުންފުނިތަކުން ހަދާފައިވާ އެއްބަސްވުންތަކާއި، ހަރަދުތަކާއި، ފައިސާ ދެއްކި ލިޔެކިޔުންތަކާއި، އަދި މާލީ ލިޔެކިޔުންތައް ރާއްޖޭގެ ޓެކްސް އިދާރާތަކުން ހޯދައި، އެ ތަކެތި ސައްހަކަން ކަށަވަރުކުރަން ޖެހޭނެ. ރަޝިޔާގެ އެތެރޭގެ ވިޔަފާރީގެ ހަރަކާތްތަކުގެ މައްޗަށް މިފަދަ ބޭރުގެ ޓެކްސް ކޮންޓްރޯލެއް ފޯރުވޭނެ އަމަލީ އެއްވެސް ނިޒާމެއް ނެތް،" އާރުއެސްޓީން ބުންޏެވެ.
މި ކަންކަމުގެ އަލީގައި، އާރުއެސްޓީން ވަނީ ޑެސްޓިނޭޝަން ޕްރިންސިޕަލް އުސޫލުން ޓެކްސް ނެގުމުން ރަޝިއާގެ ވިޔަފާރިތައް އިސްތިސްނާކޮށްދިނުމަށާއި، މިހާރު އުސޫލުތައް އައުމުގެ ކުރިން އެކުލަވާލާފައިވާ އެއްބަސްވުންތަކާއި ވިއްކާފައިވާ ޕްރޮޑަކްޓުތައް އާ އުސޫލުތައް ނުހިނގާނެ ގޮތް ހެދުމަށް އެދިފަ އެވެ. އަދި، ރަޝިއާ މާކެޓަކީ ރާއްޖޭގެެ ޓޫރިޒަމަށް މުހިންމު މާކެޓެއްކަން ފާހަގަކުރަމުން، އާ އުސޫލުތައް ހިންގުމުގެ ކުރިން މި މައްސަލައަށް ހައްލެއް ހޯދަން ދިވެހި ސަރުކާރަށް ގޮވާލާފައިވެ އެވެ.
ބޭރުގެ ވިޔަފާރިތަކުން ޓެކްސް ނަގާ އުސޫލަށް ގެނައި ބަދަލާ ގުޅިގެން، ރަޝިއާގެ އިތުރުން ރާއްޖެއަށް އާންމުކޮށް ޓޫރިސްޓުން އަންނަ ހުޅަނގު ޔޫރަޕު ގައުމުތަކުގެ ޔޫނިއަންތަކުންނާއި އިންޑިއާގެ ޓްރެވަލް ޔޫނިއަނުން ވެސް ވަނީ ކަންބޮޑުވުން ފާޅުކޮށްފަ އެވެ. މިކަމާ ދެކޮޅު ހެދުމުގެ ގޮތުން ބައެއް ވިޔަފާރިތަކުން ވަނީ ރާއްޖެ ވިއްކުން ވެސް ހުއްޓާލާފަ އެވެ.
މި ވިޔަފާރިތަކުން ޓެކްސް ހިސާބުކުރަން ޖެހޭ ފޯމިއުލާގައި އޮތީ ބޭރުގެ ވިޔަފާރިން ޓެކްސް ދައްކަން ޖެެހޭނީ އެ ބަޔަކު އެ ޕްރޮޑަކްޓެއް ވިއްކާ އަގުން ރާއްޖޭގެ ސަޕްލަޔަރަށް ދައްކާ އަގު ކެނޑުމަށް ފަހު ބާކީވާ އަދަދުންނެވެ. މި އަދަދަކީ މިހާރު ވެސް ޓެކްސް ހިމެނޭ އަދަކަށް ވާތީ، މީރާގެ ފޯމިއުލާގައި ވަނީ ޓެކްސް ރޭޓުގައި ޖެހޭ އަދަދު ހިސާބުކުރުމަށް ފަހު، އެ އަދަދު 1.17 އިން ބައިކުރަން އަންގާފަ އެވެ.
