ފޭކް ޓެލެގްރަފިކް ޓްރާންސްފާ (ޓީޓީ) ދައްކައިގެން ބޭރު ކުންފުނިތަކުން މުދާ ގަނެ ރާއްޖެ އެތެރެކޮށް ވިޔަފާރި ކުރި މައްސަލައިގައި 109 އަހަރަށް ޖަލަށްލައި ހަތް މިލިއަން ރުފިޔާއިން ޖޫރިމަނާކޮށްފައިވާ ހަސަން ޝިފާއު ގޭބަންދަށް ބަދަލުކޮށްފި އެވެ.
މޯލްޑިވްސް ކަރެކްޝަނަލް ސާވިސް އިން ބުނީ ޝިފާއު ގޭބަންދަށް ބަދަލުކުރީ ސިއްހީ ހާލަތާ ގުޅޭ ކަމެއްގައި ވަގުތީ ގޮތުން ކަމަށެވެ. ނަމަވެސް އެކަމާ ގުޅޭ އިތުރު ތަފްސީލެއް ކަރެކްޝަނުން ނުދެ އެވެ.
ވަގު ޓީޓީ މައްސަލައިގައި ޝިފާއުގެ މައްޗަށް ދައުލަތުން 23 ދައުވާއެއް އުފުލިއިރު، އެ ހުރިހާ މައްސަލައެއް ވެސް ވަނީ ސާބިތުވެފަ އެވެ. އެއީ އެނގިހުރެ ސައްހަ ނޫން ލިޔުމެއް ދިނުމުގެ ކުށުގެ ނުވަ ދައުވާ އާއި މަކަރާއި ހީލަތް ހެދުމުގެ ކުށުގެ ހަތް ދައުވާ އާއި މަނީ ލޯންޑްރިންގެ ހަތް ދައުވާ އެވެ.
މި މައްސަލައިގައި ޝިފާއުގެ މައްޗަށް އަދަބު ކަނޑައެޅި ޝަރީއަތުގައި ވެސް އޭނާ ވަނީ ގޭބަންދަށް ބަދަލުކޮށްދިނުމަށް އެދިފަ އެވެ. އޭނާ ޝަރީއަތުގައި އޭރު ބުނީ އެގޮތަށް އެދެނީ މައްސަލައިގައި ފައިސާ ދޭންޖެހޭ މީހުންނަށް ފައިސާ ދެވޭނީ ގޭބަންދުގައި ހުރެގެން ކަމަށް ވާތީ ކަމަށެވެ.
މީގެއިތުރުން މި މައްސަލައިގައި ޝިފާއު ޖަލު ހުކުމް ތަންފީޒު ނުކުރާ ގޮތަށް އިއުތިރާފްގެ އެއްބަސްވުމެއް ހަދަން ދައުލަތުން ނިންމި ނަމަވެސް އެ ފުރުސަތު ނުދޭން ގާޒީ ނިންމެވި އެވެ.
މައްސަލަ ބެއްލެވި ގާޒީ އަލީ ނަދީމް ނިންމެވީ ޝިފާއުގެ މައްޗަށް އުފުލި ސައްހަ ނޫން ލިޔުމެއް ދިނުމުގެ ނުވަަ ދައުވާއަށް ނުވަ އަހަރާއި 10 މަހާއި 26 ދުވަހުގެ ޖަލު ހުކުމެއް އަދަބެއް، މަކަރާއި ހީލަތް ހެދުމުގެ ހަތް ދައުވާއަށް 30 އަހަރުގެ ޖަލު އަދަބެއް އިއްވައި، މަނީ ލޯންޑްރިންގެ ހަތް ދައުވާއަށް 79 އަހަރުގެ ޖަލު އަދަބަކާއެކު ހަތް މިލިއަން ރުފިޔާގެ ޖޫރިމަނާއެއް ކުރުމަށެވެ.
މިދިޔަ އަހަރުގެ ޑިސެމްބަރު މަހުގެ ތެރޭގައި އޭނާގެ މައްޗަށް ހުކުމް އިއްވީ އެއް އަހަރު ދުވަހުގެ ތެރޭގައި ޖޫރިމަނާ ފައިސާގެ އިތުރުން ގެއްލުން ލިބުނު މީހުންނަށް ފައިސާ ދައްކައި ހަލާސްކުރުމަށެވެ.
