މޯލްޑިވްސް ކަރެކްޝަނަލް ސާވިސްގެ ބެލުމުގެ ދަށުގައި ތިބި ގައިދީންނަށް ފަރުވާދިނުން ލަސްވަނީ ކަރެކްޝަންސްގެ ސަބަބުންކަން ހާމަވެއްޖެ އެވެ.
ހިއުމަން ރައިޓްސް ކޮމިޝަން (އެޗްއާރްސީއެމް) އިން އާންމުކުރި ރިޕޯޓުގެ ތަފާސްހިސާބުތަކުން ދައްކާ ގޮތުގައި ގައިދީންނަށް ފަރުވާ ދިނުން އެންމެ ބޮޑަށް ލަސްވަނީ އެސްކޯޓްކުރާނެ އޮފިސަރެއް ނެތުމުގެ ސަބަބުންނެވެ.
ތަފާސްހިސާބުތައް ދައްކާގޮތުން 2024 ވަނަ އަހަރު ގައިދީންނަށް ފަރުވާދިނުން ލަސްވި ސަބަބުގެ 49.9 ޕަސަންޓަކީ އެސްކޯޓް އޮފިސަރެއް ނެތުން ކަމަށްވާއިރު، އެ އަދަދު 2025 ގައި 46.9 ޕަސަންޓަށް ވަނީ ދަށްވެފަ އެވެ. ނަމަވެސް އެ އަދަދު މި އަހަރުގެ ޖުލައި މަހުގެ ނިޔަލަށް 63.2 ޕަސަންޓަށް ވަނީ އިތުރުވެފަ އެވެ.
ކަރެކްޝަންސްގެ އިދާރީ އޮޅުމުގެ ސަބަބުން އަހަރުން އަހަރަށް ގައިދީންނަށް ފަރުވާދިނުން ދަނީ ލަސްވަމުންނެވެ. އެގޮތުން 2024 ގައި އެ އަދަދު 7.7 ޕަސަންޓުގައި ހުރިއިރު، 205 ގައި އެ އަދަދު 11.1 ޕަސަންޓަށް ވަނީ އުފުލިފަ އެވެ. މި އަހަރު ޖުލައިގެ ނިޔަލަށް އެ އަދަދު ވަނީ 13.2 ޕަސަންޓަށް އުފުލިފަ އެވެ.
މީގެއިތުރުން ގައިދީންނަށް ފަރުވާދިނުން ލަސްވާ އެހެން ސަބަބުތަކުގެ ތެރޭގައި ޑޮކްޓަރަށް ދައްކަން ގެނެސް ބައިތިއްބާ ޖާގަ ނެތުމާއި، ބޭސް ލިބުން ލަސްވުމާއި، ހާއްސަ ޑޮކްޓަރުންނަށް ދެއްކުމަށް އެޕޮއިންޓްމަންޓް ލިބުން ލަސްވުންވެސް ހިމެނެ އެވެ.
ގައިދީންނަށް ސިއްހީ ފަރުވާ ލަސްވުމުގެ ސަބަބުތައް (1 ޖެނުއަރީ 2024 - 31 ޖުލައި 2026)
| Label | Value |
|---|---|
| އެކޯސްކޯޓް ކުރާނެ އޮފިސަރުން ނެތުން | 86 މައްސަލަ |
| ހާއްސަ ޑޮކްޓަރުންނަށް އެޕއޮިންޓްމަންޓް ލިބުން ލަސްވުން | 31 މައްސަލަ |
| އިދާރީ މައްސަލައަކުން / އިދާރީ ކުށަކުން | 17 މައްސަލަ |
| މާފުށިން ސިއްހީ ހިދުމަތް / ފަރުވާ ލިބެން ނެތުން | 10 މައްސަލަ |
| ޑޮކްޓަރަށް ދައްކަން ގެނެސް ބައިތިއްބާނެ ޖާގަ ނެތުން | 7 މައްސަލަ |
| އެޕޮއިންޓްމަންޓަށް އެދެން ލަސްވުން | 4 މައްސަލަ |
| ޑޮކްޓަރުގެ ލަފަޔާ އެއްގޮތަށް މެނޫ ފޯރުކޮށްދީފައި ނުވުން | 3 މައްސަލަ |
| އޮފިސަރުންގެ ފަރާތުން ބޭނުންވާ އެހީތެރިކަން ނުލިބުން | 2 މައްސަލަ |
| ބޭސްދިނުން ހުއްޓާލުން / މެދުކެނޑިފައިވުން | 2 މައްސަލަ |
| ރާއްޖެއިން ސިއްހީ ހިދުމަތް / ފަރުވާ ލިބެން ނެތުން | 1 މައްސަލަ |
| އެޕޮއިންޓްމަންޓް ހަމަޖެހިފައިވާ ދުވަސް އޮޅުން | 1 މައްސަލަ |
| މޫސުން ގޯސްވުމުގެ ސަބަބުން އެޕޮއިންޓްމަންޓަށް ނުގެންދެވުންް | 1 މައްސަލަ |
| ބޭސް ލިބުން ލަސްވުން | 1 މައްސަލަ |
މިދިޔަ ޖޫން 27، ގެ ނިޔަލަށް މާފުށި ޖަލުގައި އެކަނިވެސް 273 ކަރެކްޝަންސް އޮފިސަރުން މަސައްކަތްކުރަމުންދިޔަ އެވެ. ނަމަވެސް މާފުށި ޖަލުން އެކަނިވެސް ސިއްހީ ފަރުވާ ދިނުމުގައި ގިނަ ބަޔަކަށް ލަސްވާކަމުގެ ޝަކުވާ ބޮޑެވެ.
މާފުށި ޖަލުގައި މިދިޔަ ޖޫން 27، ގެ ނިޔަލަށް މަސައްކަތްކުރަމުންދިޔައީ ނަފްސާނީ ބައްޔަށް ހާއްސަ އެއް ޑޮކްޓަރާއި ތިން މެޑިކަލް އޮފިސަރުންގެ އިތުރުން 15 ނަރުހުންނެވެ.
ގައިދީންނަށް ލިބެންޖެހޭ ސިއްހީ ފަރުވާ ނުލިބިގެން އެކަމުގެ ޝަކުވާތައް ދޭތެރެ ދޭތެރެއިން ފެންމަތިވެ އެވެ. ނަމަވެސް އެކަން ހައްލުކުރަން މިހާތަނަށް އެކަށީގެންވާ މަސައްކަތްތަކެއް ކުރެވިފައެއް ނުވެ އެވެ.
