ފަހުގެ ތާރީހެއްގައި ރާއްޖޭގައި ހިންގި އެންމެ ބޮޑު ކޮރަޕްޝަން ކަމަށްވާ، އެމްއެމްޕީއާރުސީ ހިޔާނަތުގެ ފައިސާ ދައުރުކުރި އެސްއޯއެފް ކުންފުނީގެ އެކައުންޓުން ފައިސާ ޖަމާވެފައިވާކަން ސާބިތުވެ ކުރީގެ ނައިބު ރައީސް އަހުމަދު އަދީބުގެ މަސްލަހަތު ކުރިން އޮތް މޮންޓިލިއަން އިންޓަނޭޝަނަލްގެ މައްޗަށް މަނީ ލޯންޑަރިންގެ ދައުވާ ކޮށްދިނުމަށް އެދި ޕްރޮސެކިއުޓާ ޖެނެރަލްގެ އޮފީހަށް އެންޓި ކޮރަޕްޝަން ކޮމިޝަން (އޭސީސީ) އިން ފޮނުވައިފި އެވެ.
އޭސީސީން ބުނެފައިވާ ގޮތުގައި އެސްއޯއެފްގެ އެކައުންޓުން މޮންޓިލިއަންގެ އެކައުންޓަށް ޖަމާކޮށްފައިވަނީ 150،000 އެމެރިކާ ޑޮލަރެވެ. އެ ފައިސާ އަނބުރާ ހޯދުމަށް އެމްއެމްޕީއާރުސީއަށް އެންގުމަށް ވެސް ޕީޖީގައި ވަނީ އެދިފަ އެވެ.
"އެ ފައިސާއަކީ ކުށްކޮށްގެން ހޯދާފައިވާ ފައިސާކަމަށް އެދުވަސްވަރު މޮންޓިލިއަން އިންޓަނޭޝަނަލް ޕްރައިވެޓް ލިމިޓެޑް ހިންގުމުގައި އިސްކޮށް އުޅުނު ފަރާތަށް ޝައްކުކުރެވޭނެ ހާލަތެއް އޮއްވައި، އެ ފައިސާ މޮންޓިލިއަންގެ އެކައުންޓަށް ޖަމާކޮށް އެ ފައިސާ ބޭނުންކޮށްފައިވާކަން ވެސް ތަހުގީގަށް ވަނީ ފާހަގަކުރެވިފައި،" އޭސީސިން ބުނެފައިވެ އެވެ.
ވިޔަފާރި ރެޖިސްޓްރީއިން ދައްކާ ގޮތުގައި އެ ކުންފުނި އޮތީ އުވާލުމުގެ މަރުހަލާގަ އެވެ. ހިއްސާދާރުންގެ ގޮތުގައި ތިބީ ޝާހިދު ހުސައިން އަދި ސައީދު ހުސައިން ނަމަކަށް ކިޔާ ދެ މީހުންނެވެ. އަދީބަކީ އެ ކުންފުނީގެ ކުރީގެ ހިއްސާދާރެކެވެ.
މިފަހުން އޭސީސީން ވަނީ އެމްއެމްޕީއާރުސީ ހިޔާނާތާ ގުޅިގެން އެމްއެޗްއާރު ޓްރޭޑިންގެ މައްޗަށް ވެސް މަނީ ލޯންޑަރިންގެ ދައުވާ ކޮށްދިނުމަށް ޕީޖީގައި އެދިފަ އެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި އެމްއެމްޕީއާރުސީއަށް ލިބެން ޖެހޭ ފައިސާގެ ތެރެއިން ދެ ބިލިއަނަށްވުރެ ގިނަ ރުފިޔާއަށް ހިޔާނާތްތެރިވިކަމުގެ ކުށް ސާބިތުވުމާއެކު އަދީބުއަށް 20 އަހަރުގެ ޖަލު ހުކުމެއް އިއްވީ އޮކްޓޫބަރު 5، 2020 ގަ އެވެ. އޭނާގެ މައްޗަށް ސާބިތުވާކަމަށް ކަނޑައެޅި ދެ ދައުވާގެ ތެރެއިން ކޮންމެ ދައުވާއަކަށް އެއް މިލިއަން ރުފިޔާ ދައުލަތަށް ދައްކަން ވެސް އޭނާގެ މައްޗަށް ހުކުމްކުރި އެވެ.
އޭނާގެ މައްޗަށް ހިޔާނާތުގެ ކުށް ސާބިތުވެ ދިގު މުއްދަތަކަށް ޖަލަށް ހުކުމް ކުރި ނަމަވެސް، މިނިވަންވީ ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގެ ފަހު ދުވަސްވަރު އަދަބު ލުއިކޮށްދެއްވުމުންނެވެ. މިނިވަންވުމަށްފަހު އަދީބު ދިރިއުޅުއްވަމުން ގެންދަވަނީ ރާއްޖެއިން ބޭރުގަ އެވެ.
