ފަހުގެ ތާރީހެއްގައި ރާއްޖޭގައި ހިންގި އެންމެ ބޮޑު ކޮރަޕްޝަން ކަމަށްވާ، އެމްއެމްޕީއާރުސީ ހިޔާނާތުގެ މައްސަލައިގައި އެމްއެޗްއާރު ޓްރޭޑިންގެ މައްޗަށް މަނީ ލޯންޑަރިންގެ ދައުވާ ކޮށްދިނުމަށް އެދި އެންޓި ކޮރަޕްޝަން ކޮމިޝަން (އޭސީސީ) އިން ޕްރޮސެކިއުޓާ ޖެނެރަލްގެ އޮފީހަށް ފޮނުވުމަށް ނިންމައިފި އެވެ.
އެމްއެމްޕީއާރުސީގެ ފައިސާ ދައުރުކުރި އެސްއޯއެފް ކުންފުނީގެ އެކައުންޓުން އެމްއެޗްއާރު ޓްރޭޑިންގެ އެކައުންޓަށް ފައިސާ ޖަމާވެފައިވާކަން ވަނީ އޭސީސީގެ ތަހުގީގަށް ހޯދިފަ އެވެ. އެއީ އެމްއެމްޕީއާރުސީއަށް ލިބެން ޖެހޭ 325،000 ޑޮލަރެވެ. އެ ފައިސާ ޖަމާކުރީ އެމްއެޗްއާރު ޓްރޭޑިންގެ ދަށުން ހިންގަމުން އަންނަ "ތަރުކާރީ ފިހާރަ" ގެ އެކައުންޓަށެވެ.
"މި ފައިސާއަކީ ޑޮލަރު ގަނެވިއްކުމުގެ މުޢާމަލާތަކުން ލިބުނު ފައިސާކަމަށް ދެއްކުމަށް އެ ކުންފުނިން މަސައްކަތް ކޮށްފައިވީނަމަވެސް އެ ޗެކުތައް އެ ކުންފުންޏަށް ދިނީ ކޮން ފަރާތަކުންކަމާއި އަދި ޗެކުތަކަށް ދޭންޖެހޭ ދިވެހި ރުފިޔާ ދިން ގޮތެއް ވެސް އެ ކުންފުންޏަށް ތަހުގީގުގައި ސާބިތުކޮށްދެވިފައެއް ނުވޭ،" އޭސީސީން ބުނެފައިވެ އެވެ.
އޭގެ އިތުރުން، އެމްއެމްޕީއާރުސީ ހިޔާނާތުގެ ތެރެއިން ދޫކޮށްފައިވާ އދ. ފުށިދިއްގާގެ އެކުއިޒިޝަން ފީގެ ގޮތުގައި އެ ކުންފުންޏަށް ދެއްކި 50،000 ޑޮލަރު ވެސް ޖަމާކޮށްފައިވަނީ އެމްއެޗްއާރު ޓްރޭޑިންގެ އެކައުންޓަށްކަން ތަހުގީގަށް ވަނީ ހޯދިފަ އެވެ. އެ ފައިސާ ޖަމާކުރުމުގައި އިސްކޮށް ހަރަކާތްތެރިވީ އަބްދުالله ޒިޔާތު އެވެ.
"ޗެކުތަކަކާ ގުޅޭގޮތުން އަބްދުﷲ ޒިޔާތުއާއި އެމްއެޗްއާރު ކުންފުނީގެ މެނޭޖިން ޑިރެކްޓަރާ ދެމެދު މުއާމަލާތްކޮށްފައި ވާކަމާއި އެ މުއާމަލާތްތަކުން އެމްއެޗްއާރުގެ އެކައުންޓަށް ޖަމާކޮށްފައިވާ ފައިސާއަކީ ކުށް ކޮށްގެން ހޯދާފައިވާ ފައިސާކަން އެމްއެޗްއާރު ކުންފުނީގެ އެމްޑީއަށް ޝައްކުކުރެވޭނެ ހާލަތެއް އޮތްކަން ތަހުގީގަށްވަނީ ހޯދިފައި،" އޭސީސީން ބުނެފައިވެ އެވެ.
އެ ކުންފުނީގެ މައްޗަށް މަނީ ލޯންޑަރިންގެ ދައުވާ އުފުލުމުގެ އިތުރުން އެސްއޯއެފްގެ ޗެކުތަކުން ޖަމާކުރި ޑޮލަރަށްވާ 5,011,500.0ރ. އަނބުރާ ހޯދުމަށް ވެސް އެމްއެމްޕީއާރުސީއަށް އަންގަން ވަނީ ނިންމާފަ އެވެ. ހަމައެހެންމެ، ފުށިދިއްގާގެ އެކުއިޒިޝަން ފީގެ ގޮތުގައި ދެއްކި 50،000 ޑޮލަރާއި އެ ފައިސާ އިންވެސްޓްކޮށްގެން ފައިދާގެ ގޮތުގައި ހޯދާފައިވާ ފައިސާ އަނބުރާ ހޯދުމަށް ވެސް އެމްއެމްޕީއާރުސީއަށް އެންގުމަށް ވަނީ ނިންމާފަ އެވެ.
