މަޝްހޫރު ގާލް ގްރޫޕް "ކެޓްސްއައި" ގެ ލަވަކިޔުންތެރިޔާ ސޯފިއާ ލަފޯޓޭޒާ، ނަފްސާނީ ސިއްހަތާ ގުޅޭ މައްސަލަތަކެއްގެ ސަބަބުން ބޭންޑުގެ ހަރަކާތްތަކާ ވަގުތީ ގޮތުން ދުރަށް ދާން ނިންމައިފި އެވެ.
ސޯފިއާ މި ނިންމުން ނިންމާފައި މިވަނީ، "ނާލީ"، "ޕިންކީ އަޕް" އަދި "ގަބްރިއޭލާ" ފަދަ ދުނިޔޭގެ މަގުބޫލުކަން ހޯދާފައިވާ ލަވަތައް ކިޔާފައިވާ މި ބޭންޑުގެ މެންބަރު މެނަން ބެނަމަން ވެސް ބޭންޑުގެ މަސައްކަތްތަކުން ބްރޭކެއް ނަގާފައިވާތާ ހަ މަސް ދުވަސް ވެސް ނުވަނީހެވެ.
ހައިބް އެކްސް ގެފެން ރެކޯޑްސް އިން ނެރުނު ބަޔާނެއްގައި ބުނެފައިވަނީ، ކުރިއަށް ހުރި ޕްރޮމޯޝަނަލް ހަރަކާތްތަކުގައި ސޯފިއާ ލަފޯޓޭޒާ އަށް ވަގުތީ ގޮތުން ބައިވެރިނުވެވޭނެ ކަމަށެވެ.
ފިލިޕީންސް-އެމެރިކާ އަށް ނިސްބަތްވާ މި ތަރިއާ ގުޅޭ ގޮތުން އެ ލޭބަލުން ބުނީ، "އައިކޮންސް" ނުވަތަ ކެޓްސްއައިގެ ފޭނުން ސޯފިއާ ސްޓޭޖް މަތިން ފެންނާނެ ކަމަށް ކުރި އުންމީދު ބޮޑުކަން އެނގޭ ކަމަށާއި، ނަމަވެސް މިވަގުތު އެންމެ މުހިންމީ އޭނާގެ ނަފްސާނީ ދުޅަހެޔޮކަމަށް އިސްކަންދިނުން ކަމަށެވެ.
އެ ލޭބަލުން ހާމަކުރި ގޮތުގައި ސޯފިއާ އަށް ބޭނުންވާ އެންމެ ފުރިހަމަ އެހީތެރިކަން ފޯރުކޮށްދެމުންދާއިރު، ސިއްހީ މާހިރުންގެ ލަފާގެ މަތިން އޭނާ ވަނީ ފުރިހަމަ ފަރުވާ ހޯދުމަށާއި އަރާމުކުރުމަށް ވަގުތު ހުސްކުރުމަށް ނިންމާފަ އެވެ.
އަންނަ ސެޕްޓެމްބަރު މަހު ސޯފިއާގެ ހާލަތު އަލުން ވަޒަންކުރާނެ ކަމަށް ފާހަގަކޮށް އެ ބަޔާނުގައި ބުނެފައިވަނީ، ބޭންޑުގެ އެހެން މެންބަރުންނާއެކު ޕާފޯމްކުރުމަށް ސޯފިއާ އަމިއްލައަށް ބޭނުންވި ނަމަވެސް، އާޓިސްޓުންގެ ސިއްހަތާއި ރައްކާތެރިކަމަކީ އެ ކުންފުނީގެ އެންމެ އިސް ސިޔާސަތު ކަމަށެވެ.
މިކަމާ ގުޅިގެން ސޯފިއާ އިންސްޓަގްރާމްގައި ކުރި ޕޯސްޓެއްގައި ބުނީ، މިއީ ނިންމަން ފަސޭހަ ނިންމުމެއް ނޫން ކަމަށާއި، ނަމަވެސް ސިއްހަތަށް އިސްކަންދޭން ޖެހޭކަން މިހާރު ގަބޫލުކުރާ ކަމަށެވެ. އަދި މިހާރު އަމިއްލަ ނަފްސަށާއި ހަށިގަނޑަށް އަޅާނުލައިފިނަމަ، އެންމެ ލޯބިވާ މަސައްކަތުގައި ދެމިނުހުރެވޭނެކަން ވިސްނޭ ކަމަށް ވެސް އޭނާ ބުންޏެވެ.
ޖުމްލަ ހަ މެންބަރުންނާއެކު 2023 ވަނަ އަހަރު އުފެދުނު މި ގާލް ގްރޫޕަކީ މިދިޔަ އަހަރު ދެ ގްރެމީ އެވޯޑަށް ނޮމިނޭޓްވި ބޭންޑެކެވެ. ސޯފިއާ ބްރޭކެއް ނެގުމާއެކު، ދެން ބޭންޑުގެ ހަރަކާތްތައް ކުރިއަށްދާނީ ހަތަރު މެންބަރުންނާއެކުގަ އެވެ.
މި ބޭންޑުން މީގެ ކުރިން ބުނެފައިވާ ގޮތުގައި، ބޭންޑު އުފެދުނު ފަހުން އިންޓަނެޓް މެދުވެރިކޮށް މެންބަރުންނަށް މަރުގެ އިންޒާރުތައް ދަނީ ލިބެމުންނެވެ.
