ވެރިކަން ހޯއްދަން އުޅުއްވިއިރު މ. ދިމްޔާތު، މުހައްމަދު މުއިއްޒު ވެވަޑައިގެންނެވީ ދިވެހިރާއްޖެ ދެކެ އެންމެ ބޮޑަށް ލޯބިވާ، ގައުމިއްޔަތުގެ ސިފަތައް އެންމެ ބޮޑަށް ލިބިވަޑައިގެން ހުންނެވި ބޭފުޅާއަށެވެ.
އެންމެ ފުރަތަމަ ގައުމު އިސް ކުރުމުގެ ވާހަކަ އާއި އިސްލާމް ދީނުގެ ވާހަކަ އާއި ގައުމިއްޔަތު ބިނާކުރުމުގެ ވާހަކަ މިވަރަށް ދެއްކި ވެރިޔަކު މި ދިވެހި ފަސްގަނޑަކު ނެތެވެ. ސިޔާސީ އިދިކޮޅު މީހާއާ ދިމާލަށް އިނގިލި ދިއްކުރައްވައި، އެ މީހުންނަކީ ގައުމު ދެކެ ލޯބިނުވާ ގައްދާރުން ކަމަށް މުއިއްޒު އިއުލާނު ކުރެއްވި އަދަދު ވެސް މަދެއް ނުވާނެ އެވެ.
"ސިޔާސީ ވިސްނުން އިސް ކުރެވިގެންދާ ލެވެލްއަކީ ތިމަންނައަކީ ފުރަތަމަ ދިވެއްސެއްކަން ވެސް ހަނދާން ނެތޭ ހިސާބަށްދާތަން އަޅުގަނޑުމެންނަށް މި ފެންނަނީ،" ސިޔާސީ އިދިކޮޅު ފަރާތްތަކަށް ނިސްބަތްކުރައްވާ މުއިއްޒު މިފަހުން ވިދާޅުވެފައިވެ އެވެ.
އެކަމަކު، ގައުމު ދެކެ ލޯބިވުމުގެ ވާހަކަ އާއި ފުރަތަމަ ގައުމު އިސް ކުރުމަކީ ކޮބައިކަން ވެސް މުއިއްޒަށް އެނގިވަޑައިނުގަންނަވާކަން މިހާރު ހާމަވެއްޖެ އެވެ. ބިދޭސީ މަހުޖަނުން ބޭނުންވާހާ ގޮތަކަށް އުޅެން ދިވެހި ބިމުގެ ބޮޑު ބައެއް ހިލޭ ދޫކޮށްލުމުން ހުއްބުލްވަތަނުގެ ވެލިފުކެއްހާ މިންވަރު ވެސް މުހައްމަދު މުއިއްޒުގެ ނެތްކަން އެނގިއްޖެ އެވެ. މިއަދު، ބުޅާ ގޯނިން ބޭރުވެއްޖެ އެވެ.
ޔުނައިޓެޑް އެރަބް އެމިރޭޓްސްގެ އީގަލް ހިލްސް ކުންފުންޏަށް ރަސްމާލޭގެ 500 ހެކްޓަރު ދޫކޮށްލަން މި ސަރުކާރުން އެއްބަސްވީ، އެއްވެސް އަގެއް ނުނަނާ ގޮތަށް މުޅިން ހިލެ އެވެ. އެ ތަނުން ބިމު ކުއްޔެއް ވެސް ނުނަގާނެ އެވެ. އޭގެ އިތުރުން، ރަސްމާލެ ދޫކޮށްލީ 99 އަހަރަށް ކަމަށް ސަރުކާރުން ބުނި ނަމަވެސް، އެއްބަސްވުން ފްރޭމްކޮށްފައި ވަނީ އެތަން ދުވަހަކު ވެސް ދިވެހިންނަށް ނުލިބޭނެ ގޮތަށެވެ.
އެ ޑީލު ކުރިއަށް ގެންދިޔުމަށް ސަރުކާރުން ބޭނުން ކުރީ މަކަރުވެރި، ހީލަތްތެރި އުކުޅުތަކަކެވެ. ރަސްމާލެއާ ގުޅޭ ގޮތުން ރައީސް މުއިއްޒު އެތައް ދޮގެއް ހައްދަވައިފަ އެވެ. އެތައް ކަމެއް އޮޅުވާލައްވައިފަ އެވެ. މި ޑީލުން ހާމަވަނީ ރައީސް މުއިއްޒާއި އެމަނިކުފާނު ސަރުކާރުގެ މަކަރުވެރިކަމާއި ހީލަތްތެރިކަމެވެ.
ރަސްމާލެ ދޫކޮށްލިކަން ރައްޔިތުންނަށް އެނގުނީ ޑީލު ހެދި ދުވަހު
އީގަލް ހިލްސްއާއެކީ ސަރުކާރުން ހެދީ ކުޑަ ޑީލެއް ނޫނެވެ. މިއީ އެތައް އަހަރަކަށް ނުވަތަ މުޅި އުމުރަށް ބިމެއް ދޫކޮށްލުމާ ގުޅޭ ޑީލެކެވެ. އެ ޑީލަށް ވާސިލުވެވުމުގެ ކުރިން އެތައް މަޝްވަރާއެއް ކުރާނެ އެވެ. އެ މަސައްކަތަށް މަދުވެގެން އެތައް މަސްދުވަހެއް ހޭދަވާނެ އެވެ.
ނަމަވެސް ބިދޭސީ ކުންފުންޏަކަށް ރަސްމާލެ ދޫކޮށްލަން އުޅޭކަން ރައްޔިތުންނަށް ހާމަވީ އެ ޕްރޮޖެކްޓު މުއިއްޒުގެ ސަރުކާރުން އިއުލާނު ކުރުމުންނެވެ. އެ ޕްރޮޖެކްޓު މަޖިލީހަކަށް ވެސް ހުށަނާޅަ އެވެ. އަދި ޕްރޮޖެކްޓާ ގުޅޭ ގޮތުން ސަރުކާރުގެ އެތެރޭގައި ވެސް އެކަށީގެންވާ މިންވަރަށް ވާހަކަ ނުދެކޭ ކަމަށް ބައެއް މަސްދަރުތަކުން ބުނެ އެވެ.
ރަސްމާލެ ޔޫއޭއީ ބަޔަކަށް ދިންކަން ހާމަވުމުން އެންމެ ބޮޑު ހައިރާންކަމެއް ލިބެނީ، އެ ރަށް ބިދޭސީ އެއްވެސް މީހަކަށް ކުއްޔަށް ނަމަވެސް ނުދެއްވާނެ ކަމަށް ހަރު އަޑުން ރައީސް މުއިއްޒު ވައުދުވެވަޑައިގެންފައިވާތީ އެވެ.
"ރަސްމާލޭގެ މަސައްކަތް ކުރިން ހިންގި ގޮތް އަޅުގަނޑުމެންނަށް ކަމުނުގޮސްގެން، އެ އެގްރިމެންޓު ބާތިލުކޮށް، މިހާރު އެއްވެސް ފަރާތަކަށް ބިމެއް، ކުރު މުއްދަތަކަށްވިޔަސް، ދިގު މުއްދަތަކަށްވިޔަސް ދޭން ނުޖެހޭ ގޮތަށް ހިންގަން ނިންމައި، އެ މަސައްކަތް އެވަނީ އަލުން ފެށިފައި،" މީގެ ދެ އަހަރު ކުރިން 2024 ވަނަ އަހަރުގެ މިނިވަން ދުވަހުގެ މުނާސަބަތުގައި ބޭއްވި ޖަލްސާގައި މުއިއްޒު ވިދާޅުވި އެވެ.
އެއީ މުއިއްޒު އަބަދު ވިދާޅުވާ ޓްރާންސްޕޭރަންސީ އާއި ދެފުށް ފެނުމުގެ ނިޒާމާ މުޅިން ފުށުއަރާ ނިންމުމެކެވެ.
"އިންޝާﷲ އަޅުގަނޑު ދޭ ޔަގީން ކަމަކީ ރައްޔިތުންގެ އުއްމީދުތައް ހާސިލްވާ، އަދުލުވެރި، އިންސާފުވެރި، ދެފުށްފެންނަ، ނަތީޖާ ނެރެދޭ، ހިންގުންތެރި ވެރިކަމެއް ކޮށްދީ، ހުރިހާ ގޮތަކުން މިނިވަންކަން ޔަގީންވެފައިވާ، އިގްތިސާދު ހަރުދަނާ ކުރެވިފައިވާ، ގެދޮރުވެރިކަން ޔަގީންކޮށްދެވިފައިވާ، ފުދުންތެރި، އަބުރުވެރި، އެކަކު އަނެކަކަށް އަޅާލާ އޯގާތެރި ގައުމެއް، މުޖުތަމައުއެއް ގާއިމުކޮށްދޭނެކަން،" ސެޕްޓެމްބަރު، 2023، ގައި މުއިއްޒު ވިދާޅުވެފައިވެ އެވެ.
މަކަރުވެރި ޑީލެއް: ރަސްމާލެ ދޫކޮށްލީ، އުމުރަށް، ދާއިމީކޮށް، ދުވަހަކު ވެސް ނުލިބޭ ގޮތަށް
ހދ. ހަނިމާދޫ އިންޓަނޭޝަނަލް އެއާޕޯޓު ތަރައްގީ ކުރުމުގެ ޕްރޮޖެކްޓަށް އިންޑިއާ ސަރުކާރުން އެހީތެރިވެދިނުމުގެ ބަދަލުގައި، އެ ގައުމަށް ރާއްޖެއިން 15 ހެކްޓަރުގެ ދެ ބިން ދޭން އުޅޭ ވާހަކަ މިދިޔަ ރިޔާސީ އިންތިހާބުގެ ތެރޭގައި ފެތުރުނެވެ.
އެ ވާހަކަ އެންމެ ގިނަ ތަންތަނުގައި، އެންމެ ބާރަށް ދެއްކެވީ އަދުގެ ރައީސް މުއިއްޒެވެ. ބިން އިންޑިއާ ރާއްޖެއިން ބިން ދޭން އުޅޭ ކަމަށް އެއިރު ދެކެވުނު ވާހަކައަކީ ހަގީގަތެއް ނޫނެވެ. އެކަމަކު ވެސް އެ ވާހަކަތައް ދައްކައި، އެފަދަ ކަމެއް ކުރުމުގެ "ނުބައިކަމުގެ" މައްޗަށް މުއިއްޒު އެތައް ފަހަރަކު އަލިއަޅުވައިލެއްވި އެވެ.
ރިޔާސީ އިންތިހާބުގެ ކެމްޕެއިނުގެ ތެރެއިން ވެރި ރަށް މާލޭގައި ވާހަކަ ދައްކަވަމުން، 99 އަހަރަށް ބިމެއް ދޫކޮށްލުމަކީ ގައުމުގެ މިނިވަންކަން ވެސް ގެއްލިދާނެ ފަދަ "ބިރުވެރި" ކަމެއްގެ ގޮތުގައި މުއިއްޒު ސިފަ ކުރެއްވި އެވެ.
"ދެން މި ފެންނަނީ ގަމާ އެއްވެގެން 15 ހެކްޓަރުގެ ބިން، ހަނިމާދޫއިން 15 ހެކްޓަރުގެ ބިން ދޭން އެއްބަސްވާ ތަން. ނޫނީ އެއްބަސްވުމަށް މަޝްވަރާ ކުރެވިފައި އޮތް ތަން. 99 އަހަރު ދުވަހަށް ހިލޭ މިކަހަލަ ނުރައްކާތެރި، ބިރުވެރި ކަންތައްތައް، އަޅުގަނޑުމެންގެ މިނިވަންކަން އޭގެ ސަބަބުން ގެއްލިގެންދާ ކަންތައްތައް ކުރަން މި އޮތީ ރާވާފަ، ކުރަމުން ގޮސްފައި، ކޮށްފައި،" ސެޕްޓެމްބަރު، 2023، ގައި މުއިއްޒު ވިދާޅުވި އެވެ.
ހަމަ އެ ދުވަހު، އެހެން ތަނެއްގައި ވާހަކަ ދައްކަވަމުން ވެސް މުއިއްޒު ވަނީ 99 އަހަރަށް ރާއްޖޭގެ އެއްވެސް ބިމެއް ދޫކޮށްލުމާ ދެކޮޅަށް ވާހަކަ ދައްކަވައިފަ އެވެ.
"ރާއްޖޭގެ އެކި ކަންކޮޅުތަކުން އެތައް ހެކްޓަރެއްގެ ބިންތައް އަޅުގަނޑުމެންގެ އަތުން [ނަގައި ބޭރު ބަޔަކަށް] 99 އަހަރަށް ދޭން އެއްބަސްވާ ސަރުކާރެއް މިއަދު މި އޮތީ،" އެމަނިކުފާނު ވިދާޅުވި އެވެ.
މުއިއްޒު އެއިރު ވިދާޅުވެފައިވާ ވާހަކަތަކަށް ބުރަވެ ވިސްނާ ނަމަ، މުއިއްޒު އެއިރު ކުށްވެރި ކުރެއްވި ހިޔާލީ ޑީލަށްވުރެ، ރަސްމާލެ ދޫކޮށްލަން މިހާރު ހަދައިގެން އުޅޭ ޑީލް މާ ބޮޑަށް ވެސް ނުރައްކާތެރި އެވެ.
ރަސްމާލެ ޑީލުގެ އެންމެ މުހިންމު ޕޮއިންޓަކީ ބިން ދޫކޮށްލެވޭ މުއްދަތެވެ. ސަރުކާރުން ބުނަނީ އެ ބިން ދޫކޮށްލަނީ 99 އަހަރަށް ކަމަށެވެ. އެކަމަކު ހަގީގަތަކީ ރަސްމާލެ ޑީލުގެ އެގްރިމެންޓު ފަރުމާކޮށްފައި އޮތީ މުޅި އުމުރަށް އެތަން ދިވެހިންގެ އަތުން ގެއްލޭ ގޮތަށް ކަމެވެ.
ރަސްމާލެއިން ލަގްޒަރީ އެޕާޓްމަންޓެއް ގަންނަ ބިދޭސީ މީހާ އެގްރިމެންޓުގައި ސޮއި ކުރާ ދުވަހު 99 އަހަރުގެ ލީސް މުއްދަތެއް ފެށޭނެ އެވެ. އެ މުއްދަތު ހަމަވުމުގެ ކުރިން، މިސާލަކަށް 90 އަހަރުކޮށްފައި އޭނާ އެތަން ވިއްކާލައިގެން، ނުވަތަ ހިބައިން ދީގެން އޯނާޝިޕް ޓްރާންސްފާވެއްޖެ ނަމަ އަނެއްކާ ވެސް 99 އަހަރުގެ އާ ލީސް މުއްދަތެއް ފެށޭނެ އެވެ.
"މިތަނުގެ ޕްރޮޕަޓީސްތައް ކުއްޔަށް ދޭނީ ދިވެހިރާއްޖޭގެ ގާނޫނުތަކުގެ ދަށުން 99 އަހަރަށް. އެތަންތަނުގެ ހައްގުތައް ވިއްކައިގެން ނުވަތަ ވާރުތައިން ވެސް އެހެން ފަރާތަކަށް ބަދަލުކޮށްފި ނަމަ 99 އަހަރުގެ އާ ކުލީގެ މުއްދަތެއް ފެށޭނެ. މީގެ ސަބަބުން އެތަން ގަންނަ ފަރާތްތަކުގެ އަތުގައި އެތައް ޖީލަކަށް އެތަންތަން ދެމިގެންދާނެ،" ރަސްމާލެ ލިބުނު އީގަލް ހިލްސް އިން ބުނެފައިވެ އެވެ.
ރަސްމާލޭ ދޫކޮށްލަން ހެދި ޑީލުގެ ހަގީގަތަކީ އެއީ އެވެ. ނަމަވެސް އެކަން އޮޅުވާލަން ހީލަތްތެރި ގޮތަކަށް މުއިއްޒުގެ ފަރާތުން އެމަނިކުފާނުގެ ވަޒީރު އަބްދުﷲ މުއްތަލިބު ގެންދަވަނީ މަސައްކަތް ކުރައްވަމުންނެވެ.
ބިން ދިނީ 99 އަހަރަށް ނޫންކަން ހާމަވުމުން މުއްތަލިބު ވިދާޅުވީ، ބޭރު މީހުންނަށް މިލްކު ވާނީ ރަސްމާލޭގައި އަޅާ އިމާރާތްތަކާއި އިންފްރާސްޓްރަކްޗާ ކަމަށާއި އެތަނުގެ ބިން 99 އަހަރު ފަހުން އޮންނާނީ ދިވެހިން އަތުގައި ކަމަށެވެ.
"ރަސްމާލޭން ޕްރޮޕަޓީ ގަންނަ ފަރާތުގެ މިލްކަކީ އެ ޕްރޮޕަޓީ. އެ ޕްރޮޕަޓީ ހިމެނޭ ބިމަކީ ދިވެހި ދައުލަތުގެ މިލްކެއް،" މުއްތަލިބު ވިދާޅުވި އެވެ.
ނަމަވެސް އެއީ ދެކޮޅު ނުޖެހޭ ވާހަކައެކެވެ. ބިމުގައި އަޅާފައިވާ އިމާރާތަކީ އެހެން ފަރާތެއްގެ އެއްޗެއް ނަމަ، ބިން މިލްކުވެގެން ލިބޭ މޮޅެއް ނެތެވެ. މި ހާލަތުގައި، ބިން މިލްކުވުމާއި ބިން މިލްކުނުވުމުގެ ތަފާތެއް ނެތެވެ.
ބިން ދޫކޮށްލީ ހިލޭ: ދައުލަތަށް ބޮޑު ގެއްލުމެއް
ރަސްމާލެ ދޫކޮށްލަން ރައީސް މުއިއްޒުގެ ސަރުކާރުން އެއްބަސްވީ ދިވެހިންނަށް ބޮޑު ގެއްލުމެއް ލިބޭ ގޮތަށެވެ. މާލީ ތަޖުރިބާކާރުންނާއި ފާޑުކިޔާ މީހުން ބުނަމުން އެ ދަނީ އެއީ ބިން ހިލޭ ދޫކޮށްލުން ފަދަ ނިންމުމެއް ކަމަށެވެ.
އީގަލް ހިލްސްއަށް ރަސްމާލެ ދޫކޮށްލީ އެތަނުން އިކުޒިޝަން ފީއެއް ނުނަގާ ގޮތަށެވެ. އަދި އެތަނުން ބިމު ކުއްޔެއް ވެސް ސަރުކާރަކަށް ނުލިބޭނެ އެވެ. ރަސްމާލޭން ސަރުކާރަށް ލިބޭހާ ވެސް އެއްޗަކީ އެ ތަނުގައި އަޅާ ކޮމާޝަލް އިމާރާތްތައް ވިއްކައިގެން ލިބޭ 10 ޕަސެންޓާއި އެޕާޓްމަންޓްތައް ވިއްކައިގެން ލިބޭ ހަތަރު ޕަސެންޓުގެ ރެވެނިއު އެވެ.
ވަޒީރު މުއްތަލިބު ވިދާޅުވީ ރަސްމާލޭގައި އަޅާ އިމާރާތްތައް ވިއްކައިގެން ދައުލަތަށް ތިން ބިލިއަން ޑޮލަރު ނުވަތަ 46 ބިލިއަން ރުފިޔާ 10 އަހަރު ތެރޭގައި ލިބޭނެ ކަމަށެވެ. އޭގެ ފަހުން ދައުލަތަށް ރަސްމާލޭން ލިބޭނެ އެއްޗެއް ނެތެވެ.
"އަޅުގަނޑުމެން މި އެކްސްޕެކްޓް ކުރަނީ، އެސެސްމެންޓް ދައްކާ ގޮތުން ތިން ބިލިއަނަށް ވުރެ ގިނަ ޑޮލަރު، ގާތްގަނޑަކަށް 46 ބިލިއަނަށް ވުރެ ގިނަ ރުފިޔާ، އެތަނުގެ 10 އަހަރުގެ ޑިވެލޮޕްމެންޓް ނިމޭ އިރު ސަރުކާރަށް ލިބޭނޭ،" 'މިހާރު' ނޫހަށް ދެއްވި އިންޓަވިއުއެއްގައި މުއްތަލިބު ވިދާޅުވި އެވެ.
އެއީ ވަރަށް މަދު ފައިސާކޮޅެކެވެ. މިދިޔަ އަހަރު ދައުލަތުގެ ބަޖެޓަކީ 57 ބިލިއަން ރުފިޔާ އެވެ. މި އަހަރަށް ސަރުކާރުން ފާސްކުރީ 64 ބިލިއަން ރުފިޔާގެ ބަޖެޓެކެވެ. އެހެންކަމުން 10 އަހަރުގެ މުއްދަތެއްގެ ތެރޭގައި އެންމެ 46 ބިލިއަން ރުފިޔާ ލިބުމަކީ އެއްވެސް އެއްޗަކަށްނުވާނެ އެވެ.
ރަސްމާލެއިން ދޫކޮށްލާ 500 ހެކްޓަރުގެ އެންމެ ދަށް އަގެއްގެ ގޮތުގައި އަކަފޫޓަކަށް 6،000ރ. ގެ ގޮތުގައި ބެލި ނަމަވެސް އެ ބިމުގެ އަގު 21 ބިލިއަން ޑޮލަރަށް އަރަ އެވެ. އެއީ 322 ބިލިއަން ރުފިޔާ އެވެ. އެހެންކަމުން ދައުލަތަށް މި ލިބެނީ ބިމުގެ ލޭންޑް ވެލިއުގެ އެންމެ 14 ޕަސެންޓެވެ.
ރަސްމާލޭ ޕްރޮޖެކްޓުގެ ފެކްޓުތައް
- ދޫކޮށްލަނީ 500 ހެކްޓަރުގެ ބިން 99 އަހަރަށް
- ބިމުގައި އަޅާ ހުރިހާ އިމާރާތެއްގެ މިލްކުވެރިންނަކީ އެތަންތަން ގަންނަ ފަރާތްތައް
- ބިން ދޫކޮށްލަނީ އެކުއިޒިޝަން ފީއެއް ނުނަގާ
- ބިމަށް ބިމު ކުއްޔެއް ނުނަގާނެ
- ދިވެހި ސަރުކާރަށް ލިބޭނީ ކޮމާޝަލް ޕްރޮޕަޓީސް ވިއްކައިގެން ލިބޭ ރެވެނިއުގެ 10 ޕަސެންޓު އަދި އެޕާޓްމަންޓްތައް ވިއްކައިގެން ލިބޭ ރެވެނިއުގެ ހަތަރު ޕަސެންޓު އެކަނި
- ދައުލަށް ލިބޭނެ ކަމަށް ލަފާ ކުރެވެނީ އެންމެ 46 ބިލިއަން ރުފިޔާ
- ޕްރޮޖެކްޓުގެ ދަށުން ހުޅުމާލޭގައި 5،000 ފްލެޓު އަޅާނެ. އެ ފްލެޓުތަކަށް ހަރަދުވަނީ ގާތްގަނޑަކަށް 7.7 ބިލިއަން ރުފިޔާ
- ފްލެޓު އަޅަނީ ޕްރޮޖެކްޓުގެ ދަށުން ދިވެހި ސަރުކާރަށް ލިބޭ ފައިސާއިން ކަނޑާ ގޮތަށް. އެއީ ހިލޭ ލިބޭ ފްލެޓުތަކެއް ނޫން.
ރަސްމާލެ ޔަހޫދީންގެ ރަހުމަތްތެރިޔާއަށް
ދިވެހިރާއްޖޭގެ ގާނޫނުތަކާއި ގަވާއިދުތަކުގެ ބާރު ނުހިނގާ ގޮތަށް، މި ރާއްޖޭގެ ބޮޑު ސަރަހައްދެއް ބޭރުގެ ބަޔަކަށް ވިއްކާލުމަކީ ކޮން ކަހަލަ ކަމެއްތޯ އެވެ؟
ދިވެހިރާއްޖޭގެ މި ބުނާ ސަރަހައްދު ގަންނަ މީހަކީ، މި ދުނިޔެ މަތީގައި މިވަގުތު ތިބި އެންމެ ނުބައިނުލަފާ އަދި މުސްލިމުންގެ އެންމެ ބޮޑު އަދުއްވުން ކަމަށްވާ އިޒްރޭލާ ގާތް ގުޅުމެއް އޮންނަ މީހަކަށްވުމަށް ދިވެހިން ބޭނުންވޭތޯ އެވެ؟
ރަސްމާލެ ލިބުނު އީގަލް ހިލްސްގެ ވެރިޔާ މުހައްމަދު އަލައްބާރަކީ ޔަހޫދީންގެ ހާއްސަ ރަހުމަތްތެރިއެކެވެ. އިޒްރޭލަށް އެހީތެރިވެދީ، ދައުލަތެއްގެ ގޮތުގައި ކުރިއެރުވުމަށް އަލައްބާރުގެ އެހީތެރިކަން ލިބެ އެވެ.
އަލައްބާރާއި އިޒްރޭލުގެ ގުޅުން
- 2005 ވަނަ އަހަރު އިޒްރޭލުގެ ބޮޑުވަޒީރު ޝިމޮން ޕެރޭޒްއާ ބައްދަލު ކުރައްވައި ފަލަސްތީނުގެ ގާޒާ "ތަރައްގީ" ކުރުމާ ގުޅޭ ގޮތުން މަޝްވަރާ ކުރެއްވި
- 2018 ވަނަ އަހަރުން ފެށިގެން އިޒްރޭލުގެ ފަގީރުންނަށް ކާބޯތަކެތީގެ އެހީތެރިކަނ ފޯރުކޮށްދޭން ފައިސާ ހަރަދު ކުރި
- އިޒްރޭލާއި ޔޫއޭއީގެ ގުޅުން ނޯމަލައިޒް ކުރުމަށް ތާއީދުކޮށް 2020 ވަނަ އަހަރު ވާހަކަ ދެއްކެވި
- އިޒްރޭލުގެ ޝެބާ މެޑިކަލް ސެންޓަރުން ބޭއްވި ފަންޑް ރެއިޒިން ހަރަކާތެއްގައި ބައިވެރިވެވަޑައިގެންނެވި
ފާޑުކިޔާ ފަރާތްތަކުން ބުނަނީ، ސަރުކާރުން އަލައްބާރައެކީ ޑީލެއް މި ހެދީ، ޔަހޫދީން ދިވެހިރާއްޖޭގައި ވަޒަންވެރިކުރުވުމުގެ ނިޔަތުގައި ކަމަށެވެ. އެކަމަށް އިންޒާރު ކުރެއްވި އެއް ބޭފުޅަކީ ރާއްޖޭގެ ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދެވެ.
"މިހާރު މި ތަނަށް ނުސީދާކޮށް ޔަހޫދީން ވަނުމަށްޓަކައި މި މަގުކޮށާ ނިމުނީ. އަދި މި ވާހަކައަކީ ހަދައިގެން ދައްކާ ވާހަކައެއް ވެސް ނޫން،" ޖަމީލް ވިދާޅުވި އެވެ.
ޖަމީލު ވިދާޅުވީ، މުއިއްޒު ރާއްޖެ މި ގެންދަނީ ނުރައްކާތެރި މަގަކުން ކަމަށެވެ. އަދި އެކަމާމެދު ގައުމު ދެކެ ލޯބިވާ ކޮންމެ މީހަކު ވެސް ވިސްނަންޖެހޭ ކަމަށް އޭނާ ވިދާޅުވި އެވެ.
"ރާއްޖެ ދެކެ ލޯބިވާ ކޮންމެ ރައްޔިތަކަށް މިއަށްވުރެ މިއަށްވުރެ ކަންބޮޑުވާ ކަމެއް ނޯންނާނެ އިނގޭތޯ. އަޅުގަނޑެއް މި ދައްކަނީކީ ތޯތޯ ވާހަކައެއް ނޫން. އަދި ފަހަރެއްގައި މި ދައްކާ ވާހަކަ މި ދައްކާ މިންވަރުން ރާއްޖޭގެ ރައްޔިތުންނަކަށް މިވަގުތު މީގައި ހުރި ހައްސާސްކަމާއި މީގައި ހުރި ނުރައްކާތެރިކަން އިހުސާސް ނުވެދާނެ އިނގޭތޯ. އެހެންނަމަވެސް މި ނަގާ ފިޔަވަޅަކީ މި ރާއްޖެ އޮތުމާ ނެތުމުގެ ސުވާލެއް، މި ރާއްޖެ އޮތުމާ ނެތުމުގެ ސުވާލެއް އިނގޭތޯ. މިދައްކަނީ ތޯތޯ ވާހަކައެއް ނޫން،" ޖަމީލް ވިދާޅުވި އެވެ.
~~
ދިވެހިންނަށް ދޭން ކަމަށް ބުނެ ހިއްކަ ރަސްމާލެ ކުއްލިއަކަށް ބިދޭސީ ކުންފުންޏަކަށް ދޫކޮށްލުމަކީ އާދައިގެ ކަމެއް ނޫނެވެ. އެތަން ދުވަހަކު ވެސް ދިވެހިންނަށް ނުލިބޭ ގޮތަށް، ދިވެހިންގެ އެއްވެސް މަޝްވަރާއެއް ނުހޯދާ ދޫކޮށްލުމަކީ ކުރެވިގެންވާނެ ކަމެއް ނޫނެވެ.
ދިވެހިންގެ ނުރުހުމުގައި އަދި ހެއި ވެސް އަހައިނުލައި ރައީސް މުއިއްޒުގެ ސަރުކާރުން މި ކުރަން އުޅޭ ކަންތަކާމެދު ފާރުވެރިވާންޖެހެ އެވެ. ބޮޑު ސިއްރެއްގެ ގޮތުގައި ރައްކާކޮށްފައި އޮތް އެ އެގްރިމެންޓު ހާމަ ކުރަންޖެހެ އެވެ. ރައީސް މުއިއްޒާމެދު ދިވެހިން ފަރުވާތެރިވާންޖެހެ އެވެ. އެހެން ނޫން ނަމަ ފެންނާނީ މުޅި ގައުމު ބީވެގެންދަ މަންޒަރެވެ.
