ޓެނެސީގެ ޖަލެއްގައި މަރުގެ އަދަބު ތަންފީޒުކުރުމަށް ހުކުމްކޮށްފައިވާ ކްރިސްޓާ ޕައިކްގެ ގަޔަށް ވިހަ އިންޖެކްޝަން ޖަހައިގެން މަރާލުމަށް ކުރި މަސައްކަތް ނާކާމިޔާބުވުމާ ގުޅިގެން، އޭނާއަށް ހޮސްޕިޓަލުގައި ފަރުވާދޭން ފަށާފައިވާ ކަމަށް އޭނާގެ ވަކީލު ވިދާޅުވެއްޖެ އެވެ.
މަރުގެ ހުކުމް ތަންފީޒުކުރަމުން ދިޔަ ވަގުތު، އެކަން ހުއްޓުވުމަށް އެދި ޕައިކްގެ ގާނޫނީ ޓީމުން ކޯޓަށް ކުއްލި މައްސަލައެއް ހުށަހެޅި އެވެ. އެ ހުށަހެޅުމުގައި ބުނެފައިވަނީ ޕައިކްގެ ހޭނެތިފައިވީ ނަމަވެސް، އޭނާގެ ހިތް އަދިވެސް ހިނގަމުންދާ ކަމަށާއި އޭނާ ނިދީގައި ގުގުރިދަމާ އަޑު އިވޭ ކަމަށެވެ.
ބީބީސީއަށް މައުލޫމާތު ދެމުން ޕައިކްގެ ވަކީލަކު ވިދާޅުވީ، އުމުރުން 50 އަހަރުގެ ޕައިކްގެ ގަޔަށް "ޕެންޓޯބާބިޓަލް" ގެ ދެ އިންޖެކްޝަން ޖެހުމަށްފަހު، މިހާރު އޭނާއަށް ހޮސްޕިޓަލުގައި ފުރާނަ ސަލާމަތްކުރުމުގެ ފަރުވާ ދެމުންދާ ކަމަށެވެ.
އުމުރުން 19 އަހަރުގެ ކޮލީން ސްލެމާ މަރާލި މައްސަލާގައި ޕައިކްގެ މައްޗަށް މަރުގެ ހުކުމް އިއްވީ 1996 ވަނަ އަހަރު އެވެ.
ޕައިކް އާއި އޭނާގެ އޭރުގެ ލޯބިވެރިޔާ ޓަޑަރީލް ޝިޕް، ސްލެމާ އަށް އަނިޔާކޮށް، ރަހުމުކުޑަ ގޮތަކަށް މަރާލިއިރު ޕައިކްގެ އުމުރަކީ 18 އަހަރެވެ. އެމީހުންނަށް ސްލެމާ ފުރަތަމަ ބައްދަލުވީ މައްސަލަޖެހޭ ކުދިންނަށް ހާއްސަކޮށްގެން ހިންގި ތަމްރީނު ކޭމްޕަކުންނެވެ.
ސްލެމާގެ މަންމަ މޭ މާޓިނޭޒް، އެސޯސިއޭޓެޑް ޕްރެސް (އޭޕީ) އަށް ހޮނިހިރު ދުވަހު ދިން އިންޓަވިއުއެއްގައި ބުނީ އޭނާ ބޭނުންވަނީ ޕައިކްގެ މަރުގެ ހުކުމް ތަންފީޒުކުރަން ކަމަށެވެ. "އެކަމާ މެދު ވިސްނާ ކޮންމެ ފަހަރަކު، ކޮލީންއަށް ލިބޭނެ ތަދާއި، ތެދުވެގެން ދުވަން އޭނާ ކުރާނެ މަސައްކަތް އަހަރެންގެ ހިތަށް އަރާ،" އޭނާ ބުންޏެވެ.
ނޭޝްވިލްގެ ރިވަބެންޑް މެކްސިމަމް ސެކިއުރިޓީ އިންސްޓިޓިއުޝަންގައި ޕައިކްގެ މަރުގެ ހުކުމް ތަންފީޒުކުރަން މަސައްކަތްކުރީ ބުދަ ދުވަހުގެ ރޭ އެ ގައުމުގެ ގަޑިން 20:00 ހާއިރު އެވެ.
އޭޕީން ރިޕޯޓްކޮށްފައިވާ ގޮތުގައި، ޕައިކްގެ ގަޔަށް ޕެންޓޯބާބިޓަލްގެ ދެ ޑޯޒް ޖެހިއިރު، އެ މަންޒަރު ބަލަން ތިބި މީހުން ތިބި ކޮޓަރީގެ ފަރުދާ ދެ ފަހަރެއްގެ މަތިން ދަމައި ބަންދުކުރި އެވެ.
އަދި ވަކި ހިސާބަކުން މީޑިއާތަކަށް އެ ސަރަހައްދު ދޫކޮށް ދިއުމަށް އެންގި ކަމަށްވެސް އެ ނިއުސް އެޖެންސީން ބުނެފައިވެއެވެ.
ޕައިކްގެ ގާނޫނީ ޓީމުން "ދަ ޓެނެސީއަން" ނޫހަށް ދިން ބަޔާނެއްގައި ބުނީ، މިރޭ ޓެނެސީ ދައުލަތަށް ގާނޫނީ ހަމަތަކުގެ މަތިން މަރުގެ ހުކުމް ތަންފީޒުކުރުމުގައި އަނެއްކާވެސް ނާކާމިޔާބުވެފައިވާ ކަމަށެވެ.
"އަހަރެމެން ދެއްކި ވާހަކަ ތެދުވުމަކީ އަހަރެމެން އުފާކުރާ ކަމެއް ނޫން. ނަމަވެސް ޕައިކްގެ ފަރާތުން ފާހަގަކުރި ކަންބޮޑުވުންތައް މިވަނީ ތެދުވެފައި. އެއީ ނާރު ހޯދަން އުނދަގޫވުމާއި، ނާރު ފަޅައިގެން ދިއުމާއި، ބޭނުންކުރި ބޭހުގެ ފެންވަރު ދަށްވުމާއި، ކަމެއް ގޯސްވުމުން ދޭނެ ކުއްލި ސިއްހީ ފަރުވާ ނެތުން ފަދަ ކަންކަން. މި ހުރިހާ ކަމެއްވެސް ހިނގާފައި މިވަނީ ސިއްރުވެރިކަމުން ފުރިގެންވާ އުސޫލެއްގެ ދަށުން،" އެ ބަޔާނުގައި ވެ އެވެ.
ވިހަ އިންޖެކްޝަން ޖެހުމުގައި މައްސަލަތަކެއް ކުރިމަތިވުމާ ގުޅިގެން، ޕައިކްގެ ވަކީލުން ވަނީ ހުކުމް ތަންފީޒުކުރުން މަޑުޖައްސާލައި އޭނާއަށް ސިއްހީ ފަރުވާ ދިނުމަށް އެދި ކުއްލި މައްސަލައެއް ހުށަހަޅާފަ އެވެ.
ޑިސްޓްރިކްޓް ޖަޖް ކްލިފްޓަން އެލް ކޯކާ ނެރުއްވި އަމުރެއްގައި ފާހަގަކުރައްވާފައިވަނީ، މައްސަލައިގައި އެދިފައިވާ ފަދައިން ސިއްހީ މާހިރުން މިހާރު ޕައިކަށް ފަރުވާ ދޭން ފަށާފައިވާ ކަމަށެވެ.
ނަމަވެސް، ޓެނެސީ ޑިޕާޓްމަންޓް އޮފް ކަރެކްޝަނުން ބުނީ ހުކުމް ތަންފީޒުކުރުމުގެ ތެރޭގައި އެޅި ހުރިހާ ފިޔަވަޅުތަކަކީވެސް ރަނގަޅު ފިޔަވަޅުތަކެއް ކަމަށެވެ.
"ޓެނެސީ ޑިޕާޓްމަންޓް އޮފް ކަރެކްޝަނުން އަމަލުކުރީ އެޓާނީ ޖެނެރަލްގެ އޮފީހުން ފާސްކޮށްފައިވާ، ދައުލަތުގެ ގާނޫނީ އުސޫލުތަކާ އެއްގޮތަށް. ބޭނުންކުރި ކެމިކަލަކީ އަބަދުވެސް ނަތީޖާ ފެންނަ އެއްޗެއް. އަދި މިރޭ ކުރިއަށް ގެންދިޔަ ކަންކަމުގެ އިތުރުން އެހެން ކަމެއް ކުރުމަކަށް އުސޫލު ތަނެއް ނުދޭ. ކްރިސްޓާ ޕައިކް މިހާރު ވަނީ ޖަލުން ބޭރުގެ ސިއްހީ މަރުކަޒަކަށް ބަދަލުކުރެވިފައި،" އެ ޑިޕާޓްމަންޓްގެ ތަރުޖަމާނު ޑޮރިންޑާ ކާޓާ "ދަ ޓެނެސީއަން" ނޫހަށް ވިދާޅުވި އެވެ.
ޕައިކްގެ ގާނޫނީ ޓީމުގެ ސިއްހީ މާހިރެއްގެ ގޮތުގައި މަސައްކަތްކުރައްވާ އެމޮރީ ޔުނިވާސިޓީގެ ޕްރޮފެސަރު ޑރ. ޖޮއެލް ޒިވޮޓް ބީބީސީއަށް ވިދާޅުވީ، ޕައިކްގެ ހަށިގަނޑަށް ޖެހި ބޭހުގެ މިންވަރު، އޭނާގެ ނޭވާ ހުއްޓި ހިތް ހުއްޓޭ ވަރަށް ލޭގެ ތެރެއަށް ފޯރާފައި ނުވާ ކަމަށް ބެލެވޭ ކަމަށެވެ.
އެމެރިކާގެ ސުޕްރީމް ކޯޓުން 1976 ވަނަ އަހަރު މަރުގެ އަދަބު އަލުން ދޭން ފެށި ފަހުން، މިހާތަނަށް އެ ގައުމުގައި މަރުގެ ހުކުމް ތަންފީޒުކޮށްފައިވަނީ އެންމެ 18 އަންހެނުންގެ މައްޗަށެވެ. އެއާ ޚިލާފަށް 1,663 ފިރިހެނުންގެ މައްޗަށް ވަނީ މަރުގެ ހުކުމް ތަންފީޒުކޮށްފައެވެ. މިއީ އެމެރިކާގައި ތަންފީޒުކުރާ މަރުގެ ހުކުމްތަކުގެ ގާތްގަނޑަކަށް އެއް އިންސައްތައެވެ.
