ނައިޖީރިއާގެ ބިލިއަނަރު އަލީކޯ ޑަންގޯޓޭ، އިތިއޯޕިއާ އާއި ޖިބޫޓީއާ ދެމެދު 660 މިލިއަން ޑޮލަރު (500 މިލިއަން ޕައުންޑް) ގެ ތެޔޮ ހޮޅިއެއް އެޅުމުގެ މަޝްރޫއަށް ފަންޑުކޮށްދޭން ނިންމާފައިވާކަން އިއުލާނުކޮށްފި އެވެ.
މި މަޝްރޫއުގެ ދަށުން ޖިބޫޓީގެ ދަމަރުޖޮގް ބަނދަރާއި އިތިއޯޕިއާގެ ދިވެލޭގައި ހުންނަ ތެޔޮ ބަހާ މަރުކަޒާ ދެމެދު 120 ކިލޯމީޓަރު (75 މޭލު) ގެ ހޮޅިއެއް އެޅުމުގެ އިތުރުން، ގާތްގަނޑަކަށް 400 މިލިއަން ލީޓަރުގެ ތެޔޮ ރައްކާކުރެވޭނެ އިންތިޒާމު ގާއިމުކުރެވޭނެ އެވެ.
މި މަޝްރޫއުގެ އަމަލީ މަސައްކަތް ނިމި، ކުރިއަށް އޮތް 18 މަސްދުވަހުގެ ތެރޭގައި ހިދުމަތް ދޭން ފެށޭނެ ކަމަށް ބެލެވެ އެވެ. އިތިއޯޕިއާގެ ބޮޑުވަޒީރު އަބީ އަހުމަދު ވިދާޅުވީ، މި ހޮޅި އެޅުމުން ޖިބޫޓީގެ ބަނދަރުން އިތިއޯޕިއާގެ ވެރިރަށް އެޑިސް އަބާބާއަށް ތެޔޮ އުފުލުމަށް ހޭދަވާ ފަސް ދުވަހުގެ މުއްދަތު އެއް ދުވަހަށް ކުޑަވެގެންދާނެ ކަމަށެވެ.
މަޝްރޫއުގެ ފުރަތަމަ ފިޔަވަހީގައި އުފުލުމަށް ހަމަޖެހިފައިވަނީ މަތިންދާބޯޓަށް އަޅާ ތެލާއި، ޑީސަލް އަދި ޕެޓްރޯލް ފަދަ މުހިންމު ތެލުގެ ބާވަތްތަކެވެ. މަޝްރޫއުގެ ބިންގާ އެޅުމުގެ ރަސްމިއްޔާތުގައި ވާހަކަދައްކަވަމުން އެފްރިކާގެ އެންމެ މުއްސަނދި މަހުޖަނު ޑަންގޯޓޭ ވިދާޅުވީ، މި މަޝްރޫއުގެ ސަބަބުން އިތިއޯޕިއާގެ ހަކަތައިގެ ރައްކާތެރިކަން ވަރުގަދަވެ، ތެޔޮ ފޯރުކޮށްދިނުމުގެ ނިޒާމަށް ކުރިމަތިވާ ގޮންޖެހުންތައް ކުޑަވެގެންދާނެ ކަމަށެވެ.
ވަށައިގެން ބިން އޮންނަ، ކަނޑާ ގުޅުމެއް ނެތް އިތިއޯޕިއާއަކީ ތެލުގެ ބާވަތްތައް އެތެރެކުރުމަށް ޖިބޫޓީގެ ބަނދަރަށް ވަރަށް ބޮޑަށް ބަރޯސާވާ ގައުމެކެވެ. މި އާ އިންފްރާސްޓްރަކްޗާގެ ސަބަބުން ދަތުރުފަތުރާއި، އޭވިއޭޝަނާއި، ދަނޑުވެރިކަން އަދި އިމާރާތްކުރުމުގެ ދާއިރާއަށް ބޭނުންވާ ތެޔޮ އުފުލުމުގައި މިހާރު ހުރި ދަތިތަކަށް ލުޔެއް ލިބޭނެ ކަމަށް އުންމީދު ކުރެވެ އެވެ.
ޑަންގޯޓޭ ސިމެންތި ކުންފުންޏަކީ އަހަރަކު ގާތްގަނޑަކަށް 55 މިލިއަން ޓަނުގެ ސިމެންތި އުފެއްދުމުގެ ގާބިލުކަން ހުރި ކުންފުންޏެކެވެ. އަދި ނައިޖީރިއާގައި ހުންނަ އޭނާގެ ތެޔޮ ސާފުކުރާ ކާރުހާނާއިން މިހާރު ދުވާލަކު 700،000 ފީފާގެ ސާފުނުކުރާ ތެޔޮ ސާފުކުރާއިރު، އެ އަދަދު 1.4 މިލިއަން ފީފާއަށް އިތުރުކުރުމަށް ދަނީ މަސައްކަތް ކުރަމުންނެވެ.
އެ ކާރުހާނާއިން ދާދިފަހުން ވަނީ ނައިޖީރިއާގެ ސްޓޮކް އެކްސްޗޭންޖުގައި 4.1 ބިލިއަން އާންމު ހިއްސާ ލިސްޓުކޮށް، ގާތްގަނޑަކަށް 1.63 ބިލިއަން ޑޮލަރު (1.2 ބިލިއަން ޕައުންޑް) ހޯދުމަށް އަމާޒު ހިފާފަ އެވެ.
