ރައްޔިތުންގެ މަޖިލީހުގެ މެޖޯރިޓީ ލީޑަރު އިބްރާހިމް ފަލާހުގެ ނަމުގައި ޑޮލަރު ގަނެވިއްކާ ކުންފުންޏެއް އުފައްދާފައިވާކަން އޭނާގެ މާލީ ބަޔާނުން ހާމަވެއްޖެ އެވެ.
ވިހިވަނަ މަޖިލީހުގެ މެންބަރުންގެ ދެވަނަ އަހަރުގެ މާލީ ބަޔާން މަޖިލީހުގެ ވެބްސައިޓުގައި މިހާރު ވަނީ ޝާއިއުކޮށްފަ އެވެ. ފަލާހުގެ މާލީ ބަޔާނުން އެނގޭ ގޮތުގައި މިދިޔަ އަހަރުގެ ތެރޭގައި ދެ ކުންފުންޏެއް އޭނާ ވަނީ އުފައްދާފަ އެވެ.
އެއީ "ސަން ކަރަންސީ އެކްސްޗޭންޖު" ގެ ނަމުގައި އުފެއްދި ޑޮލަރު ގަނެވިއްކާ ކުންފުންޏަކާއި "ސަން ކްރަފްޓް ކޮންސްޓްރަކްޝަން" ގެ ނަމުގައި އުފައްދާފައިވާ ކޮންސްޓްރަކްޝަން ކުންފުންޏެކެވެ. އެ ދެ ކުންފުނީގެ ވެސް 90 ޕަސެންޓު ހިއްސާ ފަލާހުގެ އޮވެ އެވެ. އޭނާއަކީ އިތުރު ތިން ކުންފުންޏެއްގެ ވެސް ހިއްސާދާރެކެވެ.
ފަލާހުއަށް މުސާރައިގެ ގޮތުގައި މަޖިލީހުން 990،000ރ. ލިބުނުއިރު ވިޔަފާރީގެ ނަފާގެ ގޮތުގައި މިދިޔަ އަހަރު އޭނާއަށް 1.8 މިލިއަން ރުފިޔާ ލިބުނެވެ. އަދި ކުލީގެ ގޮތުގައި މިދިޔަ އަހަރު 2.8 މިލިއަން ރުފިޔާ ލިބުނެވެ. މިދިޔަ އަހަރުގެ ތެރޭގައި ފަލާހު ވަނި ބޭންކް އޮފް މޯލްޑިވްސް އިން 15 މިލިއަން ރުފިޔާގެ ލޯނެއް ވެސް ނަގާފަ އެވެ.
އޭނާގެ ނަމުގައި ފަސް ބިން އެބައޮތެވެ. އެއީ މިދިޔަ އަހަރު 21 މިލިއަން ރުފިޔާއަށް ހުޅުމާލެއިން ގަނެފައިވާ ބިމަކާއި އިންނަމާދޫ ފަލަކް، ފަތް، އަސުރުހިޔާ އަދި މާލެއިން ގަނެފައިވާ މ. އަސުރުކުރި އެވެ. މާލެއިން އޭނާ ގޯތި ގަތީ ހަތަރު މިލިއަން ރުފިޔާއަށް ކަމަށް ފަލާހު ބުނެ އެވެ.
