އޮސްޓްރޭލިޔާ މޯލްޑިވްސް ފްރެންޑްޝިޕް އެސޯސިއޭޝަން (އަމްފާ) އިން އިންތިޒާމުކޮށްގެން ރާއްޖޭގައި ފުރަތަމަ ފަހަރަށް ހިންގި މޯލްޑިވްސް ޖޫނިއA ލައިފްގާޑު ޕްރޮގްރާމުގެ ޕައިލެޓް ޕްރޮގްރާމްތައް ކާމިޔާބުކަމާއެކު ނިންމާލައިފި އެވެ.
މި ޕްރޮގްރާމަކީ ކަނޑުމަތީގެ ސަލާމަތާއި ރައްކާތެރިކަމަށް ޒުވާނުން އަހުލުވެރިކުރުވުމަށް އަމާޒުކޮށްގެން ކުރިއަށް ގެންދިޔަ ހަރަކާތެކެވެ. މި ޕްރޮގްރާމްގެ ޕައިލެޓް މަރުހަލާ ކުރިއަށް ގެންގޮސްފައިވަނީ ކ. ތުލުސްދޫ އާއި ފުވައްމުލަކު ސިޓީގަ އެވެ.
އެގޮތުން ސެޕްޓެމްބަރު މަހުގެ 12 އިން 14 އަށް ތުލުސްދޫގައި ޕްރޮގްރާމް ހިންގާފައިވާއިރު، ފުވައްމުލަކުގައި މި ޕްރޮގްރާމް ކުރިއަށް ގެންގޮސްފައިވަނީ ސެޕްޓެމްބަރު 16 އިން 18 އަށެވެ. ކޮންމެ ރަށެއްގައި ތިން ދުވަހުގެ މުއްދަތަށް ކުރިއަށް ގެންދިޔަ މި ތަމްރީނުތަކުގައި، ތުލުސްދޫން އެކަނިވެސް 24 ބައިވެރިން ވަނީ ޕްރޮގްރާމް ފުރިހަމަކޮށްފަ އެވެ.
މޯލްޑިވްސް ޖޫނިއާ ލައިފްގާޑް ޕްރޮގްރާމަކީ އުމުރުން 11 އަހަރާއި 17 އަހަރާ ދެމެދުގެ ޒުވާނުން ބާރުވެރިކުރުވުމަށް ފަރުމާކޮށްފައިވާ ޕްރޮގްރާމެކެވެ. ވޯޓާ ޕެޓްރޯލް އޮސްޓްރޭލިއާއާ ގުޅިގެން ހިންގި މި ހަރަކާތުގައި ކަނޑުމަތީގެ ރައްކާތެރިކަމާއި، މީހުން ސަލާމަތްކުރުމުގެ އަސާސީ ހުނަރުތަކާއި، ފުރަތަމަ އެހީގެ އިތުރުން ތިމާވެށްޓަށް ޒިންމާދާރުވުމާއި ލީޑަޝިޕުގެ ހުނަރުތައް ދަސްކޮށްދީފައިވެ އެވެ.
މި ހުރިހާ ތަމްރީނުތަކެއް ކުރިއަށް ގެންގޮސްފައިވަނީ ކްލާސްރޫމް ސެޝަންތަކާއި އަމަލީ ހަރަކާތްތައް ހިމެނޭ ގޮތަށެވެ.
ޕައިލެޓް ޕްރޮގްރާމްތައް ނިމުމާ ގުޅިގެން، އަމްފާގެ ރައީސް ޑރ. އިބްރާހީމް ހަސަން ވިދާޅުވީ މި ތަޖުރިބާގެ އަލީގައި ކުރިއަށް އޮތް ތަނުގައި ޕްރޮގްރާމު އިތުރަށް ތަރައްގީކޮށް ހަރުދަނާކުރެވޭނެ ކަމަށެވެ. އަދި، އަމްފާގެ އަމާޒަކީ 2027 ވަނަ އަހަރު މި ޕްރޮގްރާމް ރާއްޖޭގެ އެކި ރަށްރަށުގައި ފުޅާދާއިރާއެއްގައި ހިންގުން ކަމަށް އޭނާ ފާހަގަކުރެއްވި އެވެ.
މިކަމަށްޓަކައި ޝައުޤުވެރިވާ ރަށު ކައުންސިލްތަކާއި ސިޓީ ކައުންސިލްތަކަށް ޕާޓްނަރުންގެ ގޮތުގައި ބައިވެރިވުމުގެ ފުރުސަތު ކުރިއަށް އޮތް ތަނުގައި ހުޅުވާލެވޭނެ އެވެ.
އަމްފާގެ ނައިބު ރައީސް އަދި މި ޕްރޮޖެކްޓްގެ ލީޑް އާމިނަތު ސޮލާހު ވިދާޅުވި ގޮތުގައި، މި ޕްރޮގްރާމްގެ ދުރު ރާސްތާގެ އަމާޒަކީ ހަމައެކަނި ތަމްރީނެއް ދިނުމެއް ނޫނެވެ. އޭގެ ބަދަލުގައި ރަށްރަށުގެ މުޖުތަމައުތަކުގައި އަމިއްލަ ގާބިލުކަން ބިނާކޮށް، މޫދުގެ ރައްކާތެރިކަމުގެ ހުނަރުތައް ދަސްކޮށްދޭނެ ލޯކަލް ޓްރޭނަރުން އުފެއްދުމަކީ އެ ޖަމިއްޔާގެ ބޮޑު ތަސައްވުރެކެވެ. މީގެ ސަބަބުން މުޖުތަމައުގެ ބައިވެރިވުމާއެކު ދެމެހެއްޓެނިވި ގޮތެއްގައި މި މަސައްކަތް ކުރިއަށްދާނެ ކަމަށް އޭނާ ވިދާޅުވި އެވެ.
މި ޕްރޮގްރާމް ހިންގުމުގައި އަމްފާއިން ފަންނީ އެހީތެރިކަމާއި، ތަމްރީނު ކުރުމުގެ އޮނިގަނޑާއި، ބޭނުންވާ ސާމާނު ފޯރުކޮށްދޭނެ އެވެ. ނަމަވެސް ރަށްރަށުގައި މިކަން ކުރިއަށް ގެންދިއުމަށް ބޭނުންވަނީ ކައުންސިލްތަކުގެ ފުރިހަމަ އެއްބާރުލުމާއި ކޯޑިނޭޝަން ކަމަށް އެ ޖަމިއްޔާއިން ބުނެ އެވެ. 2027 ވަނަ އަހަރުގެ ޕްރޮގްރާމްތަކުގައި ބައިވެރިވުމަށް ޝައުޤުވެރިވާ ކައުންސިލްތަކަށް އެ ފުރުސަތު ހުޅުވާލާނެ ގޮތުގެ ތަފްސީލުތައް އަމްފާއިން ކުރިއަށް އޮތް ތަނުގައި އާންމުކުރާނެ އެވެ.
