އިޓަލީގެ ނުފޫޒުގަދަ މާފިއާ ގްރޫޕަކުން އޭނާގެ މަންމަ މަރާލި މައްސަލާގައި ބައްޕައާ ދެކޮޅަށް ހެކިބަސް ދިން ޑެނީޒް ކޮސްކޯ އަމިއްލައަށް މަރުވެއްޖެ ކަމަށް ބެލެވޭ ހިތާމަވެރި ހާދިސާއެއް ހިނގައިފި އެވެ.
އުމުރުން 35 އަހަރުގެ ޑެނީޒް ފެނުނީ މިދިޔަ އާދީއްތަ ދުވަހު ރޯމްގައި ވަރަށް ބޮޑަށް ޒަހަމްވެފައި އޮއްވައެވެ. އޭނާ މަރުވީ ހޮސްޕިޓަލުގައި ފަރުވާ ދެމުން ދަނިކޮށެވެ.
ޑެނީޒްގެ މަންމަ ލިއާ ގަރޮފަލޯ އަކީ އިޓަލީގެ ދެކުނުގައި ހަރަކާތްތެރިވާ ނުރައްކާތެރި އެންޑްރަންގެޓާ ކްލޭންއާ ދެކޮޅަށް ދައުލަތަށް ހެކިބަސް ދިނުމާ ގުޅިގެން 2009 ވަނަ އަހަރު މަރާލެވުނު އަންހެނެކެވެ. އޭނާ މަރުވިއިރު އުމުރަކީ 35 އަހަރެވެ. މިއީ އޭނާގެ ދަރިފުޅު ޑެނީޒް މަރުވި އުމުރުވެސް މެއެވެ. ލިއާ ގަރޮފަލޯ އަކީ މާފިއާއާ ދެކޮޅަށް ތެދުވި ހިތްވަރުގަދަ ޝަހުސިއްޔަތެއްގެ ގޮތުގައި މުޅި އިޓަލީގައި މަޝްހޫރުވެފައިވާ މީހެކެވެ.
ޑެނީޒްގެ ބައްޕަގެ މައްޗަށް ހިންގި ޝަރީއަތުގައި އޭނާ ދެއްކި ހިތްވަރަށް ގިނަ ބައެއްގެ ތައުރީފު ލިބުނު ނަމަވެސް، އޭގެ ފަހުން ވޭތުވެދިޔަ އަހަރުތަކުގައި އޭނާ ވަނީ ނަފްސާނީ ގޮތުން ބޮޑެތި ގޮންޖެހުންތަކަކާ ކުރިމަތިލާފަ އެވެ. މާފިއާއާ ދެކޮޅަށް މަސައްކަތްކުރާ ގާނޫނީ ވަކީލު އަދި ސެނެޓަރު އެންޒާ ރަންޑޯ ވިދާޅުވި ގޮތުގައި ޑެނީޒްގެ މަރަކީ މުޅި ގައުމަށް ލިބުނު ފުން ހިތާމައެކެވެ. މާފިއާއަކީ ހަމައެކަނި މީހުން މަރާ ބައެއް ނޫން ކަމަށާއި، އެއީ ދިރިތިބި މީހުންގެ ރޫހާއި ދިރިއުޅުމުގައި ބިރުވެރިކަން އުފައްދާ ބައެއްކަން މި ހާދިސާއިން ހާމަވާ ކަމަށް އޭނާ ވިދާޅުވިއެވެ.
މަންމަގެ މަރަށްފަހު ޑެނީޒް ދިރިއުޅެމުން ދިޔައީ ދައުލަތުގެ ހިމާޔަތުގެ ދަށުން ނަން ބަދަލުކޮށްގެންނެވެ. ނަމަވެސް އޭނާގެ ހަޔާތުގައި އުފެދިފައިވާ ހުސްކަމެއްގެ ސަބަބުން، ފަހަކަށް އައިސް ޖަލުގައި ހުރި އޭނާގެ ބައްޕަ ކާލޯ ކޮސްކޯއާ އަލުން ގުޅުން ބޭއްވި ކަމަށް މައުލޫމާތު ލިބެއެވެ. ޑެނީޒްގެ ގާތް އެކުވެރިން ބުނާ ގޮތުގައި އޭނާ ދިޔައީ ނަފްސާނީ ބަލިމަޑުކަމާއި މަސްތުވާތަކެތީގެ ވަބާއާ ހަނގުރާމަކުރަމުންނެވެ.
ޑެނީޒްގެ ބައްޕަ ކާލޯ ކޮސްކޯ ވަނީ އޭނާގެ އަންހެނުން ލިއާ މަރާލުމަށްފަހު، އޭނާ އޮސްޓްރޭލިއާއަށް ދިޔައީ ކަމަށް ބުނެ ދަރިފުޅަށް އޮޅުވާލާފައެވެ. ނަމަވެސް ހަގީގަތަކީ ކާލޯ އޭނާގެ އަންހެނުން މަރާލުމަށްފަހު ހަށިގަނޑު އަންދާލީއެވެ. މި މައްސަލާގައި ކާލޯއާއި އޭނާގެ ބައިވެރިން މިހާރުވެސް ދަނީ އުމުރު ދުވަހުގެ ޖަލު ހުކުމެއް ތަންފީޒު ކުރަމުންނެވެ.
ޑެނީޒްގެ މަރާ ގުޅިގެން އިޓަލީގެ ޕްރޮސެކިއުޓަރުން މިހާރު ވަނީ ތަހުގީގެއް ފަށާފައެވެ. މި ތަހުގީގުގައި އޭނާ އަމިއްލައަށް މަރުވުމަށް އެއްވެސް މީހަކު ހިތްވަރު ދީފައިވޭތޯ ބަލާނެއެވެ. އަދި އޭނާގެ ފޯނު ފުލުހުންގެ ބެލުމުގެ ދަށަށް ގެންގޮސް ދިރާސާ ކުރަމުންދާ ކަމަށްވެސް ރިޕޯޓުތައް ބުނެއެވެ.
މާފިއާއާ ދެކޮޅަށް މަސައްކަތްކުރާ ޖަމިއްޔާއެއްގެ ރައީސް ލުއިޖީ ޗިއޮޓީ ވިދާޅުވި ގޮތުގައި ޑެނީޒްގެ މުޅި ހަޔާތް ބިނާވެފައިވަނީ ހިތްވަރާއި ވޭނުގެ މެދުގައެވެ. އަދި އެ ނާޒުކު ހަމަހަމަކަން މިއަދު މުޅިން ނެތިގޮސްފައިވާ ކަމަށް އޭނާ ފާހަގަކުރެއްވިއެވެ. ޑެނީޒްގެ ހަނދާނުގައި މިލާންގައި ހާއްސަ އެއްވުމެއް ބޭއްވުމަށްވެސް ވަނީ ހަމަޖެހިފައެވެ.
