އެއް ފަހަރު ބޭނުންކޮށްފައި އުކާލާ (ސިންގަލް ޔޫސް) ޕްލާސްޓިކުގެ ބާވަތްތައް ބޭނުންކުރުން ހުއްޓުވުމުގެ ގޮތުން 2022 ވަނަ އަހަރުން ފެށިގެން ރާއްޖެއަށް އެތެރެކުރުން މަނާކޮށްފައިވާ ޕްލާސްޓިކް ހޮޅި، 2031 ވަނަ އަހަރާ ހަމައަށް އެތެރެކުރެވޭ ގޮތަށް ބަދަލު ގެނައީ ކަރުދާސް ހޮޅި ބޭނުންކުރުމުގައި ދަތިތަކެއް ހުރުމުން ކަމަށް ސަރުކާރުން ހާމަކޮށްފި އެވެ.
ގާނޫނުތައް އޮންނަ ގޮތުން ރާއްޖެއަށް އިމްޕޯޓުކުރުން މަނާ ސިންގަލް ޔޫސް ޕްލާސްޓިކުގެ ބާވަތްތަކުގެ ލިސްޓު ކަނޑައެޅުމުގެ ބާރު ލިބެނީ ރައީސުލްޖުމްހޫރިއްޔާއަށެވެ. އަދި، 2020 ވަަނަ އަހަރުން ފެށިގެން ކޮންމެ އަހަރެއްގައި އަންނަނީ އެތެރެކުރުން މަނާ ބާވަތްތައް ހިމެނޭ ލިސްޓު ނެރެމުންނެވެ.
އެ ގޮތުން، ޕްލާސްޓިކް ހޮޅިއަކީ އެންމެ ފުރަތަމަ ނެރުނު ގަރާރުގެ ދަށުން ޖޫން 1، 2021 އިން ފެށިގެން އެތެރެކުރުން މަނާކޮށްފައިވާ ބާވަތެކެވެ. އަދި، ޖެހިގެން އައި އަހަރުގެ ޑިސެމްބަރު 19، އިން ފެށިގެން ޕްލާސްޓިކް ހޮޅި އުފެއްދުމާއި ބާޒާރަށް ނެރުން ވަނީ މަނާކޮށްފަ އެވެ.
ނަމަވެސް އިއްޔެ ސަރުކާރުން ނެރުނު ލިސްޓުގައި ވަނީ ޖޫން 1، 2031 ވަން ދެން ޕްލާސްޓިކް ހޮޅި އެތެރެކުރެވޭ ގޮތަށް ހަދާފަ އެވެ. މި ބާވަތުގެ ޕްލާސްޓިކް އުފެއްދުމާއި ބާޒާރަށް ނެރުން އަނެއްކާ ވެސް މަނާ ވަނީ ޑިސެމްބަރު 19، 2031 ގައި އެވެ.
"މިހާރު ބާޒާރުގައި ބޭނުންކުރާ ކަރުދާސް ހޮޅިތަކަކީ ފޫދި، ފެނަށް ގިރި ބޭނުންކުރުމަށް ދަތިތަކެއް ހިރި އެއްޗެހި ކަމަށް ފާހަގަކުރެވޭ. މިފަދަ ހޮޅިތަކުގައި ޕްލާސްޓިކް ފަށަލަ އާއި ތެރަސް ހުރުމުގެ ސަބަބުން، މައިކްރޯ ޕްލާސްޓިކް އުފެދުމުގެ ފުރުސަތު ބޮޑުކަމަށް ވެސް ފާހަގަކުރެވިފައިވާ،" އެންވާރަމަންޓު މިނިސްޓްރީން މިއަދު ބުނެފައިވެ އެވެ.
ރާއްޖޭގެ ވެއްޓަށް، ހާއްސަކޮށް ކަނޑުގެ ދިރުންތަކަށް ބޮޑު ގެއްލުމެއް ލިބޭ ޕްލާސްޓިކް މަނާކުަރަން ފެށި މަސައްކަތް އެންމެ ފުރަތަމަ ކަނޑައެޅި ތާރީހުތަކަށް ނިންމި ނަމަ، 12 ބާވަތެއްގެ ސިންގަލް ޔޫސް ޕްލާސްޓިކު ރާއްޖޭގައި އެއްވެސް ގޮތަކަށް ބޭނުންނުކުރާނެ އެވެ. ނަމަވެސް އޭރު ރޭވި ގޮތަށް، އަދި އެކި ފަހަރު މަތިން ތާރީހުތައް ފަސްކުރުމާއެކީ، ކުރިން ޑިސެމްބަރު 2023 އަށް ނިމެން އޮތް ކަމެއް މި ވަނީ 2031 އަށް ފަސްވެފަ އެވެ.
