ކުޑަކުދިން ކުޅުމަށްޓަކައި ޕްލާސްޓިކުން އުފައްދާފައި ހުންނަ ވަރަށް ގިނަ ކުޅޭ އެއްޗެހީގައި، ނުރައްކާތެރި ވިހަ ކެމިކަލްތައް އެކުލެވޭކަން ސައެންޓިފިކް ދިރާސާއަކުން ހާމަވެއްޖެއެވެ. ބްރެޒީލްގެ ދެ ޔުނިވަސިޓީއެއް ކަމަށްވާ ޔުނިވަސިޓީ އޮފް ސައޮ ޕައުލޯ އާއި ފެޑެރަލް ޔުނިވަސިޓީ އޮފް އަލްފެނާސްގެ ސައެންސްވެރިން ދާދި ފަހުން ކުރި ދިރާސާއަކުން އެނގުނު ގޮތުގައި ގިނަ ކުޅޭ އެއްޗެހީގައި ވިހަ ކެމިކަލްތައް ހުރީ، ރައްކާތެރި މިންގަނޑަށް ވުރެ މާ މަތީގައެވެ.
މި ދިރާސާގައި ކުޅޭ އެއްޗެހީގެ 70 އުފެއްދުމެއް ތަހުލީލުކޮށް، އޭގައި ނުރައްކާތެރި ކެމިކަލްތައް އެކުލެވޭ މިންވަރު ބެލިއެވެ. އެ ގޮތުން ނުރައްކާތެރި ކެމިކަލް އެކުލެވޭ ކުޅޭ އެއްޗެހީގައި އެންމެ މަތީ މިންވަރަކަށް އެކުލެވޭ ވިހަ ކެމިކަލެއްގެ ގޮތުގައި ފާހަގަކުރެވުނީ ބޭރިއަމް އެވެ. ދަވާދު، ބިއްލޫރި އަދި އެޅިގައު އުފެއްދުމުގައި އާންމުކޮށް ބޭނުންކުރާ ބޭރިއަމްއަކީ ބޭސްވެރިކަމުގެ ބައެއް އާލާތްތައް އުފެއްދުމަށް ވެސް ބޭނުންކުރާ ކެމިކަލްއެކެވެ.
ބޭރިއަމްއަކީ، އިންސާނުންގެ ހަށިގަނޑަށް އޭގެ އަސަރު ކުރުމުން، ސިއްހީ އެތައް މައްސަލަތަކެއް ކުރިމަތިކުރުވާ ވިހަ މާއްދާއެކެވެ. އޭގެ ތެރޭގައި ހަށިގަނޑު ވައު (ޕެރެލައިޒް)ވުމާއި، ހިތުގެ ހިނގުން ހަމައިން ނެއްޓުމާއި ނާރުތަކުގެ ނިޒާމަށް މައްސަލަ ޖެހުން ހިމެނެއެވެ. ސައެންސްވެރިން ބުނާ ގޮތުގައި މި ދިރާސާގައި ތަހުލީލުކުރި ޕްލާސްޓިކް އުފެއްދުންތަކުގެ 44.3 ޕަސެންޓް އުފެއްދުމުގައި، ރައްކާތެރި ކަމަށް ކަނޑައަޅާފައިވާ މިންގަނޑަށް ވުރެ 15 ގުނަ އިތުރަށް ބޭރިއަމް އެކުލެވިފައިވެއެވެ.
މީގެ އިތުރުން، ނުރައްކާތެރި މިންވަރަށް އެކުލެވޭ އެންމެ އާންމު ކެމިކަލްތަކުގެ ގޮތުގައި ފާހަގަކުރެވުނީ ލެޑް (ތިމަރަ)، ކްރޯމިއަމް އަދި އެންޓިމޮނީއެވެ. މީގެ ތެރެއިން ތިމަރައަކީ އާންމު ގޮތެއްގައި ބެޓެރީގެ ތަފާތު ބާވަތްތަކާއި ބަޑީގެ އުންޑަ އާއި ދަވާދު އުފެއްދުމުގައި ވެސް ބޭނުންކުރާ އެއްޗެކެވެ.
އިންސާނުންގެ ލޭގެ ތެރެއަށް މާ ގިނައިން ތިމަރައިގެ އަސަރު ކޮށްފިއްޔާ، އެމީހެއްގެ ނާރުތަކުގެ ނިޒާމަށް، އިއާދަނުކުރެވޭ ވަރުގެ ބޮޑެތި ގެއްލުންތަކެއް ލިބިދާނެއެވެ. އޭގެ އިތުރުން ހަނދާން ބަލިވުމާއި ކުޑަކުދިންގެ ވިސްނުމުގެ ފެންވަރު ދަށްވުމުގެ މައްސަލަ ކުރިމަތިވެއެވެ. މި ދިރާސާގައި ތަހުލީލުކުރި އުފެއްދުންތަކުގެ 32.9 ޕަސެންޓް އުފެއްދުމުގައި، ރައްކާތެރި ކަމަށް ކަނޑައަޅާފައިވާ މިންގަނޑަށް ވުރެ ހަތަރު ގުނަ އިތުރަށް ތިމަރަ އެކުލެވިފައިވެއެވެ.
ޕްލާސްޓިކް ކުޅޭ ތަކެތީގެ ވިހަ މާއްދާތައް އެކުލެވޭ މިންވަރަށް ބަލާއިރު، ދެން އެންމެ ގިނައިން ހުރި ކަމަށް ފެންނަނީ އެންޓިމޮނީ އާއި ކްރޯމިއަމް އެވެ. އެންޓިމޮނީގެ ސަބަބުން، ހަޖަމުގެ ނިޒާމާ ގުޅުން ހުރި ގުނަވަންތަކަށް މައްސަލަތައް ކުރިމަތިވެއެވެ. ހަޖަމުގެ ނިޒާމުގައި ހިމެނޭ ގުނަވަންތަކަކީ، އަނގަ، ކަރު، ކާނާ ދަތުރުކުރާ ހޮޅި، ބަނޑު، ހިމަ ގޮހޮރު، ފަލަ ގޮހޮރު، ނަޖިސް ހިނގާ ހޮޅި އަދި ފުރަގަސް ފަރާތު ދޮރެވެ.
އިންސާނާގެ ހަށިގަނޑަށް އާދައިގެ މިންވަރަކަށް ކްރޯމިއަމްގެ އަސަރު ކުރުމުން، ހަންގަނޑާއި ލޯ ހިރުވައި ކެހުމުގެ މައްސަލަ ކުރިމަތިވެއެވެ. އަދި މާބޮޑަށް މީގެ އަސަރު ކުރުމުން، ފުއްޕާމޭގެ ކެންސަރާއި ނޭފަތް ފާރުވުމާއި ގުރުދާ އާއި ފުރަމޭ ހަލާކުވުމުގެ މައްސަލަ ކުރިމަތިވެއެވެ. އާންމު ގޮތެއްގައި ސިނާއީ އުފެއްދުންތެރިކަމުގައި ކްރޯމިއަމް ބޭނުންކުރަނީ،ދަގަނޑާއި އެކަތައިގައި ދަބަރުޖެހިޔަ ނުދިނުމަށްޓަކައެވެ.
ކުޑަކުދިން ކުޅެން ހަދާފައި ހުންނަ ޕްލާސްޓިކް އެއްޗެހީގެ 24.3 ޕަސެންޓް އުފެއްދުންތަކުގައި، ރައްކާތެރި ކަމަށް ކަނޑައަޅާފައިވާ މިންގަނޑަށް ވުރެ އިތުރަށް އެންޓިމޮނީ އެކުލެވިފައިވެއެވެ. އަދި 20 ޕަސެންޓް އުފެއްދުންތަކުގައި، ރައްކާތެރި ކަމަށް ކަނޑައަޅާފައިވާ މިންގަނޑަށް ވުރެ އިތުރަށް ކްރޯމިއަމް އެކުލެވިފައިވެއެވެ.
ސައެންސްވެރިން ބުނި ގޮތުގައި މި ދިރާސާގައި ތަހުލީލުކޮށް ބަލާފައިވާނީ، އުމުރުން އެއް އަހަރުން ދަށާއި 12 އަހަރާ ދެމެދުގެ އުމުރުފުރާގެ ކުދިންނަށް ތައްޔާރުކޮށްފައި ހުންނަ ކުޅޭ އެއްޗިއްސެވެ. އަދި އެ ތަކެއްޗަކީ އެ ކުދިންގެ އަނގަޔަށް ލެވޭ ބޮޑުމިނުގެ އެއްޗެހި ކަމަށްވާތީ، ކުދިން ކުޅެން ގެންގުޅޭ އެފަދަ ތަކެތި އަނގަޔަށް ލައިގެން ހެފުން ފަދަ ކަންތައް ކުރާނެއެވެ.
ވިހަ ކެމިކަލްތައް އެކުލެވޭ ކުޅޭ އެއްޗެހި ކުދިންގެ އަނގަޔަށް ލައިގެން ހެފުމާއި ކުޅާ އެކުގައި ބުއިމަކީ، އެ ތަކެތީގައި ހުންނަ ވިހަ ކެމިކަލްތައް އެކުދިންގެ ހަށިގަނޑުގެ ތެރެއަށް ވާސިލުވާނެ ސީދާ ގޮތެކެވެ. މިއީ އާންމު ގޮތެއްގައި އެފަދަ ތަކެތި ހިފައިގެން ކުޅުމަށް ވުރެ ނުރައްކާތެރި ކަމެއް ކަމަށް ސައެންސްވެރިން ބުނެއެވެ.
މި ދިރާސާއިން އެނގުނު ގޮތުގައި ޕްލާސްޓިކުން އުފައްދާފައި ހުންނަ ކުޅޭ ތަކެތީގައި ޖުމްލަ 21 ބާވަތެއްގެ ވިހަ ކެމިކަލް އެކުލެވެއެވެ.
