ޔަމަނުގެ ހޫތީން ސައުދީ އަރަބިއްޔާއަށް ދޭ ހަމަލާތައް ވަރުގަދަކޮށްފައިވާ ދަނޑިވަޅެއްގައި، ސައުދީގެ ވެރިރަށް ރިޔާދުގެ މައި އެއާޕޯޓު ކައިރިން ބާރުގަދަ ގޮވުންތަކެއްގެ އަޑު އިވި، ބޮޑު ދުންގަނޑެއް ހޮނިހިރު ދުވަހު ފެނިއްޖެ އެވެ.
މި ހާދިސާ ހިނގާފައި މިވަނީ ރިޔާދަށް ނުރައްކަލެއް ކުރިމަތިވެދާނެ ކަމަށް ބުނެ، ސައުދީ ސަރުކާރުން ރޭގަނޑުގެ ވަގުތެއްގައި އިންޒާރުތަކެއް ނެރެފައި ވަނިކޮށެވެ.
ރޮއިޓާސް އިން އާންމުކޮށްފައިވާ ވީޑިއޯ އަދި ފޮޓޯތަކުން ފެންނަ ގޮތުގައި، އެއާޕޯޓު ހައިވޭ އާއި މައި ޓާމިނަލް އިމާރާތުގެ ފަހަތުން ކަޅު ދުން މައްޗަށް އަރަމުންދެ އެވެ. އަދި އެ ސަރަހައްދުގައި ހުރި ތެޔޮ ރައްކާކުރާ ތަންތަން ކަމަށް ބެލެވޭ ތަނެއްގެ ފަހަތުން އަލިފާންގަނޑެއް އަރަމުންދާ މަންޒަރު ވެސް ވީޑިއޯއިން ފެނެ އެވެ.
އެ ސަރަހައްދުން ފެނުނު ދުމާއި، ރޭގަނޑު ނެރުނު އިންޒާރުތަކާ ގުޅޭގޮތުން ރޮއިޓާސް އިން ސުވާލު ކުރުމުން، ސައުދީ ސަރުކާރުގެ މީޑިއާ އޮފީހުން މިހާތަނަށް އެއްވެސް ޖަވާބެއް ދީފައެއް ނުވެ އެވެ.
ސައުދީ ސިވިލް ޑިފެންސް އިން ވަނީ ރިޔާދަށާއި، ވެރިރަށުގެ އިރުމަތީގައި އޮންނަ އަލް-ޚަރްޖު ސިޓީއަށް ވައިގެ މަގުން ހަމަލާއެއް އަތުވެދާނެ ކަމުގެ އިންޒާރު ފޯނު މެދުވެރިކޮށް ރޭގަނޑު ފޮނުވާފަ އެވެ. ނަމަވެސް، ހޮނިހިރު ދުވަހުގެ ހެނދުނު ވަނީ އެ ނުރައްކާ ފިލާފައިވާ ކަމަށް އަންގާފަ އެވެ.
ރިޔާދުގެ އޮލަޔާ ސަރަހައްދުގައި ހުރި ރޮއިޓާސްގެ ނޫސްވެރިއަކަށް، ނުރައްކާ ފިލާފައިވާ ކަމުގެ މެސެޖު ލިބުމުގެ ކުރިން ބާރުގަދަ ގޮވުންތަކެއްގެ އަޑު އިވިފައިވެ އެވެ.
އެމެރިކާ އާއި އީރާނާ ދެމެދު ހަނގުރާމަ ފެށުނު ފަހުން މިއަހަރުގެ ކުރީކޮޅު ވެސް ރިޔާދަށް މިފަދަ ބައެއް އިންޒާރުތައް ނެރެފައިވެ އެވެ. ނަމަވެސް، ޖުލައި މަހުން ފެށިގެން ހޫތީންނާ ދެމެދު ހަމަލާތައް ވަރުގަދަވި ފަހުން، މިއީ މިފަދަ އިންޒާރުތަކެއް ނެރުނު ފުރަތަމަ ފަހަރެވެ.
