ޔޫރަޕްގެ އިއްތިހާދު (އީޔޫ) ގެ މެންބަރު ގައުމުތަކުގައި 15 އަހަރުން ދަށުގެ ކުދިން ސޯޝަލް މީޑިއާ ބޭނުންކުރުން ހަނިކުރުމުގެ މަޝްރޫއެއް، ކުޑަކުދިންގެ ނަފްސާނީ ދުޅަހެޔޮކަން އިތުރުކުރުމަށާއި އިންޓަނެޓްގެ ރައްކާތެރިކަން ކަށަވަރުކުރުމުގެ މަގްސަދުގައި އެ އިއްތިހާދުން އިއުލާންކޮށްފި އެވެ.
މި މަޝްރޫއުގެ ދަށުން ކުޑަކުދިން ސޯޝަލް މީޑިއާ ބޭނުންކުރުމުގައި ފިޔަވަހިތަކަކަށް ބަހާލައިގެން ފިޔަވަޅުތައް އެޅުމަށް ވަނީ ނިންމާފައެވެ. މީގެ ތެރޭގައި 13 އަހަރުން ދަށުގެ ކުދިން ސޯޝަލް މީޑިއާގެ އެއްވެސް ވަސީލަތެއް ބޭނުންކުރުން މަނާކުރުން ހިމެނެ އެވެ.
އުމުރުން 13 އަހަރާއި 15 އަހަރާ ދެމެދުގެ ކުދިންނަށް ސޯޝަލް މީޑިއާ ބޭނުންކުރެވޭނީ ދުވާލަކު އެންމެ ގަޑިއިރަކުއެވެ. އެއީ އެކުދިންގެ މައިންބަފައިން ނުވަތަ ބެލެނިވެރިންގެ ސޯޝަލް މީޑިއާ އެކައުންޓް މެދުވެރިކޮށް ހަދާ "މިނީ އެކައުންޓް" ތަކެއް މެދުވެރިކޮށެވެ.
ޔޫރަޕިއަން ކޮމިޝަނުން ހާމަކުރި ގޮތުގައި، ސޯޝަލް މީޑިއާ ކުންފުނިތަކުން އެ ކުންފުނިތަކުގެ ވަސީލަތްތަކަކީ ފަރުމާކޮށްފައިވަނީ ރައްކާތެރިކަމާއެކުކަން ސާބިތުކޮށްދޭން ޖެހޭނެއެވެ. އެކަން ނުކުރެވިއްޖެ ނަމަ، އެ ކުންފުންޏެއްގެ ދުނިޔޭގެ ޖުމްލަ އާމްދަނީގެ 6 އިންސައްތައާ ހަމައަށް ޖޫރިމަނާ ކުރެވޭނެއެވެ. އީޔޫގެ ރައީސާ އުރުސުލާ ފޮން ޑަ ލޭޔަން ވިދާޅުވީ މި ނިންމުމުގެ ސަބަބުން ދަރިން ބެލެހެއްޓުމުގެ ފުރިހަމަ ބާރު އަނބުރާ މައިންބަފައިންނަށް ލިބިގެންދާނެ ކަމަށެވެ.
"އީޔޫ ކިޑްސް އެކްޓް" ގެ ނަމުން ނަންދީފައިވާ މި ގާނޫނުގެ ސަބަބުން، މައިންބަފައިންގެ ދަރިންނަށް ރައްކާތެރި މާހައުލެއްގައި އިންޓަނެޓް ބޭނުންކުރުމަށް އެހީތެރިވެދޭނެ ވަސީލަތްތައް ލިބިގެންދާނެ ކަމަށް އޭނާ އިތުރަށް ވިދާޅުވި އެވެ.
މި ހަނިކުރުންތަކުގެ އަސަރު ހަމައެކަނި މަގުބޫލު އެޕްލިކޭޝަންތައް ކަމަށްވާ ޓިކްޓޮކް، އިންސްޓަގްރާމް އަދި ސްނެޕްޗެޓަށް އެކަނި ނޫން ނަމަވެސް، ޔޫޓިއުބާއި ވީޑިއޯ ހިއްސާކުރާ އެހެނިހެން ވަސީލަތްތަކުގެ އިތުރުން އޭއައި ޗެޓްބޮޓްތަކާއި އޮންލައިން ގޭމްތަކަށް ވެސް ކުރާނެ އެވެ.
"ވަރަށް ގިނަ ކުދިންނަށް، އެކުދިން ތައްޔާރު ނުވަނީސް އިންޓަނެޓްގެ ދުނިޔެ މިވަނީ ހުޅުވިފައި. އެއީ ގަނާކުރުން ގެއާ ހަމައަށް ފޯރާ، އަދި ކުރެވޭ ކޮންމެ ކުށެއް ދާއިމަށް ރެކޯޑު ކުރެވިފައި އޮންނަ މާހައުލެއް،" ފޮން ޑަ ލޭޔަން ވިދާޅުވި އެވެ.
މި ގާނޫނުގެ ދަށުން އަމިއްލަ ސޯޝަލް މީޑިއާ އެކައުންޓެއް ހުޅުވޭނީ އުމުރުން 15 އަހަރުން މަތީގެ ކުދިންނަށް އެކަންޏެވެ.
ނަމަވެސް، ބުރާސްފަތި ދުވަހު އީޔޫ ޕާލަމެންޓުގައި ވާހަކަދައްކަވަމުން ފޮން ޑަ ލޭޔަން ވިދާޅުވީ އުމުރުގެ ހައްދެއް ކަނޑައެޅުމަކީ ޓެކްނޮލޮޖީ ކުންފުނިތަކުން އާންމުކުރާ ކޮންޓެންޓްގެ ޒިންމާއިން އެ ކުންފުނިތައް ބަރީއަވުން ނޫން ކަމަށެވެ.
މި ގާނޫނު ފާސްވެއްޖެ ނަމަ، ކުންފުނިތަކުން ކުޑަކުދިންގެ ރައްކާތެރިކަމާ ގުޅޭ ތަފްސީލީ ޕްލޭންތައް ހުށަހަޅަން ޖެހޭނެ ކަމަށް އޭނާ ވިދާޅުވި އެވެ.
"އުމުރުން 18 އަހަރުން ދަށުގެ ކޮންމެ ކުއްޖަކަށްޓަކައި، ސޯޝަލް މީޑިއާ ޕްލެޓްފޯމްތަކުން ރައްކާތެރިކަމުގެ އުސޫލުތަކަށް ތަބާވާންޖެހޭނެ. އެއްވެސް ވިހަ ނުވަތަ ދެވިހިފާ ފަދަ ސިފަތަކާއި، އޮޅުވާލުންތައް ހުރެގެން ނުވާނެ،" އޭނާ ވިދާޅުވި އެވެ.
