އެމެރިކާގެ ރައީސް ޑޮނަލްޑް ޓްރަމްޕާއި މީޑިއާތަކާ ދެމެދު އޮތް ނުތަނަވަސް ގުޅުމުގެ ތެރެއިން، ސީއެންއެން އާއި އެމްއެސް ނައު އަދި ޕޮލިޓިކޯ، ވައިޓް ހައުސްއަށް ވަނުން މަނާކުރިކަން އެމަނިކުފާނު އިއުލާނު ކުރައްވައިފި އެވެ.
ހުކުރު ދުވަހު ޓްރަމްޕްގެ އަމިއްލަ ސޯޝަލް މީޑިއާ ޕްލެޓްފޯމް ކަމަށްވާ "ޓްރުތު ސޯޝަލް" ގައި ކުރެއްވި ޕޯސްޓެއްގައި ވިދާޅުވީ، އެ މީޑިއާތަކުން އެމަނިކުފާނުގެ ސަރުކާރާ ބެހޭގޮތުން "މެދުނުކެނޑި ހަދަހަދައިގެން ވާހަކަތަކާއި ދޮގު ޚަބަރުތައް" ފަތުރަމުންދާ ކަމަށެވެ. ނަމަވެސް އެފަދަ ކަމެއްގެ އެއްވެސް މިސާލެއް އެމަނިކުފާނު ދައްކަވާފައެއް ނުވެއެވެ.
ފާޑުކިޔުން އަމާޒުވުމުން، މިއީ ވަރަށް "އާދައިގެ މަނާކުރުމެއް" ކަމަށް ފަހުން ޓްރަމްޕް ވިދާޅުވި ނަމަވެސް، އެކަން ތަންފީޒު ކުރާނެ ގޮތުގެ ތަފްސީލެއް ނުދެއްވައެވެ. އެހެންކަމުން އެ މީޑިއާ އިދާރާތަކުގެ މުވައްޒަފުންނަށް ވައިޓް ހައުސްގެ ސަރަހައްދަށް ވަނުން މުޅިން މަނާވާނެ ކަމެއް އަދި ސާފެއް ނުވެއެވެ.
ޓްރަމްޕްގެ މި ނިންމުމަކީ އެމެރިކާގެ ނޫސްވެރިކަމުގެ މިނިވަންކަމަށް ދިން "ޣައިރު ގާނޫނީ ހަމަލާއެއް" ކަމަށް ބުނެ ސީއެންއެން އިން ވަނީ ވަގުތުން އެކަން ކުށްވެރިކޮށްފަ އެވެ. އަދި ޓްރަމްޕްގެ މި ފިޔަވަޅާ ދެކޮޅަށް ގާނޫނީ ގޮތުން ކޯޓަށް މައްސަލަ ހުށަހަޅާނެ ކަމަށް ބެލެވެއެވެ.
މި ނިންމުން އިއުލާނު ކުރިތާ ކުޑަވަގުތުކޮޅެއްގެ ތެރޭގައި ވެސް ޕޮލިޓިކޯ އާއި ސީއެންއެންގެ ރިޕޯޓަރުން ވައިޓް ހައުސްގެ ސަރަހައްދުގައި ހަރަކާތްތެރިވަމުން ދިޔައެވެ.
މީގެ އިތުރުން، އައިއޯވާގައި އޮތް ހަރަކާތަކަށް ވަޑައިގެންނެވި ނައިބު ރައީސް ޖޭޑީ ވެންސްއާއެކު ސީއެންއެންގެ ކުރޫއެއް ދަތުރުކުރަމުން ދިޔަކަން ވެސް ފާހަގަކުރެވުނެވެ.
ސީއެންއެން އިން ނެރުނު ބަޔާނެއްގައި ބުނީ، މީޑިއާތައް މަނާކުރުމަށް ނިންމި ނިންމުމަކީ ޣައިރު ގާނޫނީ ނިންމުމެއް ކަމަށާއި، ވައިޓް ހައުސްގައި މަސައްކަތްކުރާ އެ ނެޓްވޯކްގެ ޓީމާއި، އެ ބޭފުޅުން ގެނެސްދޭ އިންސާފުވެރި އަދި ތެދުވެރި ރިޕޯޓުތަކަށް ފުރިހަމައަށް ތާއީދުކުރާ ކަމަށެވެ.
"ސަރުކާރުގެ އެއްވެސް ހުރަހެއް ނުވަތަ ނުފޫޒެއް ނެތި ހަބަރު ފެތުރުމުގެ ހައްގު އެމެރިކާގެ ގާނޫނުއަސާސީގެ ދަށުން އަޅުގަނޑުމެންނަށް ލިބިގެންވޭ،" ސީއެންއެންގެ ބަޔާނުގައިވެއެވެ.
"ރައީސް ޓްރަމްޕް އިންޒާރު ދެއްވި ގޮތަށް މީޑިއާތައް މަނާކޮށްފި ނަމަ، އެއީ ގާނޫނުއަސާސީން ރައްކާތެރިކޮށްދީފައިވާ އަސާސީ ހައްގަކަށް ދެވޭ ޣައިރު ގާނޫނީ ހަމަލާއެއް."
ޕޮލިޓިކޯ އިން ނެރުނު ބަޔާނެއްގައި ބުނީ، މިހާރުގެ ވައިޓް ހައުސްއާއި ކުރިއަށް އޮތް ސަރުކާރުތަކުގެ ހަބަރުތައް ވެސް އެ ނޫހުން އިންސާފުވެރިކަމާއެކު ރިޕޯޓު ކުރަމުންދާނެ ކަމަށެވެ.
"އަޅުގަނޑުމެންގެ ހައްގުތައް ހަނިކުރުމަށް ކުރާ ކޮންމެ މަސައްކަތަކާ ދެކޮޅަށް، ގާނޫނުއަސާސީގެ ފުރަތަމަ އިސްލާހުން ލިބިދޭ ހައްގުތައް ދިފާއުކުރުމުގައި ސާބިތުވެ ތިބޭނަން،" ޕޮލިޓިކޯގެ ބަޔާނުގައި ބުނެފައިވެއެވެ.
ޓްރަމްޕްގެ ސޯޝަލް މީޑިއާ ޕޯސްޓުގައި ވިދާޅުވެފައިވަނީ، "އެމެރިކާގެ ރައީސާއި، ޓްރަމްޕް ސަރުކާރާއި، އެމެރިކާއާ ބެހޭގޮތުން މީޑިއާތަކުން މެދުނުކެނޑި ދޮގު ވާހަކަތައް ފެތުރުމުގެ ފުރުސަތު ދީގެން ނުވާނެ" ކަމަށެވެ. އަދި ކުރިއަށް އޮތް ތަނުގައި އެހެން މީޑިއާތަކަށް ވެސް މި ފިޔަވަޅު އަޅާނެ ކަމުގެ އިޝާރާތެއް އެމަނިކުފާނު ދެއްވި އެވެ.
ނަމަވެސް، މި ފިޔަވަޅު އަޅަން މެދުވެރިވި ވަކި ހާއްސަ ރިޕޯޓެއް ނުވަތަ ހަބަރެއްގެ ތަފްސީލެއް އެ ޕޯސްޓުގައި ހާމަކުރައްވާފައެއް ނުވެއެވެ.
ވައިޓް ހައުސް ކޮރެސްޕޮންޑެންޓްސް އެސޯސިއޭޝަންގެ ރައީސާ ޖެކީ ހައިންރިކް ވިދާޅުވީ، އެ ބޭފުޅުން ތިއްބެވީ ނޫސްވެރިންގެ "ދިފާއުގައި" ކަމަށެވެ.
"މިއީ ހަމައެކަނި ނޫސްވެރިންގެ ހައްގުތަކާ ގުޅޭ ކަމެއް ނޫން،" ފޮކްސް ނިއުސްގައި މަސައްކަތް ކުރައްވާ ހައިންރިކް ވިދާޅުވިއެވެ.
"މިއީ ގައުމުގެ އެންމެ މަތީ މަގާމުގައި ހުންނަވާ ބޭފުޅެއްގެ ސިޔާސަތުތަކާއި ނިންމުންތަކުގެ މައުލޫމާތު، މިނިވަންކަމާއެކު ފުރިހަމައަށް ހޯދުމަށް އެމެރިކާގެ ރައްޔިތުންނަށް ލިބިގެންވާ ހައްގާ ގުޅޭ ކަމެއް،" އޭނާ ވިދާޅުވި އެވެ.
ފަހުން އޯވަލް އޮފީހުގައި ނޫސްވެރިން ސުވާލު ކުރުމުން ޓްރަމްޕް ވިދާޅުވީ، ހުކުރު ދުވަހުގެ މެންދުރުފަހު މި ނިންމުން އިއުލާނު ކުރަން ޖެހުނު ވަކި "ޚާއްސަ ސަބަބެއް" ނެތް ކަމަށެވެ.
މީގެ އިތުރުން، މި ލިސްޓަށް އެހެން މީޑިއާތައް ވެސް އިތުރުވެދާނެ ކަމަށް ޓްރަމްޕް ވިދާޅުވި ނަމަވެސް، ވަކި މީޑިއާއެއްގެ ނަމެއް ވިދާޅެއް ނުވެއެވެ.
ޖެނުއަރީ 2025 ގައި ވެރިކަމާ ހަވާލުވެވަޑައިގަތުމަށްފަހު، ޓްރަމްޕާއި އެމަނިކުފާނުގެ ސަރުކާރުގެ އިސްވެރިން ގެންދަވަނީ ވައިޓް ހައުސްގެ ނޫސްވެރިންނާ ތަކުރާރުކޮށް ކުރިމަތިލަމުންނެވެ.
ޓްރަމްޕްގެ ދެވަނަ ދައުރުގައި، ކޮންޒަވޭޓިވް ބްލޮގަރުންނާއި އިންފްލުއެންސަރުންނަށް ވައިޓް ހައުސްގެ ޕްރެސް ރޫމުން ޖާގަ ދެއްވަން ވަނީ ފައްޓަވާފައެވެ. އެމަނިކުފާނު ވިދާޅުވާ ގޮތުގައި މިއީ އެމެރިކާގެ ރައްޔިތުންނަށް ތަފާތު ހިޔާލުތައް ފޯރުކޮށްދިނުމަށް މުހިންމު ކަމެކެވެ.
މިދިޔަ ފެބްރުއަރީ މަހު ވައިޓް ހައުސް އިން ވަނީ، ގަރުނަކަށްވުރެ ގިނަ ދުވަސް ވަންދެން ވައިޓް ހައުސް ކޮރެސްޕޮންޑެންޓްސް އެސޯސިއޭޝަނުން ބަލަހައްޓަމުން އައި "ޕްރެސް ޕޫލް" ގެ ކޮންޓްރޯލް ސަރުކާރުގެ ދަށަށް ގެނެސްފައެވެ.
ހަމަ އެ މަހު، އެސޯސިއޭޓެޑް ޕްރެސްއިން "ގަލްފް އޮފް އެމެރިކާ" ގެ ބަދަލުގައި "ގަލްފް އޮފް މެކްސިކޯ" މި ލަފުޒު ބޭނުންކުރުމާ ގުޅިގެން، އޯވަލް އޮފީހާއި އެއާ ފޯސް ވަން ފަދަ ހާއްސަ ތަންތަނަށް އެ އެޖެންސީގެ ނޫސްވެރިންނާއި ފޮޓޯގްރާފަރުން ވަނުން ވެސް ސަރުކާރުން މަނާކުރި އެވެ.
މިކަމާ ގުޅިގެން އެސޯސިއޭޓެޑް ޕްރެސް އިން ވަނީ ވަގުތުން ކޯޓަށް މައްސަލަ ހުށަހަޅާފައެވެ. އެ މައްސަލަ އަދިވެސް ކޯޓުގައި ދަނީ ކުރިއަށެވެ.
ރައީސް ޓްރަމްޕަކީ އޯވަލް އޮފީހާއި، އެއާ ފޯސް ވަން އަދި ވައިޓް ހައުސްގެ އެކި ހަރަކާތްތަކުގައި ނޫސްވެރިންނާ ކުރިމަތިލައްވާ ބޭފުޅެކެވެ. އަދި ގިނަ ފަހަރަށް ނޫސްވެރިންނަކީ "ފޭކް ނިއުސް" ފަތުރާ، "އަދަބުކުޑަ" ބައެއްގެ ގޮތުގައި އެމަނިކުފާނު ސިފަކުރައްވައެވެ.
