ސްޕޭނުގެ އިސްތިއުމާރީ ބާރުތަކުން މެކްސިކޯއަށް އެރުމަށްފަހު، އެޒްޓެކް ހަޟާރަތް ނެތިގެންދިޔަ ގޮތުގެ ވާހަކަ ކުރެހުންތަކުން ކިޔައިދޭ ގަރުނުތަކެއްވީ ތާރީހީ ލިޔުމެއް، 186 އަހަރަށްފަހު ފުރަތަމަ ފަހަރަށް މެކްސިކޯގައި ދައްކާލަން ތައްޔާރުވެއްޖެ އެވެ.
"ކޯޑެކްސް އަޒްކަޓިޓްލާން" ގެ ނަމުން މަޝްހޫރުވެފައިވާ މި މެނުސްކްރިޕްޓް 1898 ވަނަ އަހަރުން ފެށިގެން ބަލަހައްޓަމުން އައީ ފަރަންސޭސިވިލާތުގެ ބިބްލިއޮތެކް ނޭޝަނަލްގަ އެވެ. ނަމަވެސް، އެ މުއްދަތުގެ ކުރިން ވެސް އެތައް އަހަރެއް ވަންދެން މި ލިޔުން އޮތީ މެކްސިކޯއިން ބޭރުގަ އެވެ.
މިއީ މިހާރުގެ މެކްސިކޯއަށް ސްޕޭނުގެ އިސްތިއުމާރީ ސިފައިން އައިތާ މަދު އަހަރުތަކެއްގެ ތެރޭގައި، 16 ވަނަ ގަރުނުގައި ތައްޔާރުކޮށްފައިވާ ކުރެހުމެއް ކަމަށް ބެލެވެ އެވެ. މިއީ އެޒްޓެކް ދަރިކޮޅުގެ ތާރީހާ ގުޅޭގޮތުން އެންމެ ފުރިހަމަ އަދި އަގުހުރި މައުލޫމާތުތަކެއް އެކުލެވޭ އެއް ފަތްފުށް ކަމަށް ގިނަ ބަޔަކު ގަބޫލުކުރެ އެވެ.
ފަރަންސޭސިވިލާތާއި މެކްސިކޯއާ ދެމެދު އޮތް ސިޔާސީ ގުޅުމަށް 200 އަހަރު ފުރުން ފާހަގަކުރުމުގެ ގޮތުން، ފަރަންސޭސި ސަރުކާރުން ވަނީ "ކޯޑެކްސް އަޒްކަޓިޓްލާން" މެކްސިކޯއަށް ލޯނެއްގެ ދަށުން ދޫކޮށްފަ އެވެ.
މީގެ ބަދަލެއްގެ ގޮތުން، މެކްސިކޯގައި އޮތް އަގުނުކުރެވޭ ފަދަ ތާރީހީ ލިޔުމެއް ކަމަށްވާ "ކޯޑެކްސް ބޮޓުރިނީ" ފަރަންސޭސިވިލާތުގައި ދައްކާލުމަށްޓަކައި އެ ގައުމަށް ދިނުމަށް މެކްސިކޯއިން ވަނީ އެއްބަސްވެފަ އެވެ.
"ކޯޑެކްސް ބޮޓުރިނީ" ގައި ހިމެނޭ ކުރެހުންތަކުން ކިޔައިދެނީ، "މެކްސިކާ" ގެ ނަމުން ވެސް މަޝްހޫރުވެފައިވާ އެޒްޓެކް ދަރިކޮޅުގެ މީހުން، އެމީހުންގެ ކާބަފައިން އުޅުނު ވަޒަނުން ހިޖުރަކޮށް، ޓެކްސްކޯކޯ ކަނޑުއޮޅީގެ އައްސޭރިއަށް ގޮސް "ޓެނޮޗްޓިޓްލާން" ބިނާކުރި ގޮތުގެ ވާހަކަ އެވެ.
މި ދެ ލިޔުން ވަގުތީ ގޮތުން ބަދަލުކުރުމަށް އެއްބަސްވީ، މެކްސިކޯގެ ރައީސް ކްލައުޑިއާ ޝީންބައުމް އާއި ފަރަންސޭސި ރައީސް އެމަނުއެލް މެކްރޯން، މިދިޔަ އަހަރު މެކްރޯން މެކްސިކޯއަށް ކުރެއްވި ދަތުރުފުޅުގެ ތެރޭގަ އެވެ.
ވޭތުވެދިޔަ ގަރުނުތަކުގައި މެކްސިކޯއިން ބޭރަށް ގެންގޮސްފައިވާ ތާރީޚީ އާސާރީ ތަކެތި އަނބުރާ ހޯދުމަށް އެ ގައުމުން އަންނަނީ ވަރަށް ބޮޑަށް ވަކާލާތު ކުރަމުންނެވެ.
މެކްސިކޯގެ ފޮރިން މިނިސްޓްރީން ހާމަކޮށްފައިވާ ގޮތުގައި، މިދިޔަ އަހަރުގެ ތެރޭގައި އެކަނި ވެސް އެ ގައުމުގެ 2،000 އަށްވުރެ ގިނަ އާސާރީ ތަކެތި ވަނީ ކާމިޔާބުކަމާއެކު އަނބުރާ ގައުމަށް ގެނެސްފަ އެވެ.
މި އަންނަ ބުރާސްފަތި ދުވަހުން ފެށިގެން މެކްސިކޯ ސިޓީގައި ހުންނަ ނޭޝަނަލް މިއުޒިއަމް އޮފް އެންތްރޮޕޮލޮޖީގައި "ކޯޑެކްސް އަޒްކަޓިޓްލާން" އާންމުންނަށް ދައްކާލުމަށް ވަނީ ހަމަޖެހިފަ އެވެ.
