ވިލިމާލޭ ކުޑަކުދިންގެ ޕާކެއްގެ ތެރޭގައި ހުރި ދުވަސްވީ ނިކަގަހެއް ބަޔަކު ވަގަށް ކަނޑާލި މައްސަލަ ބަލަމުންނުދާ ކަމަށް ފުލުހުން ބުނެފި އެވެ.
ފުލުހުން ބުނީ ވިލިމާލޭގައި ހުރި މި ނިކަގަސް ކަނޑާލި މައްސަލަ އެ މުއައްސަސާއަށް ހުށަހެޅިގެން ބަލަމުން ނުދާ ކަމަށެވެ.
މިދިޔަ ޖުލައި މަހުގެ ތެރޭގައި މި ނިކަގަސް ކަނޑާލިއިރު، ފޮޓޯތަކުން ފެންނަ ގޮތުގައި ގަހުގެ ބޮޑުބައެއް ވަނީ ކަނޑާލައިފަ އެވެ. އެއީ ފުދޭ ވަރަކަށް ބޮޑު އަދި ބިޔަ ނިކަގަހެކެވެ.
މާލޭ ސިޓީ ކައުންސިލުން އޭރު ބުނީ އެ ގަސް ކަނޑާލީ ސިޓީ ކައުންސިލުން ނޫން ކަމަށެވެ. އަދި ގަސް ކަނޑާލި ބަޔަކު ހޯދުމުގެ މަސައްކަތް ކުރަމުންދާ ކަމަށް ވެސް ކައުންސިލުން އޭރު ބުންޏެވެ.
ވިލިމާލޭގައި ހުރި ބޮޑު ނިކަގަހެއް އޭރު ކަނޑާލީ އެ ރަށުގައި ފްލެޓު އެޅުމާމެދު ހިޔާލުތަފާތުވެފައި ވަނިކޮށެވެ. ވެހިކަލް ދުއްވުން މަނާ ވިލިމާލޭގެ ފެހިކަން ގެއްލޭ ގޮތަށް ފްލެޓުތަކެއް އަޅަން އެއްބަޔަކު ގަބޫލެއް ނޫނެވެ. އަނެއް ބަޔަކު ބޭނުންވަނީ ފްލެޓާއި ހޮސްޕިޓަލެއް ވެސް އެ ރަށުގައި އަޅާށެވެ.
މާލޭ ސިޓީ ކައުންސިލުން ވިލިމާލެ ރައްޔިތުންނާއެކު މީގެކުރިން ބޭއްވި ބައްދަލުވުމުގައި ވެސް އެ ދެ ގްރޫޕުގެ މެދުގައި މައްސަލަ ޖެހުނެވެ. އަދި ގަސް ކަނޑާތީ އެކަމާ ދެކޮޅަށް ބޭއްވި މުޒާހަރާގައި ވެސް މައްސަލަތަކެއް ޖެހުނެވެ.
ވިލިމާލޭގެ ހުރި ބޮޑުނިކަގަހެއް ކަނޑާލަން މި އަހަރު ކުރީކޮޅު ރައީސް މުހައްމަދު މުއިއްޒު ވަނީ ވޯޓެއް ވެސް ނަންގަވައިފަ އެވެ. ވޯޓު ނެގީ އެމަނިކުފާނު ވިލިމާލޭ ރައްޔިތުންނާއެކު ބޭއްވެވި ބައްދަލުވުމެއްގެ ތެރެއިންނެވެ.
