މާލޭ ހުޅަނގުފަރާތު ހާބަރު ސަރަހައްދުގައި ހުރި ފުޑްކޯޓުތައް ހުސްކުރަން އެ ފުޑް ކޯޓުތައް ހިންގާ ވިޔަފާރިތަކަށް ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން އަންގައިފި އެވެ.
އަދަދު އަށް އެނގިފައިވާ ގޮތުގައި ފުޑް ކޯޓުތައް ހުސްކުރަން 90 ދުވަހުގެ ނޯޓިސްއެއް ވަނީ ދީފަ އެވެ. އެތަން ހުސްކުރަން ވިޔަފާރިތަކަށް އެސްޓީއޯއިން އެންގީ ހާބަރު ސަރަހައްދު ތަރައްގީކުރަން ހަމަޖެހިފައިވާތީ ކަމަށް ބުނެ އެވެ.
މިކަމާ ގުޅިގެން އެސްޓީއޯގެ ބަހެއް މިހާތަނަށް ލިބިފައެއް ނުވެ އެވެ. ހާބަރު ސަރަހައްދު ތަރައްގީކުރާ ވާހަކަ ސަރުކާރުން މިހާތަނަށް އިއުލާންކޮށްފައެއް ވެސް ނުވެ އެވެ.
ފުޑް ކޯޓުތައް ދޫކޮށްފައިވާ ވިޔަފާރިތަކުން އެތަން ހުސްކުރުމާއެކު އެ ވިޔަފާރިތަކާއެކު ހަދާފައިވާ އެއްބަސްވުން ނިމުމަކަށް އަންނާނެ ކަމަށް އެސްޓީއޯއިން ވަނީ ބުނެފަ އެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ހައުސިން މިނިސްޓްރީ އާއި އެސްޓީއޯއާ ދެމެދު ވެފައިވާ އެއްބަސްވުމެއްގެ ދަށުން 2016 ވަނަ އަހަރު ތަރައްގީކުރަން ފެށި ފުޑް ކޯޓު މަސައްކަތް ނިންމާލީ 2018 ވަނަ އަހަރު އެވެ.
ގާތްގަނޑަކަށް 30 މިލިޔަން ރުފިޔާ ހަރަދުކުރި މި މަޝްރޫއުގެ ދަށުން ތިން ސައިޒެއްގެ ކެފޭތައް ހެދި އެވެ. އޭގެ ތެރޭގައި ހިމެނެނީ 960 އަކަފޫޓުގެ ތަންތަނާއި 1،226 އަކަފޫޓު އަދި 1،760 އަކަފޫޓުގެ ތަންތަނެވެ.
