މޯލްޑިވްސް ސްޓޭޓް ޝިޕިންގެ އެމްއެމްއެސް ގްރެފީން އިން ގެންދިޔަ 17 ހުސް ކޮންޓެއިނަރު ސްރީ ލަންކާގެ ވެރި ރަށް ކޮލޮމްބޯގެ ބަނދަރު ކައިރިން ކަނޑަށް އެޅިއްޖެ އެވެ.
ލަންކާގެ ނޫސްތަކުން ރިޕޯޓުކޮށްފައިވާ ގޮތުގައި އެ ހާދިސާ ހިނގީ ކޮލޮމްބޯ ޕޯޓާ 17 މޭލު ބޭރުން އިއްޔެގެ ވަގުތެއްގަ އެވެ. އެ ހާދިސާގައި އެއްވެސް މީހަކަށް އަނިޔާވި ކަމަކަށް ރިޕޯޓެއް ނުކުރެ އެވެ.
ކޮންޓެއިނަރުތައް ބޯޓުން ބޭރުވީ ކަނޑުގަދަވުމުގެ ސަބަބުން ކަމަށް ލަންކާގެ ނޫސްތަކުން ވަނީ ރިޕޯޓުކޮށްފަ އެވެ. އޮޔާދާ ކޮންޓެއިނަރުތަކަށް ސަމާލުވާން އެދި ލަންކާގެ ކޯސްޓުގާޑުން ވަނީ އިއުލާނެއް ކޮށްފަ އެވެ.
އެމްއެމްއެސް ގްރެފީން އިން ގެންދިޔަ ކޮންޓެއިނަރުތައް ކަނޑަށް އެޅުނީ މާލެއިން ކޮލޮމްބޯއަށް ދަތުރުކުރަނިކޮށެވެ. އެ ބޯޓު މާލެއިން ފުރީ މިދިޔަ އަންގާރަ ދުވަހެވެ.
ގްރެފީންއަކީ ސްޓޭޓް ޓްރޭޑިން އޮގަނައިޒޭޝަންގެ ދަށުން ހިންގާ ސްޓޭޓް ޝިޕިންގެ ކޯގާ ފްލީޓުގައި ހިމެނޭ ބޯޓެކެވެ. އެއީ 142 މީޓަރުގެ ދިގު ބޯޓެކެވެ. ފުޅާމިނުގައި 18 މީޓަރު ހުރެ އެވެ.
