ޑޮލަރު އާމްދަނީ ވަންނަ މިންވަރު ވަރަށް ބޮޑަށް އިތުރުވެ، ބޮޑު ފައިދާއެއް ލިބޭނެ ކަމަށް ބުނެ ސަރުކާރުން ފެށި ބަންކަރިން ހިދުމަތުން 80 މިލިއަން ޑޮލަރު ލިބިއްޖެ ކަމަށް އިކޮނޮމިކް މިނިސްޓަރު މުހައްމަދު ސައީދު މިއަދު ވިދާޅުވެއްޖެ އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި، މި އަދަދު ހިއްސާކުރައްވަމުން ސައީދު ވިދާޅުވީ، މިއީ މީގެ ކުރިން ރާއްޖެއަށް ވަން އާމްދަނީއެއް ނޫން ކަމަށެވެ. އަދި، އުއްމީދަކީ އެ ހިދުމަތުން ލިބޭ އާމްދަނީ މިއަށް ވުރެ ވެސް މަތި ވުން ކަމަށް އޭނާ ވިދާޅުވި އެވެ.
ސައީދު މިހެން ޖަވާބު ދެއްވީ ބަންކަރިން ހިދުމަތުން އަހަރެއްގެ ތެރޭގައި 400 މިލިއަން ޑޮލަރުގެ އާމްދަނީއެއް ލިބޭނެ ކަމަށް އޭނާ ކުރިން ވިދާޅުވެފައިވާ ވާހަކައާ ގުޅުވާ ނޫސްވެރިޔާ ސުވާލުކުރުމުންނެވެ. މިއީ މި ހިދުމަތް ފެށުމުގެ ކުރިން ޕީއެންސީ ހަރުގެ ޖަލްސާއެއްގައި ވާހަކަ ދައްކަވަމުން ސައީދު ވިދާޅުވި އަދަދެކެވެ.
ނަމަވެސް ފަހުން ސައީދު ވަނީ އެއީ އަމާޒެއް ކަމަށާއި، އެއްވެސް އިރެއްގައި ސީދާ އެވަރުގެ އާމްދަނީއެއް ލިބޭނެ ކަމަށް ނުބުނާ ކަމަށް ވިދާޅުވެ، ކުރިން ވިދާޅުވި ވާހަކަތަކުން ބަރީއަވެވަޑައިގެންފަ އެވެ.
މިއަދު ވެސް ސައީދު ވިދާޅުވީ އެއީ ޕާޓީގެ ޕޯޑިއަމްގައި އޭނާ ދެއްކި ވާހަކައެއް ކަމަށެވެ. އަދި އެ ގޮތަށް ޕާޓީގެ ވަރަށް ބައިވަރު ވިސްނުންތައް ހުރި ކަމަށާއި، މިހާރު ކުރެވުނު މަސައްކަތުން އެ ކަންކަން ހާސިލުވާނެ ކަމުގެ އުއްމީދު ވަރަށް ބޮޑަށް އާވެގެން ގޮސްފި ކަމަށް އޭނާ ވިދާޅުވި އެވެ.
ސައީދު ހާމަކުރެއްވި ގޮތުގައި ބަންކަރިންއިން މި ވަރުގެ އަދަދެއް ލިބުން ބޮޑު ކާމިޔާބީއަކަށް ވަނީ، ބަނދަރެއް ވެސް ނެތި ފަށައިގެން އާމްދަނީ ލިބެމުން އަންނާތީ އެވެ.
ބަންކަރިންގެ ހިދުމަތާއެކު ސަރުކާރުން އިހަވަންދިއްޕޮޅުގައި މި ކަމަށް ހާއްސަ ބޮޑު ބަނދަރެއް ތަރައްގީކޮށް، ގިނަ ހިދުމަތްތަކެއް ތައާރަަފުކުރާނެ ކަމަށެވެ. އޭގެތެރޭގައި ޝިޕް ޓު ޝިޕް ސާވިސް އާއި ކްރޫ ޗޭންޖު ހިދުމަތުގެ އިތުރުން ވޯޓާ ބަންކަރިން އާއި މެއިންޓެނެންސް ހިދުމަތް އަދި ބޯޓުފަހަރަށް ޕްރޮވިޝަންސް ސަޕްލައި ކޮށްދިނުން ހިމެނި އެވެ.
މިހެން ނަމަވެސް މިއަދާ ހަމައަށް އައިއިރު، މި މަޝްރޫއުގެ އަމަލީ މަސައްކަތެއް ނުފަށަ އެވެ. މިކަން ހަވާލުކޮށްފައިވާ އެސްޓީއޯއިން މިއަދާ ހަމައަށް މި ހިދުމަތް ދެމުން އަންނަނީ އެކި ސަރަހައްދުތަކުގައި އެ ކުންފުނީގެ ބަންކަރު ބޯޓުތައް ބާއްވައިގެންނެވެ.
