ހަލާލު ފަތުރުވެރިކަމާ ގުޅޭގޮތުން ވިޒިޓް މޯލްޑިވްސް ކޯޕަރޭޝަން (ކުރިން އެމްއެމްޕީއާރުސީ) ގެ ސީއީއޯ އަދި މެނޭޖިން ޑިރެކްޓަރު އަބްދުﷲ ޔާސިރު ދެއްކެވި ވާހަކައަށް ފާޑުކިޔުން އަމާޒުވެއްޖެ އެވެ.
ޔޫއޭއީގައި ކުރިއަށްދާ އޭޓީއެމް ފެއާގައި ޕީއެސްއެމްއަށް ދެއްވި އިންޓަވިއުއެއްގައި ޔާސިރު ވިދާޅުވީ ރިސޯޓަކުން އޯޑަރުކުރާ ޗިކަން ސޭންޑްވިޗް ތައްޔާރުކުރާއިރު އޫރުމަހުގެ އުފެއްދުމެއް ތައްޔާރުކުރަން ބޭނުންކުރި ސާމާނު ބޭނުންކޮށްފައި ހުރެދާނެ ކަމަށެވެ. އެގޮތުން ކާން ލިބޭ އެއްޗަކީ ފުރިހަމައަށް ހަލާލު އެއްޗެއްކަން ޔަގީންކުރުން ވަރަށް މުހިންމު ކަމަށް އޭނާ ވިދާޅުވި އެވެ.
"މިސާލަކަށް ތިބޭފުޅާ ރޯސަޓަކަށް ވަޑައިގަންނަވަނީ. ވަޑައިގެން ޗިކަން ސޭންޑްވިޗަކަށް އޯޑަރު ކުރައްވަނީ ބަދިގެއިން އެހެން ނޫންތޯ ރެސްޓޯރަންޓުގައި އިށީނދެ ވަޑައިގެން. ދެން އެ ޗިކަން ސޭންޑްވިޗް މިސާލަކަށް ތައްޔާރުކުރުމުގައި ބޭނުންކޮށްފައި ހުރެދާނެ މީގެ ހިނދުކޮޅެއް ކުރީގައި އޫރުމަސްފަދަ އެކަހަލަ އެއްޗެއް ތައްޔާރުކުރަން ބޭނުން ކޮށްފައި ކުޑަ ގޮތަކަށް ފެންކޮޅެއް އަޅާފައި ދޮވެލާފައި ހަމަ ކުކުޅުގެ ސޭންޑްވިޗް ހަދާލަން. އެހެން ނޫންތޯ،" ޔާސިރު ވިދާޅުވި އެވެ.
"ބޭނުންކޮށްފައި ދެން ތިބޭފުޅާއަށް ގެނެސްދިނީމަ ތިބޭފުޅާ ތި ބެއްލެވީ ހަލާލު ސޭންޑްވިޗެއް ކަމަށް ނިންމެވިދާނެ އެހެންނަމަވެސް ހަގީގަތަކީ އެޔެއް ނޫން. އެހެންވީމަ މިގޮތުގައި ވަރަށް ފުޅާ ދާއިރާއެއްގައި ވިސްނުން ގެންނަން ޖެހޭ. އެހެންވީމަ ކެއުން ބުއިން ވަރަށް މުހިންމު ހަމަ. ސީދާ ޔަގީންކަމާއެއްކޮށް ހަލާލު އެއްޗެއް ކަމުގައިވުން."
ނަމަވެސް ރިސޯޓު ދާއިރާގައި މަސައްކަތްކުރާ މީހަކު ޔާސިރު ދެއްކެވި ވާހަކައަށް ރައްދު ދެމުން ބުނީ ރިސޯޓުތަކުގައި ކޮންމެ ވައްތަރެއްގެ މަހެއްވެސް ކޮށަން ބޭނުންކުރާނީ ތަފާތު ވަޅިއެއް ކަމަށާއި އެ މަސް ކޮށަން ބޭނުންކުރާނީވެސް ތަފާތު ކަޓިން ބޯޑެއް ކަމަށެވެ. އޭގެ އިތުރުން ކަޓިން ބޯޑުތަކަށް ކަލަ ކޯޑުވެސް ދީފައި ހުންނަ ކަމަށް އޭނާ ބުންޏެވެ.
"މިކަން ނޭނގޭ ނަމަ ވާހަކަ ނުދައްކާ. އެއްޗެއް ބުނުމުގެ ކުރިން ކަންކަން ހިނގާގޮތް ބަލާ. ކޮންމެ ރިސޯޓެއްގައި ވެސް އެކި ވައްތަރުގެ ކަޓިން ބޯޑުތައް ހުންނައިރު، ކަލަ ކޯޑު ހުންނަ ތަފާތު ވައްތަރުގެ ކަޓިން ބޯޑުތައް ހުރޭ. ސެޓްފިކެޓާއި އެކު އޮންނަ ސްޓޭންޑަޑެއް އަބަދު ވެސް ގެންގުޅޭ އަދި ކޮންމެ މަހަކު ވެސް ސްޓޭންޑާޑް އިންސްޕެކްޝަންތައް ވެސް ކުރިއަށް ގެންދޭ،" އޭނާ ބުންޏެވެ.
ބައެއް އާންމުން މި އިންޓަވިއުއާ ގުޅޭގޮތުން ބުނީ ޔާސިރުގެ ވާހަކަތަކުން ރިސޯޓު މުވައްޒަފުންގެ ޕްރޮފެޝަނަލިޒަމް އާމެދު ސުވާލު އުފެދިފައިވާ ކަމަށެވެ. އަދި ވިޒިޓް މޯލްޑިވްސްފަދަ ތަނެއްގެ އެމްޑީއަކަށް ޔާސިރު ކޮލިފައި ނުވާ ކަމަށް ބުނެވެސް މީހުން ދަނީ ފަޑުކިޔަމުންނެވެ.
"ލަދުން ބޯހަލާކު. މިއީ ރާއްޖޭގެ އެންމެ މުހިއްމު ސިނާއަތު، ދުނިޔޭގެ މަޝްހޫރު ޕެރަޑައިސް ޕްރޮމޯޓްކޮށް، ރާއްޖެއަށް ނަފާހޯދަން އުފެއްދި ކުންފުނީގެ ވެރިޔާގެ ހާލަތު، ވިސްނުން. ނެތްތާ މީނަގެ އިނގިރޭސި އިންޓަވިއުއެއް،" ޔާސިރުގެ އިންޓަވިއުއާ ގުޅޭގޮތުން އާންމު މީހަކު ބުންޏެވެ.
ޔާސިރު އިތުރަށް ވިދާޅުވީ ރިސޯޓުތަކުގައި މަސައްކަތްކުރާ ދުރު ގައުމުތަކުގެ މުސްލިމު ނޫން ބަޓްލަރުންނަށް ބައެއް ފަހަރު ދޭ އިރުޝާދުތަކުންވެސް ކަންކަން އޮޅޭ ކަމަށެވެ.
"މި ވިދާޅު ވަނީ ކޮޓަރީގެ މިނީބާ ހުސްކޮށްލާށޭ ބަޔަކު އެބަ އާދެއޭ. އެހެންވީމަ އެކަން ކޮށްލާފައި އަންނާށޭ. ދެން އެބޭފުޅާ ވަޑައިގެން މިނީބާ ހުސްކޮށްލާފައި މަސައްކަތް ނިންމާލަފާނެ. އެކަމަކު ހަގީގަތަކީ ވޯޑްރޯބް ތެރޭގައި އެބަ އިނދޭ މިސާލަކަށް ހާލަތްތަކުގައި ފުޅިއެއް [ބަނގުރާ] ބައިންދާލެވިފައި. އެ ފުޅިއަކީ މި ކެޓަގަރީއަށް ފިޓްވާ އެއްޗެއް ނޫން. އެކަމަކު އޭނައަށް ދިން ކޮމާންޑަކީ މިނީބާ ހުސްކޮށްލާށޭ ބުނީމަ އެކަން އެއޮތީ ވެފައި. މިކަން މިއޮތީ ގޯސްވެފައި،" ޔާސިރު ވިދާޅުވި އެވެ.
ރިސޯޓު މުވައްޒަފުންނާ ގުޅޭގޮތުން ޔާސިރު ދެއްކެވި ވާހަކައާ ގުޅޭގޮތުން މީހަކު ބުނީ ހަގީގަތަށް ނުވާ ވާހަކަތައް ދައްކައި ރިސޯޓު މުވައްޒަފުން ކުށްވެރިކުރުމަކީ ބަލައިގަނެވޭނެ ކަމެއް ނޫން ކަމަށާއި މިއަށްވުރެ ވެރިން ޒިންމާދާރުވާން ޖެހޭ ކަމަށެވެ.
"މިއީ މަޖާ ކަމެއް ނޫން. ރިސޯޓް މުވައްޒަފުންނަކީ ޕްރޮފެޝަނަލް އަދި އެމީހުން ކުރާ ކަންތައް އެނގޭ މީހުން. ކްރޮސް ކޮންޓެމިނޭޝަން އަކީ ވަރަށް ބޮޑު މައްސަލައެއް. ހަގީގީ ނޫން ކަންތައްތަކަށް ރިސޯޓުގައި މަސައްކަތް ކުރާ މީހުން ކުށްވެރި ނުކުރޭ. ޒިންމާދާރު ވާން ޖެހޭ،" އިތުރު މީހަކު ބުންޏެވެ.
ޔާސިރު ވިދާޅުވީ ހަލާލު ފަތުރުވެރިކަން ތަންފީޒުކުރެވިގެންދާއިރު ވިސްނުން ވަރަށް ބޮޑަށް ވަށާޖެހެންޖެހޭ ކަމަށާއި ސެޓްފިކޭޝަން ޕްރޮގްރާމްތަކެއްވެސް ހިންގަން ޖެހޭ ކަމަށެވެ.
ވިޒިޓް މޯލްޑިވްސް ކޯޕަރޭޝަން ލިމިޓެޑް (ވީއެމްސީ) ގެ ސީއީއޯ އަދި މެނޭޖިން ޑިރެކްޓަރުކަމުގެ މަގާމަށް އަބްދުﷲ ޔާސިރު އައްޔަންކުރީ އޮގަސްޓް 26، ގަ އެވެ. އޭނާ އެ މަގާމަށް އައްޔަންކުރީ އެ މަގާމުގައި ކުރިން ހުންނެވި އިބްރާހިމް ޝިއުރީ އިސްތިއުފާ ދެއްވުމުންނެވެ.
ޔާސިރުއަކީ މި ސަރުކާރުގައި ވިޒިޓް މޯލްޑިވްސް ހިންގެވުމާ ހަވާލުވެވަޑައިގެންނެވި ތިންވަނަ ބޭފުޅާ އެވެ. ޝިއުރީގެ ކުރިން އެ މަގާމު މި ސަރުކާރުގައި އެންމެ ފުރަތަމަ ފުރުއްވީ ފާތިމަތު ތައުފީގު (ކުޑީ) އެވެ.
