ވިޒިޓް މޯލްޑިވްސް ކޯޕަރޭޝަން ލިމިޓެޑް (ވީއެމްސީ) ގެ ސީއީއޯ އަދި މެނޭޖިން ޑިރެކްޓަރުކަމުގެ މަގާމަށް އަބްދުﷲ ޔާސިރު އިއްޔެ އައްޔަނުކޮށްފި އެވެ.
ވީއެމްސީގެ ސީއީއޯ އަދި އެމްޑީއަކަށް ޔާސިރު އައްޔަނުކުރީ އެ މަގާމުގައި ހުންނެވި އިބްރާހިމް ޝިއުރީ މިދިޔަ ހޯމަ ދުވަހު އިސްތިއުފާ ދެއްވުމާ ގުޅިގެންނެވެ. އޭނާ މަގާމުން އިސްތިއުފާ ދެއްވި ސަބަބެއް މިހާތަނަށް ހާމައެއް ނުކުރައްވަ އެވެ.
ޔާސިރު ވަނީ ރިސޯޓު އިންޑަސްޓްރީގައި ގިނަ އަހަރުތަކެއް ވަންދެން އުޅުއްވާފަ އެވެ. އެގޮތުން ވަން އެންޑް އޮންލީ ކަނުހުރާގެ ޑިރެކްޓަރެއްގެ ގޮތުގައި އޭނާ ހުންނެވި އެވެ. އަދި ސިމްޑީގެ މެނޭޖިން ޑިރެކްޓަރުގެ މަގާމު ވެސް އަދާކުރެއްވި އެވެ.
އިނގިރޭސިވިލާތުން ޓޫރިޒަމް ދާއިރާއިން މަތީތައުލީމު ހާސިލުކުރެއްވި ޔާސިރުގެ ކުންފުނިތައް ކަމަށްވާ ސުޕަ ސަޕްލައި، ކްރިސްޕީފާމްސް އަދި ވޯޓާމާކް މެދުވެރިކޮށް ރާއްޖެއަށް އެކި އުފެއްދުންތައް އެތެރެކޮށް ވިޔަފާރިކުރެ އެވެ.
ޔާސިރުއަކީ މި ސަރުކާރުގައި ވީއެމްސީ ހިންގެވުމާ ހަވާލުވެވަޑައިގެންނެވި ތިންވަނަ ބޭފުޅާ އެވެ. ޝިއުރީގެ ކުރިން އެ މަގާމު މި ސަރުކާރުގައި އެންމެ ފުރަތަމަ ފުރުއްވީ ފާތިމަތު ތައުފީގު (ކުޑީ) އެވެ.
