ވަލާނާ އިންޓަނޭޝަނަލް އެއާޕޯޓުގެ (ވީއައިއޭ) އާ ޓާމިނަލުން ބައިނަލްއަގުވާމީ މަޝްހޫރު ފްރެންޗައިޒް ބްރޭންޑަކަށް ވިޔަފާރި ޖާގަ ދިނުމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އަށް ތަކުރާރުކޮށް ހުށަހެޅި ނަމަވެސް އެކަން ކާމިޔާބު ނުވި ކަމަށް ވިޔަފާރިވެރިޔާ އަދި އޭޝިއާ ފޯވާޑިންގެ ސީއީއޯ އަހުމަދު ޒިޔާދު ވިދާޅުވެއްޖެ އެވެ.
ޒިޔާދު މިހެން ވިދާޅުވީ އިނާ މޯލްޑިވްސްގެ ސީއީއޯ މުހައްމަދު ފިރާގު ފޭސްބުކްގައި ކުރެއްވި ޕޯސްޓަކާ ގުޅިގެންނެވެ.
ފިރާގުގެ ޕޯސްޓުގައި ވަނީ އެއާޕޯޓުގެ ޑިޕާޗާ ޓަރމިނަލްގައި ހުރި ކޭއެފްސީގެ އައުޓްލެޓްގައި އޯޑަރު ދިނުމަށް ބަހަށްޓާ ކިއޮސްކްތައް އަވަހަށް ބޭނުންކުރަން ފެށޭނެ ކަމަށް އުންމީދު ކުރައްވާ ކަމަށެވެ. މިއީ ކައުންޓަރުތަކުގެ ކިއު ދިގުވުން ކުޑަކޮށް، ޕަސެންޖަރުންނަށް ފަސޭހަ އާއި ހަލުވި ހިދުމަތެއް ފޯރުކޮށްދިނުމަށް މުހިއްމު ކަމެއް ކަމަށް އޭނާ ވިދާޅުވި އެވެ.
މި ޕޯސްޓާ ގުޅިގެން ޒިޔާދު ވިދާޅުވީ، 137 އަހަރަށްވުރެ ދިގު މާޒީއެއް އޮތް، ދުނިޔޭގެ 47 ގައުމެއްގައި 750 އަށްވުރެ ގިނަ އައުޓްލެޓް ހިންގަމުންދާ އަދި ދުނިޔޭގެ މައިގަނޑު އެއާޕޯޓްތަކުގައި ކާމިޔާބުކަމާއެކު ހިންގަމުންދާ ބްރޭންޑެއް ރާއްޖެއަށް ގެނައުމަށް ހުށަހަޅާފައިވާނެ ކަމަށެވެ.
އެ ގޮތުން އެއާޕޯޓުގެ އާ ޓާމިނަލުން ޖާގަ ހޯދުމަށް ކެނޑިނޭޅި އެދެމުންދާ ކަމަށާއި، މި ބްރޭންޑް ގެނައުމަށް ހުށަހެޅީ ރެވެނިއު-ޝެއަރިންގް މޮޑެލް ދަށުން ކަމަށް އޭނާ ވިދާޅުވިއެވެ.
މިފަދަ ބްރޭންޑެއް އާ ޓާމިނަލްގެ އެންމެ ކުރީ ސަފުގައި ގާއިމުކުރެވުމަކީ ބައިނަލްއަގުވާމީ ޕަސެންޖަރުންނަށް ރާއްޖެއާމެދު ރަނގަޅު ތަސައްވުރެއް ގެނެސްދޭނެ ކަމެއް ކަމަށް ވެސް ޒިޔާދު ވިދާޅުވި އެވެ.
އާ ފްރެންޗައިޒްއަކަށް އެމްއޭސީއެލްއިން ޖާގަ ނުދިން މައްސަލައެއް އުޅޭއިރު، އެއާޕޯޓުގެ އާ ޓާމިނަލް ހުޅުވި ދުވަސްވަރާއި ކުރިން ހުރި ބައެއް ވިޔަފާރި ޖާގަތައް އާންމުކޮށް އިއުލާންނުކޮށް ދިން މައްސަލަތަކެއް ފެންމަތިވި އެވެ. މި މައްސަލަތަކުގައި އެ ކުންފުނިން އެއްވެސް އެއްޗެއް ނުބުނެ އެވެ.
