އިނގިރޭސިވިލާތުގެ ޗެރިޓީއެއް ކަމަށްވާ "ހާޓް ޔޫކޭ" އިން އަންދާޒާކުރާ ގޮތުގައި އެ ގައުމުގެ ބޮޑެތި މީހުންގެ ތެރެއިން ދެބައިކުޅަ އެއްބައި މީހުންގެ ކޮލެސްޓްރޯލް ހުންނަނީ އާންމު މިންގަނޑަށް ވުރެ މަތީގަ އެވެ. ހަމައެއާއެކު، އެމެރިކާގެ ސެންޓާސް ފޯ ޑިޒީޒް ކޮންޓްރޯލް އެންޑް ޕްރިވެންޝަން (ސީޑީސީ) އިން އަންދާޒާކުރާ ގޮތުގައި ކޮންމެ 10 މީހަކުން އެކަކީ، ނުވަތަ 34 މިލިއަން މީހުންނަކީ، ކޮލެސްޓްރޯލް މަތި މީހުންނެވެ.
ކޮލެސްޓްރޯލް މަތިވެފައިވާ މީހުންނަކީ ހާޓް އެޓޭކެއް ޖެހުމުގެ ނުރައްކާ އިންތިހާއަށް ބޮޑު މީހުންނެވެ. ނަމަވެސް، މީގެ ތެރެއިން ގިނަ މީހުންނަށް އެކަން އެނގިފައި ނުއޮވެދާނެ އެވެ.
ލޭގައި ކޮލެސްޓްރޯލް މަތިވުމަކީ އޭގެ ޒާތުގައި ބޭރުފުށުން އެއްވެސް އަލާމާތެއް ފެންނަ ކަމެއް ނޫނެވެ. އެހެންކަމުން، ލޭގެ ޓެސްޓެއް ހަދާފައި ނުވާ ނަމަ ނުވަތަ ސިއްހީ ބޮޑު މައްސަލައެއް ކުރިމަތިނުވާހާ ހިނދަކު، ކޮލެސްޓްރޯލް ހުރި މިންވަރަކީ ގިނަ މީހުންނަށް ނޭނގި އޮންނަ ސިއްރެކެވެ.
ލޭގައި ކޮލެސްޓްރޯލް ހުރި މިންވަރާ މެދު ކަންބޮޑުވާ ނަމަ، ޑޮކްޓަރަކާ މަޝްވަރާކުރުމަކީ މުހިންމު ކަމެކެވެ. ކޮލެސްޓްރޯލް މަތިވެފައިވާ ނަމަ، އެ މިންވަރު ދަށްކުރުމަށްޓަކައި "ސްޓެޓިން" ފަދަ ބޭސްތައް ބޭނުންކުރުމަށް ޑޮކްޓަރުން ލަފާދީފާނެ އެވެ.
ނަމަވެސް، ކޮލެސްޓްރޯލް ދަށްކުރުމަށް ކޮންމެހެން ސްޓެޓިން ބޭނުންކުރާކަށް ނުޖެހެ އެވެ. ކޮލެސްޓްރޯލް ހުރި މިންވަރު އިންތިހާއަށް މަތިނުވާ ނަމަ ނުވަތަ ބޭސް ބޭނުންކުރަންޖެހޭ ސިއްހީ ޚާއްސަ ސަބަބެއް ނެތް ނަމަ، ގުދުރަތީ ގޮތުން ކޮލެސްޓްރޯލް ދަށްކުރެވޭނެ ގިނަ ގޮތްތަކެއް އެބަހުއްޓެވެ.
މީގެ ތެރެއިން އެންމެ ފުރަތަމަ ކަމަކީ ކަސްރަތު ކުރުމެވެ. ދުވުމާއި ބައިސްކަލް ދުއްވުން ފަދަ އެއިރޯބިކް ހަރަކާތްތަކުގެ ސަބަބުން ހަށިގަނޑަށް ގެއްލުންދޭ "ބޭޑް" ކޮލެސްޓްރޯލް ދަށްކޮށް، ފައިދާހުރި "ގުޑް" ކޮލެސްޓްރޯލް ގާތްގަނޑަކަށް ފަސް އިންސައްތަ އިތުރުކޮށްދޭ ކަމަށް 2013 ވަނަ އަހަރު ޝާއިއުކުރި ދިރާސާއެއްގައި ބުނެފައިވެ އެވެ.
ދުންފަތުގެ އިސްތިއުމާލުކުރުން ހުއްޓާލުމަކީ ވެސް ކޮލެސްޓްރޯލް ދަށްކުރުމަށް ކޮންމެހެން ކުރަންޖެހޭ ކަމެކެވެ. ސިނގިރޭޓުގެ ދުމުގެ ސަބަބުން "ބޭޑް" ކޮލެސްޓްރޯލް އިތުރުވެ، ސިއްހީ ނުރައްކާތައް ކުރިމަތިވާކަމީ އެންމެން ދަންނަ ހަގީގަތެކެވެ.
އިނގިރޭސިވިލާތުގެ ނޭޝަނަލް ހެލްތު ސާވިސް (އެންއެޗްއެސް) ގެ ޑޮކްޓަރެއް އަދި ޔުނިވާސިޓީ ކޮލެޖް ލަންޑަންގެ އެކަޑެމިކް ކާޑިއޮލޮޖިސްޓެއް ކަމަށްވާ ޑރ. ރިޔާޒް ޕަޓޭލް ވިދާޅުވާ ގޮތުގައި، ކޮލެސްޓްރޯލްގެ މިންވަރު ރަނގަޅު ކުރުމަށް ކުރެވޭނެ އެންމެ މުހިންމު ކަމަކީ ކެއުމުގެ އާދަތަކަށް ބަދަލު ގެނައުމެވެ.
ކެއުމުގައި ދުރުވާންޖެހޭ ބައެއް ބާވަތްތަކަކީ ކޮބައިކަން ގިނަ ބަޔަކަށް އަންދާޒާ ކުރެވޭނެ އެވެ. އެގޮތުން ފޮނިކާތަކެއްޗާއި (ޕޭސްޓްރީ)، ޕްރޮސެސްކޮށްފައިވާ މަހުގެ ބާވަތްތަކާއި ޖަނަވާރުގެ ސަރުބީއަކީ ކޮލެސްޓްރޯލް މަތިވުމަށް މެދުވެރިވާ މައިގަނޑު ސަބަބުތައް ކަމަށް ގިނަ ދިރާސާތަކުން ދައްކަ އެވެ.
"އޯޓްސްއަކީ ގުދުރަތީ ގޮތުން ކޮލެސްޓްރޯލް ދަށްކުރުމަށް އޮތް ވަރަށް ރަނގަޅު ވަސީލަތެއް،" ޑރ. ޕަޓޭލް ވިދާޅުވި އެވެ. "މީގެ ސަބަބަކީ އޯޓްސްގައި ހިމެނޭ ފައިބަރެވެ. އޯޓްސްގައި ހުންނަ 'ސޮލިއުބަލް ފައިބަރު' ގެ ސަބަބުން ކޮލެސްޓްރޯލް ދަށްކޮށްދޭ."
ސޮލިއުބަލް ފައިބަރަކީ ގޮދަނުގެ ބާވަތްތަކާއި، މުގާއި، ތަރުކާރީ އާއި، މޭވާ އާއި، އެކި ބާވަތުގެ އޮށްތަކުގައި ވެސް ހިމެނޭ މާއްދާއެކެވެ. މީގެ ސަބަބުން ކާނާގެ ތެރެއިން ހަށިގަނޑަށް އެތެރެވާ ކޮލެސްޓްރޯލް ކުޑަގޮހޮރުގެ ތެރޭގައި ހިފަހައްޓައި، ލޭގެ ތެރެއަށް އެ މާއްދާ ދިއުން ހުއްޓުވައިދެ އެވެ.
ބިހަކީ އޭގައި ގިނަ އަދަދަކަށް ކޮލެސްޓްރޯލް ހިމެނޭ އެއްޗަކަށް ވިޔަސް، ހެނދުނުގެ ނާސްތާގައި ބިސް ކެއުމަކުން ބިރުގަންނާކަށް ނުޖެހެ އެވެ.
"ކާނާގައި ހުންނަ ކޮލެސްޓްރޯލަކީ ސީދާ ލޭގައި ދައުރުވާ ކޮލެސްޓްރޯލެއް ނޫން. އެކަން މިހާރު ވަރަށް ސާފު،" ޑރ. ޕަޓޭލް ވިދާޅުވި އެވެ. "ކުރީގައި އަހަރެމެން ބުނަމުން އައީ ކޮލެސްޓްރޯލް ގިނަ ކާނާ ކެއުމުން ލޭގައި ކޮލެސްޓްރޯލް އިތުރުވާނެ ކަމަށް. އެކަމަކު އެއީ ހަގީގަތެއް ނޫން."
ހަގީގަތަކީ، ލޭގައި ދައުރުވާ ކޮލެސްޓްރޯލްގެ 80 އިންސައްތައަކީ ސީދާ ފުރަމޭއިން އުފައްދާ އެއްޗެކެވެ. އެއީ ކާނާއިން ސީދާ ދަމައިގަންނަ އެއްޗެއް ނޫނެވެ.
ނަމަވެސް، އޭގެ މާނައަކީ ކާނާގެ ސަބަބުން އެލްޑީއެލް ކޮލެސްޓްރޯލަށް އަސަރު ނުކުރަނީއެއް ނޫނެވެ. ބައެއް ކާނާގެ ސަބަބުން، ލޭގައި ހުންނަ ކޮލެސްޓްރޯލްގެ މިންވަރު ކޮންޓްރޯލް ކުރުމަށް ފުރަމޭއަށް ހުރަސްތަކެއް ކުރިމަތިވެ އެވެ.
ހަކުރަކީ ވެސް ކޮލެސްޓްރޯލަށް އަސަރުކުރާ އެއްޗެކެވެ. ހަކުރުގެ ސަބަބުން ފުރަމޭއިން ގިނަ އަދަދަކަށް އެލްޑީއެލް އުފެއްދުމަށް ބާރުއަޅައި، ފައިދާހުރި އެޗްޑީއެލް އުފައްދާ މިންވަރު މަދުކޮށްލަ އެވެ.
މައުލޫމާތު: ބީބީސީ ސައިންސް ފޯކަސް
