އިސްތަންބޫލް، ތުރުކީ (ސެޕްޓެމްބަރު 11) - ޔުއެފާ ޗެމްޕިއަންސް ލީގައި ރޭ އިޓަލީގެ ރޯމާއާ 1-1 އިން އެއްވަރުވި މެޗަށް ފަހު އޮތް ނޫސްވެރިންގެ ބައްދަލުވުމުގައި، ތުރުކީގެ ކްލަބް، ފެނަބާޗޭގެ ކޯޗު، އިސްމާއިލް ކާޓާލް މަގާމުން އިސްތިއުފާ ދީފި އެވެ.
ކުރިން، ފެނަބާޗޭ އަށް 250 އަށް ވުރެން މެޗު ކުޅެދިނުމުގެ އިތުރުން، އެ ޓީމުގެ އެސިސްޓަންޓް ކޯޗަކަށް ވެސް މަސައްކަތްކުރި، ކާޓާލް،ފެނަބާޗޭގެ ކޯޗުކަމާ ހަތަރު ވަނަ ފަހަރަށް ހަވާލުވީ، މިދިޔަ ޖޫން މަހު އެވެ. އަށާރަ އަހަރަށް ފަހު ފެނަބާޗޭ، ޗެމްޕިއަންސް ލީގަށް ގެނައުމުގައި ވެސް ކާޓާލް މުހިންމު ދައުރެއް އަދާކުރި އެވެ. އެކަމަކު، ފުރަތަމަ މެޗަށް ފަހު އޭނާ ވަނީ މަގާމުން ދުރުވާން ނިންމައިފަ އެވެ.
ކާޓާލް ބުނީ، ފެނަބާޗޭ އަށް އެނބުރި އައިސް މި ވީ ތިން މަހެއްހާ ދުވަސް ތެރޭ ކުޅުންތެރިންނާއި ކްލަބްގެ މެނޭޖްމަންޓުން އޭނާ އަށް ދިން އެއްބާރުލުން ވަރަށް ރަނގަޅު ކަމަށެވެ. އެކަމަށްޓަކައި ޝުކުރު އަދާކުރާ ކަމަށާއި އެކަމަކު އެންމެ ރަނގަޅު ގޮތަކީ ދެން އޭނާ ޓީމާ އެކު ކުރިއަށް ނުދިއުން ކަމަށް ބުނެ، ކާޓާލް ވަނީ އިސްތިއުފާ ދިންކަން އިއުލާނުކޮށްފަ އެވެ.
"މިއީ، އަހަރެންގެ ކްލަބަށް ކުރިއަށްދާން ފުރުސަތު ދޭން ވެގެން ނިންމި ނިންމުމެއް. މިއީ، ޓީމެއްގެ ވިސްނުމުގައި އަހަަރެން ކަނޑައެޅި ގޮތެއް،" އުމުރުން 65 އަހަރުގެ ކާޓާލް ބުންޏެވެ.
ކާޓާލް މަގާމުން އިސްތިއުފާ ދިން ކަމުގައި ވިޔަސް ފެނަބާޗޭގެ ރައީސް، އަޒީޒް ޔިލްޑްރިމް ވަަނީ ކާޓާލްގެ އިސްތިއުފާ ގަބޫލުކުރަން ދެކޮޅު ހަދައިފަ އެވެ. އެ ގޮތުން، ޔިލްޑްރިމް ވިދާޅުވީ، އޭނާ އެ ކްލަބްގެ ރައީސަކަށް ދެމިހުރިހާ ދުވަހަކު، އެ ކްލަބްގެ ކޯޗަކީ ކާޓާލް ކަމަށެވެ.
ފެނަބާޗޭ އިން އިސްތިއުފާ ދޭން ކާޓާލް ނިންމިއިރު، ތުރުކީ ސުޕަ ލީގުގައި އެ ޓީމު ކުޅުނު ހަތަރު މެޗުގެ ތެރެއިން ދެ މެޗުން މޮޅުވެ، ދެ މެޗުން ވަނީ ބަލިވެފަ އެވެ. އެ ޓީމު އޮތީ ލީގުގެ ނުވަ ވަނައިގަ އެވެ. ރޭ ރޯމާއާ ދެކޮޅަށް ފެނަބާޗޭ އިން ކުޅުނު މެޗުގައި، ސަޕޯޓަރުންގެ ނުރުހުން ކާޓާލް އަށް ވަރަށް ބޮޑަށް އަމާޒުވިއިރު، ސަޕޯޓަރަކު ވަނީ އޭނާއާ ދިމާލަށް ފުޅިއެއް ވެސް އެއްލައިފަ އެވެ.
ރޭގެ މެޗުގައި ރޯމާގެ ބްރަޔަން ކްރިސްޓަންޓޭ ވަނީ އެ ޓީމަށް ފުރަތަމަ ހާފުގައި ލީޑުނަގައިދީފަ އެވެ. ފެނަބާޗޭ އިން މެޗުގެ ނަތީޖާ ހަމަހަމަކުރީ ދެ ވަނަ ހާފުގައި އާޗީ ބްރައުން ޖެހި ގޯލުންނެވެ. މެޗަށް ފަހު، ކާޓާލް އިސްތިއުފާ ދިން ހަބަރު ކުޅުންތެރިންނަށް ލިބިގެންދިޔައިރު، އެ ކުޅުންތެރިންގެ ފަރާތުން ވެސް ފެނިގެންދިޔައީ ހައިރާން ކަމެވެ.
