އަނަކް ކްރަކަޓާއު އަލިފާން ފަރުބަދަ ގޮވުމުގެ ސަބަބުން ބޭރުވި އަޅީގެ އަސަރު ކުރުމާ ގުޅިގެން، އިންޑޮނޭޝިއާގެ ވެރިރަށް ޖަކާޓާގެ ދެ އެއާޕޯޓް ހިމެނޭހެން އެ ގައުމުގެ އަށް އެއާޕޯޓެއް ހޯމަ ދުވަހުގެ ހެނދުނާ ހަމައަށް ބަންދުކޮށްފައިވާ ކަމަށް އެ ގައުމުގެ ޓްރާންސްޕޯޓް މިނިސްޓަރު ވިދާޅުވެއްޖެ އެވެ.
ޖާވާ އާއި ސުމަޓްރާ އައިލެންޑާ ދެމެދު އޮންނަ އަނަކް ކްރަކަޓާއު އަލިފާން ފަރުބަދަ މިދިޔަ ހުކުރު ދުވަހުގެ ރޭ ގޮވަން ފެށުމާއެކު، ޖަކާޓާ އާއި އެ ސަރަހައްދުގެ ވަށައިގެންވާ ރަށްތަކަށް ވަނީ އަޅީގެ އަސަރު ވަރަށް ބޮޑަށް ކޮށްފަ އެވެ. އެއާޕޯޓްތައް ބަންދުކުރަން ޖެހުނީ ސަލާމަތީ ސަބަބުތަކަށްޓަކައި ކަމަށް ކަމާބެހޭ އިދާރާތަކުން ބުނެ އެވެ.
ޓްރާންސްޕޯޓް މިނިސްޓްރީން ހާމަކުރި ގޮތުގައި ފްލައިޓްތައް ކެންސަލް ކުރުމުގެ ސަބަބުން 170،000 އަށް ވުރެ ގިނަ މީހުންނަށް ވަނީ އޭގެ ދަތިތަކާ ކުރިމަތިލާން ޖެހިފަ އެވެ.
ޖަކާޓާގެ މައި އެއާޕޯޓް ހޯމަ ދުވަހުގެ އިރުއޮއްސި 6:00 އާ ހަމައަށް ބަންދުކޮށްފައި ބަހައްޓާނެ ކަމަށް އެ އެއާޕޯޓް ހިންގާ ފަރާތުން އިންސްޓަގްރާމް މެދުވެރިކޮށް މިއަދު ވަނީ ބުނެފަ އެވެ.
މޫސުމަށް އަންނަ ބަދަލުތަކުގެ ސަބަބުން މި ހާލަތު ނިމުމަކަށް އަންނާނެ ވަގުތެއް ބުނަން ނޭނގޭ ކަމަށް ޓްރާންސްޕޯޓް މިނިސްޓަރު ދޫދީ ޕުރްވަގަންދީ ހޯމަ ދުވަހު ނެރުއްވި ބަޔާނެއްގައި ވިދާޅުވި އެވެ. މީގެ އިތުރުން ޖަކާޓާއާ އިންވެގެން އޮންނަ ލަމްޕަންގް އާއި ވެސްޓް ޖާވާ ޕްރޮވިންސްގެ އެއާޕޯޓްތައް ހިމެނޭހެން ބާކީ ހުރި ހަތް އެއާޕޯޓް މަދުވެގެން ހޯމަ ދުވަހުގެ ހެނދުނު 8:59 އާ ހަމައަށް ބަންދުކޮށްފައި އޮންނާނެ ކަމަށް ވެސް އޭނާ ވިދާޅުވި އެވެ.
އަލިފާން ފަރުބަދަތައް މޮނިޓާކުރާ އެޖެންސީގެ ވެބްސައިޓުން ދައްކާ ގޮތުގައި، އަނަކް ކްރަކަޓާއު އެންމެ ފަހުން ގޮވާފައިވަނީ އާދިއްތަ ދުވަހުގެ ރޭ 8:23 ގަ އެވެ.
ކުރިއަށް އޮތް ތަނުގައި ވެސް އަލިފާން ފަރުބަދަ އިތުރަށް ގޮވުމުގެ ފުރުސަތު ބޮޑު ކަމަށް އެ އެޖެންސީން މިއަދު ވަނީ އިންޒާރު ދީފަ އެވެ.
އިންޑޮނޭޝިއާގެ މޫސުމާ ބެހޭ އިދާރާ (ބީއެމްކޭޖީ) އިން ބުނި ގޮތުގައި، އަލިފާން ފަރުބަދަ ގޮވުމުގެ ސަބަބުން ބޭރުވި އަޅިތައް ޖާވާ ސަރަހައްދުން 20،000 ފޫޓު (6،000 މީޓަރު) އުސްމިނަށް އަދި ސުމަޓްރާ އާއި ބަންޓެން ޕްރޮވިންސްގެ ބައެއް ސަރަހައްދުތަކުން 50،000 ފޫޓު (15,000 މީޓަރު) އުސްމިނަށް ވަނީ އަރާފަ އެވެ.
ބޭރަށް ނުކުމެ އުޅޭއިރު އަޅީގެ އަސަރުން ސަލާމަތްވުމަށް މާސްކް އެޅުމަށް ޑިޒާސްޓާ އެޖެންސީން އާދިއްތަ ދުވަހު ވަނީ އިލްތިމާސްކޮށްފަ އެވެ. އަދި ޖަކާޓާ އާއި ލަމްޕަންގްގެ ސްކޫލްތަކުގެ ދަރިވަރުންގެ ސިއްހީ ރައްކާތެރިކަމަށްޓަކައި ކިޔަވައިދިނުން އޮންލައިންކޮށް ކުރިއަށް ގެންދިއުމަށް ނިންމާފައިވާ ކަމަށް އެ ގައުމުގެ ރަސްމީ ނޫސް އެޖެންސީ "އަންތާރާ" އިން ރިޕޯޓްކޮށްފައިވެ އެވެ.
އިންޑޮނޭޝިއާ އަކީ ބިންހެލުންތަކާއި އަލިފާން ފަރުބަދަ ގޮވުމުގެ ހާދިސާތައް ގިނައިން ހިނގާ ޕެސިފިކް "ރިންގް އޮފް ފަޔާ" ސަރަހައްދުގައި އޮންނަ ގައުމެކެވެ.
"ކްރަކަޓާއުގެ ދަރި" މި މާނަ ދޭހަވާ އަނަކް ކްރަކަޓާއު އުފެދެން ފެށީ މީގެ ގަރުނެއް ކުރިން، ކްރަކަޓޯއާގެ ނަމުން މަޝްހޫރުވި އަލިފާން ފަރުބަދަ ހުރި ސަރަހައްދުގަ އެވެ. އެ އަލިފާން ފަރުބަދަ 1883 ވަނަ އަހަރު ވަރަށް ބާރަށް ގޮވައި، އުފެދުނު ސުނާމީތަކުގައި 36,000 އަށް ވުރެ ގިނަ މީހުން މަރުވެފައިވެ އެވެ.
