އަވަށްޓެރި އިންޑޮނޭޝިއާގައި ރޯވެފައިވާ އަލިފާންގަނޑުތަކުގެ ސަބަބުން އުފެދުނު ދުމުގެ އަސަރު ބޮޑުވެ، ވައި ނުސާފުވުން "ނުރައްކާތެރި" މިންވަރަކަށް އިތުރުވުމާ ގުޅިގެން، މެލޭޝިއާގެ ސަރަވަކް ސްޓޭޓްގެ ޑިސްޓްރިކްޓެއްގައި ކުއްލި ނުރައްކަލުގެ ހާލަތު އިއުލާންކޮށްފި އެވެ.
ބޮޑުވަޒީރު އަންވަރު އިބްރާހީމްގެ އޮފީހުން ބުރާސްފަތި ދުވަހު ނެރުނު ބަޔާނެއްގައި ބުނެފައިވަނީ، ސަރަވަކްގެ ސެރިއަން ޑިވިޝަންގައި ވައި ނުސާފުވުމުގެ ސަބަބުން އާންމު ސިއްހަތަށް ނުރައްކާވާ މިންވަރަށް ދުމުގެ އަސަރު ފެތުރިފައިވާތީ، އެ ސަރަހައްދުގައި ކުއްލި ނުރައްކަލުގެ ހާލަތު އިއުލާން ކުރުމަށް ރަސްގެފާނު ސުލްތާން އިބްރާހީމް ރުހުން ދެއްވާފައިވާ ކަމަށެވެ.
މި ހާލަތު އިއުލާންކޮށްފައިވަނީ، އެ ސަރަހައްދުގެ އެއާ ޕޮލިއުޓަންޓް އިންޑެކްސް (ވައި ނުސާފު މިންވަރު ދައްކައިދޭ މިންގަނޑު) ކުއްލި ނުރައްކަލުގެ ހާލަތު އިއުލާން ކުރަންޖެހޭ މިންވަރަށް މަތިވުމާ ގުޅިގެން، ސަރަވަކް ޑިޒާސްޓާ މެނޭޖްމަންޓް ކޮމިޓީން ރަސްމީކޮށް އެކަމަށް އެދުމުންނެވެ.
މި އަމުރުގެ ދަށުން، ސެރިއަންގައި ހުރި 647 ސްކޫލެއް ހޯމަ ދުވަހުން ފެށިގެން އަންނަ ހަފުތާގެ ނިޔަލަށް ބަންދުވާނެ އެވެ. މީގެ އިތުރުން ސަރުކާރާއި އަމިއްލަ އޮފީސްތަކާއި، ދަނޑުބިންތަކާއި، އިމާރާތްކުރުމުގެ މަސައްކަތްތަކާއި، ހިލަ ނަގާ ތަންތަން ވެސް ބަންދުކުރަން ޖެހޭއިރު، ހަމައެކަނި ޒަރޫރީ ހިދުމަތްތައް ފޯރުކޮށްދޭ ތަންތަން ހުޅުވައިގެން ކުރިއަށް ގެންދިއުމުގެ ހުއްދަ އޮންނާނެ އެވެ.
އެ ސްޓޭޓްގެ ކާރިސާތަކާ ބެހޭ އިދާރާތަކުން ބުނި ގޮތުގައި، ބުރާސްފަތި ދުވަހު ފެށި ތިން ދުވަހުގެ ކްލައުޑް-ސީޑިންގް (ވިލާގެ ތެރެއަށް ކެމިކަލް ޖަހައިގެން ވާރޭ ވެއްސުމުގެ) މަސައްކަތް ހޯމަ ދުވަހުގެ ނިޔަލަށް ކުރިއަށް ގެންދާނެ އެވެ. އެއީ އެ މުއްދަތުގައި ވާރޭ ވެއްސުމަށް އެކަށީގެންވާ ވިލާ އުފެދޭނެ ކަމަށް ލަފާކުރެވޭތީ އެވެ.
ސަރަވަކް ސްޓޭޓް ޑިޒާސްޓާ މެނޭޖްމަންޓް ކޮމިޓީގެ ޗެއާމަން ޑަގްލަސް އުގާ އެމްބާސް ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ، ކުއްލި ނުރައްކަލުގެ ހާލަތު އިއުލާންކޮށްފައިވަނީ ހަމައެކަނި ސެރިއަންއަށް ކަމަށާއި، މުޅި ސްޓޭޓަށް ނޫން ކަމަށެވެ. ނަމަވެސް އެ ސަރަހައްދުގެ ރައްޔިތުން މި ހާލަތަށް ވަރަށް ބޮޑަށް ސަމާލުވުމަށް އޭނާ އިލްތިމާސް ކުރެއްވި އެވެ.
"ބޭރުތެރޭގައި އުޅުން ވީހާވެސް މަދުކުރައްވާ، އަދި ބޭރުގައި ގިނަ ވަގުތު ހޭދަކޮށްގެން ކުރާ ބުރަ މަސައްކަތްތަކާ ދުރުހެލިވޭ،" އޭނާ ވިދާޅުވި އެވެ.
ބޯނިއޯ ޖަޒީރާގެ އުތުރުގައި އޮންނަ ސަރަވަކްއަށް މި ދުމުގެ އަސަރު ބޮޑުވެފައިވާތާ ހަފުތާތަކެއް ވެފައިވާއިރު، އަވަށްޓެރި ސަބާ ސްޓޭޓާއި ޕެނިންސިއުލާ މެލޭޝިއާއަށް ވެސް ވަނީ މިކަމުގެ އަސަރު ވަރަށް ބޮޑަށް ކޮށްފަ އެވެ.
ދެކުނު އިރުމަތީ އޭޝިއާގެ އެހެން ގައުމުތައް ކަމަށްވާ ބުރުނާއީއަށް ވެސް ދުމުގެ އަސަރު ކޮށްފައިވާ ކަމަށް ރިޕޯޓްތައް ބުނެ އެވެ. ސިންގަޕޫރުން ބުނި ގޮތުގައި، 24 ގަޑިއިރުގެ ވައިގެ ފެންވަރު ބެލިބެލުމުން ސިއްހަތަށް ނުރައްކާތެރި މިންވަރެއްގައި ހުރުމުން، ހުކުރު ދުވަހުގެ ހަވީރުން ފެށިގެން ކޮންމެ ދުވަހަކު ދުމުގެ ހާލަތާ ގުޅޭ އިރުޝާދުތައް ނެރެން ފަށާނެ އެވެ. މިއީ 2023 ވަނަ އަހަރަށް ފަހު އެ ގައުމުގައި މިފަދަ އިރުޝާދުތަކެއް ނެރެން ޖެހުނު ފުރަތަމަ ފަހަރެވެ.
މި މައްސަލައިގެ އަސަރު ފިލިޕީންސަށް ވެސް ކޮށްފައިވާއިރު، އެ ގައުމުގެ ރައީސް ފާޑިނަންޑް މާކޯސް ޖޫނިއާ ވަނީ ވެރިރަށް މެޓްރޯ މެނީލާގެ އިތުރުން 12 އަށް ވުރެ ގިނަ ޕްރޮވިންސްތަކުގެ ސްކޫލްތަކުގެ ކިޔެވުން ހުކުރު ދުވަހު މެދުކަނޑާލުމަށް އަމުރު ކުރައްވާފަ އެވެ.
މި އަހަރު ގައުމުތަކުގެ ބޯޑަރު ހުރަސްކޮށް ފެތުރެމުންދާ މި ދުމަކީ އިންޑޮނޭޝިއާގެ އެކި ހިސާބުތަކުގައި، ހާއްސަކޮށް ކަލިމަންޓަން ސަރަހައްދާއި ސުމަޓްރާ ޖަޒީރާގައި ރޯވެފައިވާ އަލިފާންގަނޑުތަކުގެ ސަބަބުން އުފެދިފައިވާ ދުމެކެވެ. މިއީ އެ ޖަޒީރާ ގައުމުގައި ކޮންމެ އަހަރަކުވެސް ކުރިމަތިވާ ޖަންގަލި ރޯވުމުގެ ބޮޑު ކާރިސާގެ ބައެކެވެ.
ސައިންސްވެރިން ލަފާކުރާ ގޮތުގައި މި މަހުގެ ތެރޭގައި ހޫނުމިން އެންމެ މައްޗަށް ދާނެ އެވެ. މީގެ ސަބަބުން މުޅި ސަރަހައްދަށް ހޫނުގަދަވެ، ހަނަފަސްވުމުގެ ސަބަބުން އަލިފާންގަނޑުތައް އިތުރަށް ވަރުގަދަވެގެން ދިއުމުގެ ފުރުސަތު އެބައޮތެވެ.
