އިންޑޮނޭޝިއާގެ އީސްޓް ޖާވާގައި ސަރުކާރުން ހިލޭ ފޯރުކޮށްދިން ކާތަކެތި ކެއުމަށް ފަހު، ކާނާ ވިހަވެގެން 500 އަށްވުރެ ގިނަ ދަރިވަރުން ހޮސްޕިޓަލުގައި އެޑްމިޓްކޮށް ފަރުވާދޭން ފަށައިފި އެވެ.
މި ހާދިސާއާ ގުޅިގެން ކަމާބެހޭ އިދާރާތަކުން މިހާރު ތަހުގީގެއް ފަށާފައިވާ ކަމަށް އެ ގައުމުގެ އޮފިޝަލުން ބުނެ އެވެ.
ކުޑަކުދިންނަށް ރަނގަޅު ކާނާ ފޯރުކޮށްދިނުމަށް އެތައް މިލިއަން ކުދިންނަށް ހިލޭ ކެއުން ލިބޭ ޕްރޮގްރާމެއް މިދިޔަ އަހަރު ފެށީ ރައީސް ޕްރަބޯވޯ ސުބިއަންޓޯގެ އިސްނެންގެވުމަށެވެ.
ނަމަވެސް ބިލިއަން ޑޮލަރުގެ މި މަޝްރޫއަށް ވަނީ ބޮޑެތި ފާޑުކިޔުންތަކެއް އަމާޒުވެފަ އެވެ. މިގޮތުން ކާނާ ވިހަވުމުގެ ހާދިސާތަކާއި، ކޮރަޕްޝަނުގެ ތުހުމަތުތަކާއި، އިސްވެރިން ބަދަލުވުމުގެ އިތުރުން މި މަޝްރޫއަށް ހިނގާ ބޮޑު ހަރަދުގެ ސަބަބުން ގިނަ ގޮންޖެހުންތަކެއް ވަނީ ކުރިމަތިވެފަ އެވެ.
އީސްޓް ޖާވާގެ ސިދޯއަރްޖޯ ސަރަހައްދުގައި އަންގާރަ ދުވަހުގެ މެންދުރުގެ ކެއުމަށްފަހު 512 ދަރިވަރުން ބަލިވެފައިވާ ކަމަށް، ކާނާގެ މަޝްރޫއު ބަލަހައްޓާ ނޭޝަނަލް ނިއުޓްރިޝަން އެޖެންސީގެ އޮފިޝަލް ކެޓުޓް ސުމެދަނާ ވިދާޅުވި އެވެ.
ވީޑިއޯ މެދުވެރިކޮށް ދެއްވި ބަޔާނެއްގައި ކެޓުޓް ވިދާޅުވީ، މިވަގުތު އެންމެ ބޮޑު އިސްކަމެއް ދެނީ އެކި ހޮސްޕިޓަލުތަކުގައި ފަރުވާ ހޯދަމުންދާ ކުދިންގެ ސިއްހީ ހާލަތު ރަނގަޅު ކުރުމަށް ކަމަށެވެ. އަދި ބުދަ ދުވަހާ ހަމައަށް 80 އެއްހާ ކުދިން އަދިވެސް ހޮސްޕިޓަލުގައި އެޑްމިޓްކޮށްފައިވާ ކަމަށް އޭނާ ފާހަގަކުރެއްވި އެވެ.
މި ހާދިސާ ހިނގަން މެދުވެރިވި ކަމަށް ބެލެވޭ ބަދިގެއިން ކާނާ ތައްޔާރުކުރުން 30 ދުވަހުގެ މުއްދަތަށް މިހާރު މެދުކަނޑާލާފައިވާ ކަމަށާއި، އެ މައްސަލަ އިތުރަށް ތަހުގީގު ކުރަމުންދާ ކަމަށް އޭނާ ވިދާޅުވި އެވެ.
އީސްޓް ޖާވާގެ ޑެޕިއުޓީ ގަވަރުނަރު އެމިލް ދަރުދަކް ވިދާޅުވި ގޮތުގައި، މައްސަލަ ޖެހުނު ބަދިގެއިން ކާނާ ފޯރުކޮށްދީފައިވަނީ އިސްލާމީ ބޯޑިން ސްކޫލަކަށެވެ.
މި ހިލޭ ކެއުން ފޯރުކޮށްދޭ މަޝްރޫއާ ގުޅިގެން މީގެ ކުރިންވެސް ގިނަ އަދަދެއްގެ ކުދިން ކާނާ ވިހަވުމުގެ ހާދިސާތައް ހިނގާފައިވެ އެވެ. މިކަން ބަލަމުންދާ އަމިއްލަ ޖަމިއްޔާއެއް ކަމަށްވާ ނެޓްވޯކް ފޯ އެޑިއުކޭޝަން ވޮޗުން ބުނި ގޮތުގައި، އޮގަސްޓް މަހުގެ 8 ވަނަ ދުވަހާ ހަމައަށް މި މަޝްރޫއާ ގުޅިގެން 37,600 އެއްހާ ކާނާ ވިހަވުމުގެ މައްސަލަ ރިޕޯޓްކޮށްފައިވެ އެވެ.
ކަމާބެހޭ ފަރާތްތަކުން ބުނާ ގޮތުގައި، ކާނާ ވިހަވާން މެދުވެރިވާ މައިގަނޑު ސަބަބުތަކަކީ ކާނާ ރައްކާކުރުމުގައި ހުންނަ ނުރަނގަޅު އުސޫލުތަކާއި، ކާނާ ތައްޔާރުކުރުމަށްފަހު ދަރިވަރުންނަށް ފޯރުކޮށްދިނުމުގައި ލަސްތަކެއް ދިމާވުމެވެ.
