އިންޑޮނޭޝިއާގެ ޑޭކެއާ ސެންޓަރެއްގައި ބަލަހައްޓަމުންދިޔަ ކުދިންތަކަކަށް ބޮޑެތި އަނިޔާތަކެއް ކުރި ކަމަށް ތުހުމަތުކުރެވޭ 11 މުވައްޒަފެއްގެ ޝަރީއަތް ފަށައިފި އެވެ.
އާންމުންގެ ބޮޑު ނުރުހުމެއް އަމާޒުވެފައިވާ މި މައްސަލައިގައި ހިމެނޭ ޔޮގްޔަކާޓާ ސިޓީގައި ހުންނަ ޑޭކެއާ ސެންޓަރު ފުލުހުން ރޭޑްކުރީ މިދިޔަ އޭޕްރީލް މަހުގެ ފަހުކޮޅުގަ އެވެ. އެ ރޭޑްގައި އުމުރުން 2 އަހަރާއި 6 އަހަރާ ދެމެދުގެ އެތައް ކުދިންނެއްގެ އަތާއި ފައި ބަނދެފައި ތިއްބާ ފެނިފައިވާއިރު، ބައެއް ކުދިން ތިބީ ދޮރުތަކުގައި އައްސާފަ އެވެ.
ޔޮގްޔަކާޓާގައި ހުންނަ "ލިޓްލް އަރޭޝާ" ޑޭކެއާގެ ކުދިން ބަލަހައްޓާ މީހުން އަންގާރަ ދުވަހު ކޯޓަށް ހާޒިރުކުރިއިރު، އަނިޔާ ލިބުނު ކުދިންގެ ބެލެނިވެރިން ވެސް ޝަރީއަތުގެ މަޖިލީހަށް ހާޒިރުވި އެވެ. އޭގެ ތެރެއިން ބައެއް ބެލެނިވެރިން ތިބީ "އަހަރެމެން މި ހަނގުރާމަކުރަނީ އަހަރެމެންގެ ދަރިންނަށްޓަކައި" ޖަހާފައިވާ ބެޖުތަކެއް ހަރުކޮށްގެންނެވެ.
ޔޮގްޔަކާޓާ ކޯޓުގެ ޕްރޮސިކިއުޓަރުން ވަނީ ކުޑަކުދިންނަށް އިހުމާލުވުމާއި އަނިޔާކުރުމުގެ ދައުވާ އުފުލާފަ އެވެ. މިކަން ހާމަކޮށްފައިވަނީ ލައިވްކޮށް ދެއްކި ޝަރީއަތުގެ އަޑުއެހުމުގަ އެވެ.
މި މައްސަލައިގައި އަނިޔާ ލިބުނު ކުޑަކުދިންގެ އަދަދު 144 އަށް އަރާ ކަމަށް އޮފިޝަލުން ވިދާޅުވި އެވެ.
ބެލެނިވެރިންގެ ފަރާތުން ވާހަކަދެއްކި އުމުރުން 38 އަހަރުގެ އިމީޑިއާ ދްވީ އަންޖާނީ އަންގާރަ ދުވަހު ބުނީ، އަނިޔާ ލިބުނު ބައެއް ކުދިން އަދިވެސް އާ މީހުންނާ ބައްދަލުކުރަން ބިރުގަންނަ ކަމަށާއި، އެ ކުދިންގެ ކިބައިން ރުޅިވެރިކަން ފެންނަ ކަމަށެވެ.
ޔޮގްޔަކާޓާގެ ފުލުހުން ބުނި ގޮތުގައި މި މައްސަލައިގައި ޖުމްލަ 32 މީހަކު ވަނީ ތުހުމަތު ކުރެވޭ މީހުންގެ ގޮތުގައި ކަނޑައަޅާފަ އެވެ.
ކުޑަކުދިންގެ ހައްގުތަކަށް ވަކާލާތުކުރާ ފަރާތްތަކުން ސިފަކުރާ ގޮތުގައި، މިއީ އިންޑޮނޭޝިއާގެ ފަހުގެ ތާރީހެއްގައި ހިނގި މިފަދަ އެންމެ ބޮޑު އެއް މައްސަލަ އެވެ. މި ހާދިސާއާ ގުޅިގެން މުޅި ގައުމުގެ ސަމާލުކަން މިކަމަށް ހުއްޓުނެވެ.
އިންޑޮނޭޝިއާގައި ކުޑަކުދިންނަށް އަނިޔާކުރުމާއި އިހުމާލުވުމުގެ ކުށް ސާބިތުވެއްޖެ ނަމަ، އެންމެ ބޮޑު އަދަބެއްގެ ގޮތުގައި ފަސް އަހަރުގެ ޖަލު ހުކުމެއް އަދި 100 މިލިއަން ރުޕިއާ (5,603.81 ޑޮލަރު) ގެ ޖޫރިމަނާއެއް އާދެ އެވެ.
އިންޑޮނޭޝިއާގައި އެތައް ހާސް ޑޭކެއާ ސެންޓަރުތަކެއް ހުރި ނަމަވެސް، މިއީ އެ ގައުމަށް ނިސްބަތުން އާ ކޮންސެޕްޓެކެވެ. އެ ގައުމުގައި އާންމުކޮށް ކުދިން ބަލަހައްޓަނީ އާއިލާގެ މީހުންނެވެ.
