އިންޑޮނީޝިއާގެ އިރުމަތީގައި އޮންނަ ފްލޮރެސް ސަރަހައްދަށް މިއަދު ފަތިހު އައި ބާރުގަދަ ބިންހެލުމެއްގައި އެކަކު މަރުވެ އިތުރު ބަޔަކު ޒަހަމްވެއްޖެ އެވެ.
ރިކްޓަ މިންގަނޑުން 7.7 ގެ ބާރުމިނުގައި އައި މި ބިންހެލުމާ ގުޅިގެން ސުނާމީގެ އިންޒާރު ނެރުނު ނަމަވެސް، ފަހުން ވަނީ އެ އިންޒާރު އަނބުރާ ގެންގޮސްފަ އެވެ.
އިންޑޮނީޝިއާގެ ކަމާބެހޭ އިދާރާތަކުން ފުރަތަމަ ދެ މީހަކު މަރުވި ކަމަށް ރިޕޯޓުކުރި ނަމަވެސް، ފަހުން އެ ގައުމުގެ ކާރިސާތަކާ ބެހޭ ގައުމީ އިދާރާއިން ވަނީ މަރުވީ އެކަކު ކަމަށާއި ހަތަރު މީހަކަށް އެކިވަރުގެ އަނިޔާ ލިބިފައިވާކަން ކަށަވަރުކޮށްދީފަ އެވެ.
މި ބިންހެލުން އައިސްފައިވަނީ ބާލީއާ ގާތްގަނޑަކަށް އެއްހާސް ކިލޯމީޓަރު ދުރުގައި އޮންނަ ފްލޮރެސް ސަރަހައްދަށެވެ. ބިންހެލުން އައީ ބިމުގެ 15 ކިލޯމީޓަރު އަޑިއަށެވެ.
ބިންހެލުމުގެ ސަބަބުން އެންމެ ބޮޑު އަސަރެއް ކުރި އެއް ސަރަހައްދަކީ މައުމެރޭގެ ބަނދަރެވެ. ބަނދަރުގެ ބައެއް އިމާރާތްތައް ވެއްޓިފައިވާއިރު، ބޯޓުތަކަށް އަރަން ތިބި ބައެއް މީހުން ވަނީ މޫދަށް ވެއްޓިފަ އެވެ. ބަނދަރުގެ އިތުރުން ވެސް ގިނަ އަދަދެއްގެ އިމާރާތްތަކަށް ބޮޑެތި ގެއްލުންތަކެއް ލިބިފައިވާ ކަމަށް ރިޕޯޓުތައް ބުނެ އެވެ.
ބިންހެލުމަށްފަހު ސުނާމީގެ އިންޒާރު ނެރުމާއެކު، އައްސޭރިފަށުގައި ދިރިއުޅޭ ގިނަ އަދަދެއްގެ ބަޔަކު ވަނީ ސައިކަލުތަކުގައި އުސް ސަރަހައްދުތަކަށް ބަދަލުވެފަ އެވެ.
ސާޗް އެންޑް ރެސްކިއު ޓީމުތަކުން މިހާރު ދަނީ ވެއްޓިފައިވާ އިމާރާތްތަކުގެ ދަށުގައި އެއްވެސް މީހަކު ތާށިވެފައިވޭތޯ ބަލައި، މީހުން ސަލާމަތްކުރުމުގެ މަސައްކަތް ކުރަމުންނެވެ. ނަމަވެސް އެ ސަރަހައްދަކީ ފަރުބަދަ ގިނަ އަދި ދަތުރުފަތުރު ކުރުމަށް އުނދަގޫ ސަރަހައްދަކަށް ވުމުން، ލިބިފައިވާ ގެއްލުންތަކުގެ ފުރިހަމަ ތަފްސީލު ހޯދުމަށް ވަގުތު ނަގާނެ ކަމަށް ކަމާބެހޭ އިދާރާތަކުން ބުނެއެވެ.
މި ބިންހެލުމަށްފަހު ވެސް ބާރުގަދަ ލޮޅުންތަކެއް އަންނަމުންދާ ކަމަށް ރިޕޯޓުތައް ބުނެއެވެ. އޭގެ ތެރޭގައި 6.1 ގެ ބާރުމިނުގައި އައި ލޮޅުމެއް ވެސް ހިމެނެއެވެ. ކާރިސާތަކާ ބެހޭ އިދާރާއިން ވަނީ ރައްޔިތުން ކެތްތެރިކަމާއެކު ތިބުމަށާއި، ރެނދުލާފައިވާ ނުވަތަ ގެއްލުން ލިބިފައިވާ އިމާރާތްތަކަށް ނުވަނުމަށް އިލްތިމާސްކޮށްފައެވެ. އަދި އައްސޭރިފަށުގެ ސަރަހައްދުތަކާ ދުރުގައި ތިބުމަށް ވެސް ވަނީ އަންގާފަ އެވެ.
