އިންޑޮނޭޝިއާގެ އަނަކް ކްރަކަޓާއު އަލިފާން ފަރުބަދަ ގޮވުމާ ގުޅިގެން، ޖަކާޓާގެ މައި އެއާޕޯޓުގެ ސަތޭކައަށް ވުރެ ގިނަ ފްލައިޓްތައް އާދީއްތަ ދުވަހު މެދުކަނޑާލައިފި އެވެ.
މި ހާދިސާއާ ގުޅިގެން ބައެއް ސްކޫލްތަކުގެ ހަރަކާތްތަކާއި މަސްވެރިކަން ވެސް ވަނީ ހުއްޓުމަކަށް އައިސްފަ އެވެ.
ސުކާނޯ-ހައްޓާ އިންޓަނޭޝަނަލް އެއާޕޯޓުން އިންސްޓަގްރާމްގައި ކުރި ޕޯސްޓެއްގައި ބުނެފައިވަނީ، އަލިފާން ފަރުބަދައިގެ އަޅިތަކުގެ ސަބަބުން އާދީއްތަ ދުވަހުގެ ހެނދުނު 9:30 އާ ހަމައަށް ފްލައިޓްތައް އޮޕަރޭޓްކުރުން މެދުކަނޑާލާފައިވާ ކަމަށެވެ.
އިންޑޮނޭޝިއާގެ ޓްރާންސްޕޯޓް މިނިސްޓްރީން ބުނި ގޮތުގައި، ކުރިން ހެނދުނު 5:30 އާ ހަމައަށް އޮޕަރޭޝަންތައް ހުއްޓާލުމަށް ނިންމި ނިންމުން އިތުރުކުރުމާ ގުޅިގެން، ބައިނަލްއަގުވާމީ ބައެއް ދަތުރުތައް ހިމެނޭހެން ޖުމްލަ 209 ފްލައިޓަކަށް ވަނީ އަސަރުކޮށްފަ އެވެ.
ޓްރާންސްޕޯޓް މިނިސްޓްރީން ނެރުނު ބަޔާނެއްގައި ބުނެފައިވަނީ، ހުކުރު ދުވަހުގެ ރޭގަނޑުން ފެށިގެން އަނަކް ކްރަކަޓާއު އަލިފާން ފަރުބަދަ ގޮވަމުންދާ ކަމަށާއި، އާދީއްތަ ދުވަހުގެ ހެނދުނުގެ ކުރީކޮޅު އެއާޕޯޓުގެ ސަރަހައްދުން އަލިފާން ފަރުބަދައިގެ އަޅި ފެނިފައިވާ ކަމަށެވެ.
އިންޑޮނޭޝިއާގެ މީޓިއޮރޮލޮޖިކަލް އެޖެންސީ (ބީއެމްކޭޖީ) ގެ ވެބްސައިޓުގައި ބުނެފައިވާ ގޮތުގައި، ޖާވާ ސަރަހައްދުން 20،000 ފޫޓު އުސްމިނަށް އަޅި ފެތުރިފައިވާއިރު، ސުމަޓްރާ ސަރަހައްދާއި ޖާވާގެ ބަންޓެން ޕްރޮވިންސްގެ ބައެއް ހިސާބުތަކަށް 50،000 ފޫޓު އުސްމިނަށް އަޅީގެ ވިލާގަނޑު ވަނީ ފެތުރިފަ އެވެ.
އަނަކް ކްރަކަޓާއު އަލިފާން ފަރުބަދަ އޮންނަނީ އިންޑޮނޭޝިއާގެ ޖާވާ އާއި ސުމަޓްރާއާ ދެމެދުގަ އެވެ. އިންޑޮނޭޝިއާ އަކީ ބިންހެލުންތަކާއި އަލިފާން ފަރުބަދަ ގޮވުން އާންމު ސަރަހައްދެއް ކަމަށްވާ ޕެސިފިކް "ރިންގް އޮފް ފަޔާ" ގައި އޮންނަ ގައުމެކެވެ.
އިންޑޮނޭޝިއާގެ ޑިޒާސްޓާ މިޓިގޭޝަން އެޖެންސީ (ބީއެންޕީބީ) ގެ ތަރުޖަމާނު ބާޓަން ޕަންޖައިތަން ވިދާޅުވީ، އާންމުން ހާސްނުވެ، ސަމާލުކަން އިތުރުކުރުމަށް އިލްތިމާސްކުރާ ކަމަށެވެ. އަދި އަޅި ފައިބާ ނަމަ މާސްކާއި ލޮލަށް ރައްކާތެރިކަންދޭ އައިނު އެޅުމަށާއި، ބޭރުގައި އުޅޭ ވަގުތު މަދުކުރުމަށާއި، ފެން ރައްކާކުރާ ތަންތަން ނިވާކުރުމުގެ އިތުރުން، އަޅީގެ ސަބަބުން ފެންނަ މިންވަރު ދަށްވާނެތީ ދުއްވާ އެއްޗެހި ދުއްވުމުގައި ސަމާލުވުމަށް ވެސް އޭނާ އިރުޝާދު ދެއްވި އެވެ.
ޑިޒާސްޓާ މިޓިގޭޝަން އެޖެންސީން ހޮނިހިރު ދުވަހު ބުނެފައިވަނީ، އަލިފާން ފަރުބަދަ ގޮވުމުގެ ސަބަބުން ސުނާމީއެއް އެރުމުގެ ބިރު މިވަގުތު ނެތް ކަމަށެވެ.
މީގެ ކުރިން، 2018 ވަނަ އަހަރު އަނަކް ކްރަކަޓާއު ގޮވުމުގެ ސަބަބުން އެރި ސުނާމީގައި ޖާވާ އާއި ސުމަޓްރާ އިން ސަތޭކައަށް ވުރެ ގިނަ މީހުން މަރުވެ، އެތައް ސަތޭކަ ބަޔަކަށް އަނިޔާވި އެވެ.
"ކްރަކަޓާއުގެ ދަރި" މި މާނަ ދޭހަވާ އަނަކް ކްރަކަޓާއު އުފެދިފައިވަނީ މީގެ ގަރުނެއް ކުރިން، ކުރީގެ މަޝްހޫރު ކްރަކަޓޯއާ އަލިފާން ފަރުބަދަ ހުރި ސަރަހައްދުންނެވެ. ކްރަކަޓޯއާ އަލިފާން ފަރުބަދަ ހަލާކުވެގެން ދިޔައީ 1883 ވަނަ އަހަރު އެ ފަރުބަދަ ވަރުގަދައަށް ގޮވައި، އޭގެ ސަބަބުން އުފެދުނު ސުނާމީތަކުގައި 36،000 އަށް ވުރެ ގިނަ މީހުން މަރުވި ހާދިސާގަ އެވެ.
