ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް، ރައްޔިތުންގެ މަޖިލީހުގެ ތުޅާދޫ ދާއިރާގެ މެންބަރު އަބްދުލް ހަންނާން އަބޫބަކުރު ހުށަހަޅުއްވާފައިވާ އިސްލާހުތަކަކީ ގާނޫނު އަސާސީއާ ހިލާފު، ލާމަރުކަޒީ ނިޒާމު ރޫޅާލުމަށް ހުށަހަޅާފައިވާ ބަދަލުތަކެއް ކަމަށް ބުނެ އެ އިސްލާހުތައް އަނބުރާ ގެންދިއުމަށް ހއ. ކެލާ ކައުންސިލުން ގަރާރެއް ފާސްކޮށްފި އެވެ.
މި އޮގަސްޓު މަހުގެ 15 ވަނަ ދުވަހު ބޭއްވި ކެލާ ކައުންސިލްގެ 5 ވަނަ ދައުރުގެ 6 ވަނަ ކުއްލި ޖަލްސާގައި ބައިވެރިވި މެންބަރުންގެ އިއްތިފާގުން ފާސްކުރި ގަރާރުގައި ބުނެފައިވަނީ، ހުށަހެޅިފައިވާ އިސްލާހުތަކުގެ ސަބަބުން ގާނޫނު އަސާސީގެ 4 ވަނަ މާއްދާގައިވާ ރައްޔިތުންގެ ބާރާއި، 8 ވަނަ ބާބުގައިވާ ލާމަރުކަޒީ އުސޫލުން އިދާރީ ދާއިރާތައް ހިންގުމުގެ މަގުސަދަށް ބޮޑެތި ހުރަސްތަކެއް ކުރިމަތިވާނެ ކަމަށެވެ.
ގަރާރުގައި ފާހަގަކޮށްފައިވާ މުހިންމު ނުކާތައް:
- މިހާރު ބިލް އޮތްގޮތަށް ފާސްވެއްޖެ ނަމަ ކައުންސިލްތަކަށް ލިބިދީފައިވާ މާލީ ލުއިފަސޭހަކަމާއި އާމްދަނީ ހޯދުމުގެ ބާރުތައް ހަނިވެ، ރައްޔިތުންނަށް ފޯރުކޮށްދޭ އަސާސީ އަދި އިޖްތިމާއީ ހިދުމަތްތަކަށް ހުރަސްއެޅޭނެ
- ކައުންސިލް ބަޖެޓުންނާއި ސަރުކާރު މެދުވެރިކޮށް ރޭވިފައިވާ އިގުތިސާދީ، އިޖްތިމާއީ އަދި އުމްރާނީ މަޝްރޫއުތައް ހުއްޓި، ރައްޔިތުންގެ ދިރިއުޅުމުގެ ފެންވަރަށް ނޭދެވޭ އަސަރުކުރުން
- ރަށްރަށުގެ އިހުތިސާސްގެ ތެރެއިން ބޭނުން ތަނެއް މާލޭގައި ތިއްބަވާ މަރުކަޒީ ވެރީންނަށް އަތުލައިގަތުމުގެ ޖާގަ ފަހިވެ، ބިމުގެ އަގާއި އޭގެ ފައިދާ ރައްޔިތުންނަށް ސީދާގޮތެއްގައި ލިބުމުގެ ފުރުސަތު ހަނިވެގެންދިޔުން
- އިސްލާހުތަކާ ދެކޮޅަށް ރައްޔިތުން ބަސްބުނުން މަނާވެ، އިންތިހާބީ މަންދޫބުން ސަސްޕެންޑްކޮށް ވަކިކުރުމުގެ ބާރު މަރުކަޒީ އިދާރާތަކަށް މާސާފުކޮށް ލިބިގެންދިޔުން
"މިއީ ރަށްރަށުގެ ކައުންސިލްތަކުން އަމިއްލަ ފައި މައްޗަށް ތެދުވެ ހިންދެމިލާ މަންޒަރު ފެންނަމުންދާތީ މުޅި ނިޒާމަށް ދެމުންދާ ހަމަލާއެއް. މިއީ ސީދާސާދާކޮށް ލާމަރުކަޒީ ނިޒާމު ރޫޅާލައި، ރައްޔިތުންނާއި ރަށުބާރުވެރިކަން އުވާލުމުގެ އިސްލާހެއް،" ކެލާ ކައުންސިލްގެ ޤަރާރުގައި ބުނެފައިވެއެވެ.
ކެލާ ކައުންސިލުން ވަނީ ރައީސް މުހައްމަދު މުއިއްޒުގެ ރިޔާސީ ވައުދާ އެއްގޮތަށް ލާމަރުކަޒީ ނިޒާމު ކަށަވަރުކޮށްދެއްވައި، މަޖިލީހަށް ހުށަހެޅިފައިވާ މިއިސްލާހުތައް އަނބުރާ ގެންދިއުމަށާއި ބާތިލްކޮށްދެއްވުމަށް ގޮވާލާފަ އެވެ.
މި އިސްލާހަކީ މާލޭގެ މޭޔަރަަކށް މުއިއްޒު ހުންނަވައި މާލޭގެ އެތައް ބިމެއް ނުއަގުގައި ކުއްޔަށް ދޫކުރި ގޮތަށް، އަދި މިހާރު ހުޅުމާލޭގެ ބިންތައް ނުއަގުގައި ވިއްކަމުންދާ ގޮތަށް ރަށްރަށުގެ ބިންތައް ވެސް ނުއަގުގައި ވިއްކާލަން ކުރާކަމެއް ކަމަށް އިދިކޮޅު ފަރާތްތަކުން ތުހުމަތުކުރެ އެވެ.
