ފަލަސްތީނުގެ ރައްޔިތުން ގާޒާއިން ބޭރުކުރުމާ ގުޅޭގޮތުން އިސްރާއީލުގެ ދެ ވަޒީރަކު ހުށަހެޅުންތަކެއް ހުށަހަޅާފައި ވަނިކޮށް، އެ ސަރަހައްދުން ފަލަސްތީނު މީހުން މަޖުބޫރުން ބޭރުކުރުމުގެ އެއްވެސް ރޭވުމެއް ނެތް ކަމަށް އެމެރިކާއިން އިސްރާއީލަށް ކަނޑައަޅާފައި ހުންނަވާ ސަފީރު މައިކް ހަކަބީ ވިދާޅުވެއްޖެ އެވެ.
އިސްރާއީލުން ހިފާފައިވާ ހުޅަނގު އައްސޭރީގެ ފަލަސްތީނު އަވަށެއް ކަމަށްވާ ތުރުމުސް އައްޔާގައި ނޫސްވެރިންނާ ވާހަކަދައްކަވަމުން ހަކަބީ ވިދާޅުވީ، ގާޒާގެ ރައްޔިތުން އެ މީހުންގެ ނުރުހުމުގައި އެ ސަރަހައްދުން ބޭރުކުރުމުގެ އެއްވެސް ރޭވުމެއް އިސްރާއީލުން ނުގެންގުޅޭކަން ސާފުކޮށް ދަންނަވަން އެނގޭ ކަމަށެވެ.
"ބަޔަކު އަމިއްލައަށް އެ ތަނުން ފުރައިގެން ދާން ބޭނުންވާ ނަމަ، އެ ފުރުސަތު އެ މީހުންނަށް އޮންނަން ޖެހޭނެ ކަމަށް ގަބޫލުކުރެވޭ. ނަމަވެސް، އެ މީހުން ތިބެން ބޭނުންނުވާ ތަނެއްގައި ބަންދުކޮށްފައި ބޭތިއްބުމަކީ ވަރަށް ބޮޑު ނިކަމެތި ކަމެއް ކަމަށް އަޅުގަނޑު ދެކެން،" ހަކަބީ ވިދާޅުވި އެވެ.
މީގެ އިތުރުން ހަކަބީ ވިދާޅުވީ، އެއްވެސް ބަޔަކު މަޖުބޫރުން މީހުން ބޭރުކުރުމަށް ހުށަހަޅާފައި ނުވާ ކަމަށެވެ. އަދި އިސްރާއީލުން ވެސް އަދި އެމެރިކާއިން ވެސް އެފަދަ ކަމަކަށް ތާއީދު ނުކުރާ ކަމަށާއި، އެފަދަ ކަމަކަށް ތާއީދުކުރާ އެއްވެސް މީހަކު އެނގިވަޑައިނުގަންނަވާ ކަމަށް ވެސް އޭނާ ވިދާޅުވި އެވެ.
ނަމަވެސް، އިސްރާއީލުގެ ދިފާއީ ވަޒީރު އިސްރާއީލް ކާޓްޒް ބުދަ ދުވަހު ވިދާޅުވެފައި ވަނީ، ފަލަސްތީނު މީހުން ގާޒާއިން ހިޖުރަކުރުވައިގެން މެނުވީ އެ ސަރަހައްދުގެ މައްސަލައަށް ދާއިމީ ހައްލެއް ނެތް ކަމަށެވެ.
އަދި ބުރާސްފަތި ދުވަހު އިސްރާއީލުގެ ހަރުކަށި ފިކުރުގެ ސެކިއުރިޓީ މިނިސްޓަރު އިތަމާރު ބެން-ގްވީރު ވަނީ، ގާޒާގެ އާބާދީ އެ ސަރަހައްދުން ބޭރުކުރުމަށް ހަތް އަހަރު ދުވަހުގެ މަޝްރޫއެއް އެކުލަވާލާފަ އެވެ. އޭނާ މި މަޝްރޫއު ސިފަކުރައްވާފައި ވަނީ "އަމިއްލަ އިޚްތިޔާރުގައި ހިޖުރަކުރުން" ނުވަތަ ވޮލަންޓަރީ އެމިގްރޭޝަންގެ ގޮތުގަ އެވެ.
