ޑިމާންޑް އެންޑް ސަޕްލައިއަށް ރިއާޔަތްކޮށް މިފްކޯއަށް ގަންނަ ކަޅުބިލަމަހުގެ ކިލޯއެއްގެ އަގު 21ރ. އަށް ބޮޑުކޮށްފި އެވެ.
މިފްކޯއިން ބުނީ ކަޅުބިލަމަހުގެ އަގު 21ރ. އަށް ބޮޑުކުރަން ނިންމީ މަސްވެރިންނަށް އެކަށީގެންވާ އަގެއް ފޯރުކޮށްދިނުމަށާއި ދެމެހެއްޓިނިވި މަސްވެރިކަން ހަރުދަނާކުރުމަށް ގެންގުޅޭ ސިޔާސަތުގެ ދަށުން ކަމަށެވެ.
"މިއީ ޑިމާންޑާއި ސަޕްލައިއަށް ރިއާޔަތްކޮށް، މަސްވެރިންނަށް އެކަށީގެންވާ އަގެއް ފޯރުކޮށްދިނުމަށާއި ދެމެހެއްޓެނިވި މަސްވެރިކަން ހަރުދަނާކުރަން ސަރުކާރުން ގެންގުޅޭ ސިޔާސަތުގެ ދަށުން ގެނެވުނު ބަދަލެއް،" އެ ކުންފުނިން ބުންޏެެވެ.
މިފްކޯއިން ކަޅުބިލަމަސް ގަންނަ އަގު މިދިޔަ ޖޫން މަސް ފެށުނުއިރު 18.50 އަށް ހުރިއިރު، ފަހުން ހަމަ އެ މަހުގެ ތެރޭގައި އެ އަގު 20ރ. އަށް ވަނީ ބޮޑުކޮށްފަ އެވެ.
މިފްކޯއަށް މަސް ގަންނަ އަގު 20ރ. އަށް ބޮޑުކުރީ ޖޫން 9، ގަ އެވެ. ޖޫން 7، އިން ފެށިގެން މިފްކޯއިން މަސް ގަންނަ އަގު 18.50ރ. އަށް ބޮޑުކުރިއިރު، އެއީ އިރާނު ހަނގުރާމަ ފެށުމުގެކުރިން އެ ކުންފުނިން މަސް ގަންނަމުން އައި އަގެވެ. ހަނގުރާމަ ފެށުމުން މަސް ގަންނަ އަގު 17ރ. ތިރިކުރި އެވެ.
މީގެއިތުރުން މިފްކޯއަށް ބޮޑު ކަންނެލި ކިލޯއެއް 20ރ. އަށް ގަންނަމުންދާއިރު، ބޮޑުކަންނެލި 15 ކިލޯއިން މަތި ގަންނަމުންދަނީ 25ރ. އަށެވެ.
މިފްކޯއަށް މަސް ގަންނަމުން މި ދަނީ އެ ކުންފުންޏަށް ފައިދާ ނުވާ އަގެއްގަ އެވެ. އެ ކުންފުނިން ވަނީ 16ރ. އަށް ކިލޯއެއް މަގުން އެ ކުންފުންޏަށް ގަންނަނީ ގެއްލުމުގައި ކަމަށް ސެޕްޓެމްބަރު 2024، ގައި ބުނެފަ އެވެ.
މިފްކޯއިން އޭރު ބުނި ގޮތުގައި 16ރ. އަށް މަސް ގަންނަން ވެސް ސަރުކާރުން ސަބްސިޑީ ބޭނުންވެ އެވެ.
މި ސަރުކާރުގެ ސިޔާސަތަކީ އަދި އަމާޒަކީ ސަރުކާރުގެ މަސް ކުންފުނި، މިފްކޯއަށް މަސް ގަންނަ އަގު 20ރ. ގައި ހިފެހެއްޓުން ކަމަށް މުހައްމަދު މުއިއްޒު މިދިޔަ ޖޫން މަހު ވިދާޅުވެފައިވެ އެވެ. އެމަނިކުފާނު ވިދާޅުވީ މަހުގެ އަގު ދަށްވާނަމަ 18ރ. އަށްވުރެ ދަށް ނުކުރުމަކީ ސަރުކާރުގެ އަމާޒު ކަމަށެވެ.
