އެމެރިކާ އާއި ކެނެޑާއާ ދެމެދު ކުރިއަށްދިޔަ ވިޔަފާރީގެ މަޝްވަރާތައް މިދިޔަ ހުކުރު ދުވަހުގެ ރޭ ނާކާމިޔާބުވުމާ ގުޅިގެން، ކެނެޑާއިން ބޭނުންވަނީ އެމެރިކާގެ ސްޓޭޓަކަށް ނުވެ، ސްޓޭޓަކަށް ލިބޭ ހުރިހާ ފައިދާތަކެއް ހޯދަން ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ޓްރަމްޕް މިހެން ވިދާޅުވީ ދެ ގައުމުގެ ދެމެދުގައި ކުރެވުނު މަޝްވަރާތައް މެދުކެނޑި، ކެނެޑާގެ ގިނަ ބާވަތްތަކުގެ މުދަލުން 50 އިންސައްތައިގެ އާ ޓެރިފް ނަގަން އެމެރިކާއިން ނިންމުމާ ގުޅިގެންނެވެ. މީގެ އިތުރުން، އެމެރިކާގެ ދަނޑުވެރިންގެ އަތުން ކެނެޑާއިން ގިނަ އަހަރުތަކެއް ވަންދެން ބޮޑެތި އަދަދުތަކުން ޓެރިފް ނަގަމުންދާ ކަމަށް ވެސް ޓްރަމްޕް ވިދާޅުވި އެވެ.
ކެނެޑާގެ ބޮޑުވަޒީރު މާކް ކާނީ ވަނީ އެމެރިކާއިން އަލަށް ކަނޑައެޅި ޓެރިފްތަކަކީ ކެނެޑާގެ ރައްޔިތުންނަށް "ގެއްލުންދީ ބައިބައިކުރުމަށް" ނިންމާފައިވާ ނިންމުމެއް ކަމަށް ސިފަކުރައްވާފަ އެވެ.
އަންނަ ސެޕްޓެމްބަރު މަހުގެ 8 ވަނަ ދުވަހުން ފެށިގެން، އެމެރިކާއިން ނަގާ ކޮންމެ ޑޮލަރަކަށް ޑޮލަރެއްގެ ރައްދު ފިޔަވަޅު އަޅުއްވާނެ ކަމަށް ކާނީ އިއުލާންކުރެއްވި އެވެ. މީގެ ތެރޭގައި ދަގަނޑާއި، ކިރުގެ ބާވަތްތަކާއި، ގޭތެރޭގައި ބޭނުންކުރާ ސާމާނުގެ އިތުރުން އިލެކްޓްރޯނިކްސް އިން ނަގާ ޓެކްސް ހިމެނެ އެވެ. އަދި މިހާރު އެމެރިކާ އާއި ކެނެޑާއާ ދެމެދު އޮތީ ވިޔަފާރީގެ "ހަނގުރާމައެއް" ކަމަށް ވެސް އޭނާ ވިދާޅުވި އެވެ.
މިދިޔަ ހޮނިހިރު ދުވަހު ވާހަކަދައްކަވަމުން ކާނީ ވިދާޅުވީ، އެމެރިކާއިން އެދެނީ މާ ބޮޑެތި ކަންތައްތަކަކަށް ކަމަށާއި ނަމަވެސް އެ ގައުމުން ކެނެޑާއަށް ހުށަހަޅަނީ ވަރަށް ކުޑަ މިންވަރެއް ކަމަށެވެ. އަދި ހަމަލާއެއް އައުމުން އޮންނާނީ ހަނގުރާމައިގެ ހާލަތެއް ކަމަށާއި، ކެނެޑާއަށް މިހާރު ވަނީ ހަމަލާދީފައި ކަމަށް ވެސް އޭނާ ވިދާޅުވި އެވެ.
ޓްރަމްޕް ދެވަނަ ދައުރަކަށް ވެރިކަމަށް ވަޑައިގަތް ފަހުން، ކެނެޑާއަކީ އެމެރިކާގެ "51 ވަނަ ސްޓޭޓް" ގެ ގޮތުގައި ތަކުރާރުކޮށް ސިފަކުރައްވަމުން ގެންދަވާ ގެންދެވުމަށް މި ފަހުގެ ވާހަކަތަކުން ބާރުލިބޭއިރު، މިއީ ކެނެޑާގެ ލީޑަރުންނާއި ރައްޔިތުންގެ މެދުގައި ނުތަނަވަސްކަން އުފެދިފައިވާ ކަމެކެވެ.
ވިޔަފާރީގެ މަޝްވަރާތައް ނާކާމިޔާބުވުމާ ގުޅިގެން، ދެ ގައުމުގެ ދެމެދުގައި އޮތް ވަރުގަދަ ވިޔަފާރީގެ ގުޅުމަށް ވަނީ ބޮޑެތި ބަދަލުތަކެއް އައިސްފަ އެވެ. އަދި މި މައްސަލައަށް ހައްލެއް ލިބޭނެ ސާފު މަގެއް މިހާތަނަށް ފެންނާކަށް ނެތެވެ.
"އެމެރިކާއިން ހުށަހެޅި ކަންތައްތައް އަޅުގަނޑުމެންނަށް ގަބޫލެއް ނުކުރެވޭނެ. އަދި އެމީހުން އެދޭ ކަންތައްތަކެއް އަޅުގަނޑުމެންނެއް ނުދޭނަން،" ކާނީ ވިދާޅުވި އެވެ.
މިދިޔަ އާދީއްތަ ދުވަހު ފޮކްސް ނިއުސްއަށް ދެއްވި އިންޓަވިއުއެއްގައި ޓްރަމްޕް ވިދާޅުވީ، އެމެރިކާއާ ދެކޮޅަށް ވިޔަފާރީގެ ހަނގުރާމައެއް ފަށައި، އެ ހަނގުރާމައިން "މޮޅުވެވިދާނެ" ކަމަށް ކެނެޑާއިން ހީކުރުމަކީ މޮޔަކަމެއް ކަމަށެވެ.
މިދިޔަ ހަފުތާގެ ކުރީކޮޅު ދެ ގައުމުން ވެސް އެއްބަސްވުމަކަށް އާދެވޭނެ ކަމުގެ އުންމީދު އޮތް ނަމަވެސް، މަޝްވަރާތައް މެދުކެނޑުނީ ފަހު ވަގުތު ދެ ފަރާތުން ވެސް އުސޫލުތަކަށް ބަދަލު ގެނެސްފައިވާ ކަމަށް އެއް ބަޔަކު އަނެއް ބަޔަކަށް ތުހުމަތު ކުރުމާ ގުޅިގެންނެވެ.
އެމެރިކާއިން އަލަށް ކަނޑައެޅި 50 އިންސައްތައިގެ ޓެރިފް ކެނެޑާގެ ގިނަ މުދަލަށް ހިނގާނެ އެވެ. މީގެ އިތުރުން ކެނެޑާގެ ދަގަނޑާއި، އެލުމިނިއަމް، އުޅަނދުފަހަރު އަދި ލަކުޑީގެ ބާވަތްތަކުން މިހާރު ވެސް އެމެރިކާއިން ޓެރިފް ނަގަމުންދެ އެވެ.
ބޮޑުވަޒީރު ކާނީ ވިދާޅުވީ ކެނެޑާއިން ރައްދު ފިޔަވަޅު އަޅަނީ "ބޭނުންވެގެން ނޫން" ކަމަށާއި، ނަމަވެސް އެއީ ގައުމުގެ މަސްލަހަތު ހިމާޔަތްކުރުމަށް އަޅާ ފިޔަވަޅެއް ކަމަށެވެ. އަދި މި ފިޔަވަޅުތަކުގެ ތަފްސީލު ކުރިއަށް އޮތް ދުވަސްތަކުގައި ހާމަކުރައްވާނެ ކަމަށް ވެސް އޭނާ ވިދާޅުވި އެވެ.
ކެނެޑާގެ އިދިކޮޅު ކޮންޒަވޭޓިވް ޕާޓީ ހިމެނޭހެން ފެޑަރަލް އެހެން ޕާޓީތަކުގެ ލީޑަރުންނާއި، ބައެއް ޕްރޮވިންސްތަކުގެ ވެރިން ވެސް ވަނީ ބޮޑުވަޒީރުގެ މި ނިންމެވުމަށް ތާއީދުކުރައްވާފަ އެވެ.
އެހެން ގައުމުތަކުން އެތެރެކުރާ މުދަލުން ނަގާ ޓެކްސް ނުވަތަ ޓެރިފަކީ ޓްރަމްޕްގެ ވިޔަފާރި ސިޔާސަތުގެ މުހިންމު ބައެކެވެ. ޓްރަމްޕް ގަބޫލުކުރައްވާ ގޮތުގައި މިކަމުގެ ސަބަބުން އެމެރިކާގެ އުފެއްދުންތެރިކަން އިތުރުވެ، ގައުމުގެ ތެރޭގައި ވަޒީފާގެ ފުރުސަތުތައް ގިނަވާނެ އެވެ.
ނަމަވެސް، ފާޑުކިޔާ ފަރާތްތަކުން ބުނާ ގޮތުގައި މި ޓެރިފްތަކުގެ ސަބަބުން އެމެރިކާގެ ކަސްޓަމަރުން މުދާ ގަންނަން ޖެހޭ އަގު ބޮޑުވެ، ދުނިޔޭގެ އިގްތިސާދަށް ވަނީ ބޮޑެތި ހުރަސްތަކާއި ގެއްލުންތަކެއް ކުރިމަތިވެފަ އެވެ.
