އަންނަ އަހަރު އުޒްބެކިސްތާނުގައި ބާއްވާ 17 އަހަރުން ދަށުގެ އޭޝިއަން ކަޕްގެ ކޮލިފައިންގައި ރާއްޖެ ވަރުގަދަ ގްރޫޕެއްގައި ލައްވާލައިފި އެވެ.
އަންނަ އަހަރުގެ މުބާރާތުގެ ކޮލިފައިން މި އަހަރު ކުރިއަށްދާއިރު، ކޮލިފައިން ގްރޫޕްތަކުގެ ގުރުއަތުލުން މިއަދު ވަނީ ކުރިއަށްގެންގޮސްފަ އެވެ. އެ ގޮތުން، ރާއްޖެ ހިމެނުނީ، ތައިލެންޑް، އިރާގު، ހޮންގް ކޮންގް އަދި ޗައިނީސް ޓައިޕޭއާ އެކު ގްރޫޕް ބީގަ އެވެ. މި ގްރޫޕްގެ މެޗުތައް، ނޮވެމްބަރު މަހު 8-20 އަށް ކުރިއަށްދާނީ ތައިލެންޑުގަ އެވެ.
މެޗުތައް އެތުރިފައިވާ ގޮތުން، ރާއްޖޭން ފުރަތަމަ މެޗުގައި ޗައިނީސް ޓައިޕޭއާ ބައްދަލުކުރުމަށް ފަހު، ދެން މެޗުތައް ކުޅޭނީ، ހޮންގް ކޮންގް، ތައިލެންޑް އަދި އިރާގާ ދެކޮޅަށް އެ ތަރުތީބުންނެވެ. މި ގްރޫޕުން އެއް ވަނަ ހޯދާ ޓީމަކަށް އަންނަ އަހަރުގެ މެއި މަހު އުޒްބެކިސްތާންގައި ބާއްވާ އޭޝިއަން ކަޕުން ފުރުސަތު ލިބިގެންދާނެ އެވެ.
މި އަހަރުގެ މެއި މަހު ސައުދީ އަރަބިއްޔާގައި ކުރިއަށްދިޔަ 17 އަހަރުން ދަށުގެ އޭޝިއަން ކަޕުގެ ކޮލިފައިންގައި މިދިޔަ އަހަރުގެ ނޮވެމްބަރު މަހު ރާއްޖޭން ވާދަކުރި އެވެ. މިދިޔަ ފަހަރު ރާއްޖޭން ވާދަކުރަން ޖެހުނު ގްރޫޕްގެ މެޗުތައް ވެސް އޮތީ ތައިލެންޑުގަ އެވެ. ރާއްޖެއާ އެއް ގްރޫޕެއްގައި ހިމެނުނީ، ތައިލެންޑުގެ އިތުރުން، ތުރުކުމެނިސްތާން، ކުވެއިތު އަދި މޮންގޯލިއާ އެވެ.
ފުރަތަަމަ މެޗުގައި މޮންގޯލިއާ އަތުން 1-0 އިން ބަލިވިއިރު، ދެ ވަނަ މެޗުގައި ތުރުކުމެނިސްތާން އަތުން ވަނީ 6-0 އިން ބަލިވެފަ އެވެ. ތިން ވަަނަ މެޗުގައި ތައިލެންޑް އަތުން ރާއްޖެ ބަލިވީ 7-1 އިންނެވެ. އަދި، ފަހު މެޗުގައި ކުވެއިތު އަތުން ރާއްޖެ ބަލިވީ 5-0 އިންނެވެ.
